مشكله فى الكاربرتير فدونى

**shampo** · 04-08-2009 12:38 AM

انا عندى مشاكل الكل اجمع انها فى الكاربرتير من تغيب فى الداوره ودخنه سوده وحاجات يامه بس انا محتار ما بين حلين انى اودى الكاربتير لعبدو كاربرتير فى اسكندريه اشهر من نار على علم ويتكلف حوالى 150 او انى اجيب واحد جديد فى حدود 600 والاتنين عادى بالنسبه ليا المهم ارتاح فانا لو عبدو ده حيرجعو جديد ارتاح من القرف ده وبسعر اقل ارجو افادتى

**M.FOUAD** · 05-08-2009 12:38 AM

هو الكاربراتير جديد بيعمل 550 جنية هنا في التوفيقية انا معرفش الميكانيكي اللي انت بتقول علية لكن رايي لو العربية هتعيش معاك و مش ناوي تبيعها يبقى هات الجديد احسن و هتوفر الفلوس باستهلاك البنزين

**shampo** · 05-08-2009 01:09 AM

شكرا لردك اخى الكريم وانا ححاول اجيب واحد عشان ريحنى هيا العربيه حتفضل معايا فى حدود سنه سنه ونص كده ان شاء الله

**x_gomgom** · 05-08-2009 02:22 AM

انا هقولك على موقف حصل معايا في عربيتين...
انا معايا لادا نيفا 1993 و بولونيز 1990....
جربت الصراحه موضوع الاصلاح دا واتعمل باب و اكس و الفيلم الهندي دا و طلع عيني في فحص البيئه ... و لما قولت للاسطي اختبار البيئه و co2 في العادم لوي وشه و قالي مليش فيه المهم مفيش دخنه!! رغم ان دا السبب الاساسي اللي خلاني اصلحه زائد انها بتاكل بنزين دا بالنسبه للبوبونيز..
اما الادا و اللي انا عرفته ان الكربراتير بتاعها مش بتاع لعب انا عندي اول ما باظ رحت اصلحه اشتغل فتره تمام و بعدين ركبها العفريت رحت راميه و جايب جديد و الصراحه راحه بال ولا اختبار بيئه يهم ولا يحزنون...
نصيحه من اخ الادا اللي يعطل فيها اي ان كان ارميه و هات جديد عشان الصراحه عمر ما الاصلاح و شغل الاسطي بليه ما بيبقي زي الجديد صدقني...
يا رب اكون افدت

**shampo** · 05-08-2009 04:59 PM

أفدتنى فعلا وشكرا جزيلا ليك ان شاء الله اجيب واحد جديد بس فيه حاجه بس ممكن يكون اكل البنزين الجامد ده لان مثلا الكاربرتير كان عالى ولا ايه وبعدين فيه تغييبه فى الدواره جامد كده يبقى مشيع صح؟

**x_gomgom** · 06-08-2009 12:54 AM

بص زياده استهلاك البنزين دا ليه كذا سبب منه ان الكربراتير عالي و ممكن ايضا ان نسبه الخليط الداخل للمكنه مش مظبوطه و بيكون نسبه الهواء للبنزين فيها خلل او وجود عيب في العوامه او الاكس و ممكن ايضاً مقاسات البكات بتاعه الهواء و البنزين مش مظبوطه و في ساعات خراطيم البنزين بتكون بتنشع او مخرومه و لازم تتمم عليهم كدا كل فتره (دا حصلي فعليا و لفيت حوالين نفسي اسبوع لحد ما عرفته)......
اما غياب الدواره ليه اسباب ايضا غير الكربراتير و لو كان نسبه كون الكربراتير عامل في تأخير الدواره قليله نسبياً هو عامه انا معايا ال 2107 المصري 2008 بالفعل جديده و بتغيب في الدواره شويه و اكتشفت ان دا العادي بتاعها عكس النيفا نهائي اللي هيا 1993!!!
ممكن كهرباء العربيه مش مظبوطه او السبراتير عايز يتظبط و ممكن ابلاتين و كوندنسر و ممكن البوجيهات مثلا عايزه تتغير لو المارش عندك ضعيف او البطاريه..
انا عارف انى كدا خوقتك متقلقش دي كلها حاجات بسيطه بتبان بالملاحظه و ان شاء الله تكون عندك حاجه اسهل من الكلام دا بكتير...
بس يا ريت تقولي موديل عربيتك ايه و سنه الصنع عشان تعم الافاده...
يا رب اكون افدت