صيانة ال 35 ألف

**chato_eg** · 20-07-2009 09:03 PM

النهاردة كنت عند الجماعة ....( EIM )
کنت بآعمل صیانة ال 35 آلف کیلو...
طبعا حاجز من قبلها على ميعاد 8 ص...
كنت هناك من 7:45 ص...واقف زى ما الوحش المفروض يقف....أول واحد فى الطابور

على 8 كنت بأعمل ال Check In و كانت الحكاية كلها الصيانة المجانية و تغيير تيل أمامى ( حسب وصية صيانة ال 30 ألف + الإحساس ) و كان عندى صوت "وررررر" لما بأجيب ال R أو أشغل التكييف و أخيرا لما أبقى ماشى فى حتة مكسرة بأسمع شخللة...

المهم حكيت لمهندس الاستقبال " وائل سعيد " و الراجل كان كويس معايا جدا ...مافيش زيادة و لا نقصان...طبعا كنا لسه أول اليوم و الساعة 8 ص و هو شكله فايق...قال لى هتخلص على 11 ...مع إن الورقة بتقول هتخلص على 10 ...

شوية و دخلت الاستراحة بعد لفة فى المنطقة...لاقيت الحبيبة واقفة على الرافعة إللى فى مواجهة الزجاج مباشرة...فضلت واقف قدامها...بأتفرج على تغيير التيل...إللى اكتشفت إنه سهل جدا بس تكون عارف سكت و إن أى نعم ممكن أى حد يعمل الشغلانة...بس إللى عارف السكة بينجز على طول و مش بيدق دقة زيادة و لا دقة ناقصة....و كشفوا على الأنوار و الإشارات و زودوا مياه اليادياتير و المساحات و ربطوا العفشة و ربطوا صامولة هى إللى كانت عاملة الصوت...
و بعدين العربية اتجربت و اتركنت...
خلصت الساعة كام ....9:20 ص بالظبط كانت بتتركن....
بس للأسف مش عارف إيه إللى بيأخر وصول الورق لل Cashier إللى كل شوية أروح أسأله عليها...سألت مرة واحدة بس الحقيقة الساعة 9:40 ...قال لى لسه و بعدين سألت الساعة 10:10 ص قال لى خلصت و عليها ...المفاجأة 492 جنيه...
آخر مرة عامل شغلانة التيل لوحدها ب 580 جنيه باين...
المهم دفعت و طلعت على السمكرة علشان وش العربية فيه كلبسات مفكوكة....و فيه صوت فى نهاية قفلة الزجاج...
قلت على إللى فيها و أخدتها بعد ساعة زى الفل...
بس واضح إن فى حد ربنا ينتقم منه يا إما قعد عليها أو هبد حاجة عليها أو خبطها لإن فى كمية كلبسات بشعة مكسرة فى وش العربية....
المهم دفعت 176 ( 100 كلبسات ...60 مصنعية...و الباقى ضرائب ) و توكلت على الله...
و الحمد لله كله تمام...
أجمل حاجة موضوع التيل إللى بقت مصنعيته ب 52 جنيه + 5 جنيه ضرائب...
التيل لسه ثمنه 395 + 39 ضرائب....
واضح إن الواحد لما يروح بدرى بياخد وش القفص...فعلا يا وحوش...الموضوع مستاهل جدا...

دى صور للطوابير الساعة 8:20 ص

و دى صور العربية أثناء الصيانة من خلف الزجاج....حاجة جميلة جدا جدا جدا جدا إنك تقف تتفرج عليها و هما شغالين فيها....بعد كده أستغل أكمل فى إنه يوصى على إن العربية يشتغله فيها فى الحتة دى بس علشان أبقى جنبها

**lion99990** · 20-07-2009 10:38 PM

يا بختك ياعم المكان شكله هادى و جميل مش زى مكنا شايفينه و ربنا يحافظلك عليها كده
و الناس ريقه و هاديه زى مابتقول مش زى يوم الصيانه بتاعتى كان كله على اعصابه

**Ahmed Selim** · 20-07-2009 11:35 PM

المشاركة الأصلية كتبت بواسطة chato_eg

النهاردة كنت عند الجماعة ....( EIM )
کنت بآعمل صیانة ال 35 آلف کیلو...
طبعا حاجز من قبلها على ميعاد 8 ص...
كنت هناك من 7:45 ص...واقف زى ما الوحش المفروض يقف....أول واحد فى الطابور

و الله أنت عسل يا هانى......

مبارك عليك الصيانة

**Ahmed Selim** · 20-07-2009 11:41 PM

طيب مش كان الواجب تسألو يا و حوش ؟؟؟؟

دى تعدى عليكو برضه ؟

**Samah AbdAllah** · 21-07-2009 12:01 AM

مبروك عليك الصيانة ودى ميزة اللى يصحى بدرى ويروح ياخد الدور الاول
بس اللى يروح المرة الجاية يروح 7 وربع عشان 7 ونص كده خلاص اتكشفت واللى هيروح 7 ونص هيلاقى طوابير واقفة

**HassanEissa** · 21-07-2009 04:34 AM

المشاركة الأصلية كتبت بواسطة ahmed_gamal

امال ليه لما بروح بشوف اسعار غريبة
في حد مبلغ عني هناك ولا ايه
دول غيرولي السوستة او القفل بتاع الكبوت ب 280 جنيه (حتة بتاعة كده مالهاش لازمة )
بس انا انبسط بصراحة بعد ماتصلحت

و مبروك يا هاني بيه علي الصيانة و عقبال ال 135000 ان شاء الله

و الله يا احمد فى و فى
يعنى فى حجات بلاقيها سعرها ارخص من سعرها فى عربيتى القديمة الانوس

و فيه حجات

............ غالية سابع حاجه
يا راجل دى البتاعة الى بتفتح اللوك بتاع العجل انا شريها من التوكيل ب 200 جنيه .... و اعتقد انها من كتر ما هيه تفها
انا رمتها لما اشتريت العربية و افتكرتها بلاستكة ملاهش لزمه