هل يمكن تغيير المروحه الكلاتش بمروحه كهربا ؟؟؟

**Dr_Smart** · 22-04-2009 04:19 PM

المشكله ان العربية عندي بتسخن لما بقف في اشارات طويله لكن لما بكون ماشي طوالي بتبقى زي الفل

بالنسبه للردياتير سليم مفيهوش مشاكل وفاصل ثرموستات الكوعه
طلمبة الميا سليمه
مفيش مشاكل ميكانيكيه زي التاكيهات او جوان

المهم بقى ...
انا عندي المروحه شغاله على كلاتش يعني بتدور دايما مع حركة المحرك ... غيرت الكلاتش بواحد جديد نفس المشكله برضو لسه موجوده ... الميكانيكي قالي ممكن نثبت الكلاتش بحيث سرعة المروحه تبقى عاليه بس ده حل مش عملي وهيخلي صوتها عالي .

سالت الكهربائي قالي ممكن تركب مروحه كهربا بدل الكلاتش ده خالص وتشتغل عند درجة حرارة معينه وميزتها ان سرعتها اكبر ب 30 مره عن المروحه الكلاتش

انا بصراحه الموضوع ده عجبني جدا لسببين :
1- المشكله عندي بتظهر لما اقف في الزحمه بس يعني محتاج مروحه كفائتها افضل في سحب الهوا .

2- ان في الشتا انا التبريد عندي شغال على طول وبالتالي العربية بتطول اوي عشان اسخنها .

معلش طولت اوووي عليكو

عايز بقى نصيحتكم هل اركب المروحه الكهربا دي ولا لا ؟ وسعرها كام ؟ وهل فيه نوع معين لان الكهربائي بيقولي هتبقى بتاعت تويوتا وهتعمل حوالي 200 جنيه

العربيه دايهاتسو شارمنت 83 اوتوماتيك دفع خلفي

**wesam_salom** · 22-04-2009 05:04 PM

لو ممكن تركب الاتنين مع بعض يبقى احسن

المروحه الاساسيه تفضل شغاله على طول

والتانيه لما العربيه تسخن بس (على ثرموستات)

وممكن تعملها بزرار من جوه تشغلها لما تحتاجها

**ziours** · 22-04-2009 09:46 PM

كنت عايز اسألك يادكتور سمارت هو الكلاش ده مكانه فين وهل لازم يتغير ؟ ولما بيتغير بيدي كفاءه احسن؟ وبكام؟ معلش طولت عليك في الاسئلة اصل انا عند مروحة زي اللي عندك بس بردوا العربية بتسخن
شكرا

**Dr_Smart** · 23-04-2009 12:26 AM

المشاركة الأصلية كتبت بواسطة ابو مريم

لو ممكن تركب الاتنين مع بعض يبقى احسن

المروحه الاساسيه تفضل شغاله على طول

والتانيه لما العربيه تسخن بس (على ثرموستات)

وممكن تعملها بزرار من جوه تشغلها لما تحتاجها

انا كان نفسي اعمل الموضوع ده بس للاسف المكان مايكفيش المروحتين

**Dr_Smart** · 23-04-2009 12:30 AM

المشاركة الأصلية كتبت بواسطة ziours

كنت عايز اسألك يادكتور سمارت هو الكلاش ده مكانه فين وهل لازم يتغير ؟ ولما بيتغير بيدي كفاءه احسن؟ وبكام؟ معلش طولت عليك في الاسئلة اصل انا عند مروحة زي اللي عندك بس بردوا العربية بتسخن
شكرا

الكلاتش يا باشا هو اللي المروحه راكبه عليه

مش عارف حضرتك تقصد لما بيتغير بواحد جديد ولا يتغير خالص بمروحه كهربا ؟

عموما هو لو محتاج تغيير ممكن يكون سبب في سخونة العربية بس مش مؤثر اوي

لكن ازاي تعرف انه عايز يتغير اصلا معرفش الصراحه

**HeMa_LanCeR** · 23-04-2009 12:56 AM

احسن حل غير المروحه وهات مروحه الريش بتاعتها اكتر من اللي عندك
وبالنسبه لو عايز تركب مروحه كهرباء زياده
ممكن تخليها قدام الرداتير مش وراه
بس بلاش احسن
خلي العربيه علي طبيعتها
انت بس غير المروحه بريش اكتر وبأذن الله هتكون زي الفل
وعلي فكره ده عن تجربه مع البيجو عندي
كانت بتسخن جامد كده
وكان فيها مروحه 4 ريشه
غيرتها بواحده 6 ريشه وبقي كل شيء تمام

**Dr_Smart** · 23-04-2009 01:05 AM

المشاركة الأصلية كتبت بواسطة HeMa_LanCeR

احسن حل غير المروحه وهات مروحه الريش بتاعتها اكتر من اللي عندك
وبالنسبه لو عايز تركب مروحه كهرباء زياده
ممكن تخليها قدام الرداتير مش وراه
بس بلاش احسن
خلي العربيه علي طبيعتها
انت بس غير المروحه بريش اكتر وبأذن الله هتكون زي الفل
وعلي فكره ده عن تجربه مع البيجو عندي
كانت بتسخن جامد كده
وكان فيها مروحه 4 ريشه
غيرتها بواحده 6 ريشه وبقي كل شيء تمام

والله يا باشا انا برضو مقلق من الموضوع ده

بس ماظنش ان تغيير المروحه بواحده ريشها اكتر هيحل المشكله لكن ممكن اجرب معاها مروحه كهربا قدام الردياتير بس لو ليها مكان اصلا
ولو حتى تشتغل مع التكييف لان السخونيه بتزيد اكتر مع التكيف

**Sherifmt** · 23-04-2009 10:18 PM

انا جربت العكس بس في عربيتي الدوجان وغيرت المروحة الأوتوماتيك اللي بتشتغل بالترموستات بمروحة 7 ريشة ركبتها علي طنبورة طرمبة المية زي ال 131 القديمة (كنت قريت هنا في المنتدي ان في ناس شغالة بيها كويس) لكن بصراحة انا حسيت انها كانت حمل علي الموتور وصوتها عالي بجانب انها غير عملية خصوصا في مشاوير وسط البلد اللي بنمشي فيها نسحف وكانت مشكلة لما فكرت أشغل التكييف الحرارة عدت ال 90 في ثواني مع العلم مياة التبريد خضرا وزيت شل جديد والموتور حالتة ممتازة جربتها لمدة ثلاثة أيام وفعلاً كانت كافية اني أرجع للميكانيكي واغير تاني وارجع للأصل وأركب المروحة الأوتوماتيك تاني اللي فعلاً أفضل خصوصا ان انا عندي سربنتينة التكييف في وش الردياتير لذق !!! هو صحيح مكان السربنتينة كدة مكانها صح ؟
هي دي تجربتي مع المروحة أرجو انها تفيد الشباب وتعالو نفكر مع بعض ف حل للحرارة انا متأكد ان مع خبرات شباب المنتدي ممكن نغلب الحرارة (: لأن من الواضح ان الصيف دة مش عادي !!!

تحياتي للجميع

**Dr_Smart** · 24-04-2009 02:34 AM

واحنا مازلنا في انتظار اراء وخبرات الناس الجامده اللي معانا ويارب ماينسونا

**Dr_Smart** · 25-04-2009 05:19 AM

ايه يا بشمهندس سمير عياد مش متعودين ان سيادتك تتأخر علينا كده دايما بتقف جنبنا

وبشمهندس خالد سبعاوي اتمنى من سيادتك تنورنا بآرائك الكريمه

والنداء لكل زملائنا الاعزاء في الورشه

الموضوع: هل يمكن تغيير المروحه الكلاتش بمروحه كهربا ؟؟؟

LinkBack

أدوات الموضوع

عرض

هل يمكن تغيير المروحه الكلاتش بمروحه كهربا ؟؟؟ - انشر الموضوع فى :

-

-

-

-

-

-

-

-

المواضيع المتشابهه

هل يمكن تغيير ماتور الفيفا؟

بولو 98 بعد تغيير المروحه

هل يمكن تغيير لون السيارة ؟؟

الكلمات الدلالية لهذا الموضوع

المفضلات

المفضلات

ضوابط المشاركة