مفهوم رياضة السيارات

[MMamdouh]

رياضة المحركات عموما هى الرياضة اللى بتعتمد على اله بمحرك سواء كانت عربية او موتوسيكل

الرياضة دى ليها اشكال مختلفة منها اللى بيبقى التسابق ضد الزمن زى الرالى و الاوتو كروس او ضد منافسين زى سباقات الحلبات او بتعتمد على تقييم لجنة تحكيم زى سباقات الدريفنج... و فية سباقات بيبقى عنصر قوة التحمل فيها اساسى زى سباق لومان 24 و الراليات الصحراوية بشكل عام

الاله ذات نفسها بتختلف حسب اختلاف طبيعة المنافسة يعنى لو بصينا لعربية رالى هنلاقيها ملهاش علاقة بعربية الفورميولا ولا عربية الدراج بالرغم من ان التلاتة عربيات سباق... نفس الكلام فى الموتوسيكلات بتاعت سباق الحلبات غير بتاعت الoff road غير بتاعت تسلق الموانع

المهارة المطلوبة من السائق مختلفة حسب نوع الالة و طبيعة التسابق.... يعنى اللى بيتسابق على حلبة مع عربيات تانية لازم يبقى عندة مهارة التجاوز لكن المهارة دى مش مطلوبة من واحد فى رالى لانة مش بيتجاوز حد لكن محتاج يكتب pace notes كويسة جدا اذا كان عايز يكسب و على العكس تماما الدريفتر محتاج يكون احساسة عالى باتزان العربية عشان يحافظ على اطول دريفت ممكن عشان ياخد اعلى تققيم من الحكام

طبعا كل نوع رياضة له عشاقة و متابعية و ان كان اكثر انواع الرياضة جذب للمشاهدين هى الفورميولا 1 لانها اسرع رياضة محركات حقيقية موجودة حاليا... يليها الرالى و ان كان انصراف مصنعين كتير عن المنافسة قلل كتير من اسهم الرياضة دى

انا شخصيا مش شايف الدراج نوع حقيقى من المنافسة لان السباق نفسة مدتة قصيرة جدا جدا و المهارة الوحيدة المطلوبة من السائق هى سرعة رد الفعل فى الطلعة فقط لاغير

مشكلة النوعية دى من الرياضة هى التكلفة... طالما بنتكلم عن رياضة محركات يبقى لازم فيه اله بمحرك و تراك على مساحة ارض... الالة اللى هتبقى تنافسية بجد و ليها فرصة حقيقية للفوز هتكلف فلوس كتير... و عشان تعمل تراك سباق بجد هيكلف فلوس كتير لان دة هيحتاج مساحة ارض كبيرة

عشان كدة الرياضة دى بيدخلها ناس بامكانيات مادية معينة او ليهم sponsors بيغطوا تكاليف الموضوع دة... اللى عايز يبقى لعيب كورة اخرة هيروح مركز شباب يلعب ماتشين يشوفة مدرب فرقة درجة تانية و يلعبة معاه و الموسم اللى بعدة تلاقية بيلعب فى الدورى العام

فى رياضة السيارات مفيش كدة... انت بتبقى بتسابق بعربيتك فى بطولة محلية و لو عندك المهارة الكافية انك تكسب سباقات هتبداء تجيب sponsors و لو حظك حلو ممكن واحد من المصنعين يتعاقد معاك عشان تسوق عربية المصنع فى احد البطولات العالمية... اذا البداية انت اللى بتعملها و بتتحمل تكلفتها

اضافة لكدة الموضوع بيبداء من سن صغير اوى يعنى ابطال العالم كانوا بيبدئوا من سن 4 او 5 سنوات يركبوا عربيات كارت و يشاركوا فى بطولات... سباستيان فيتيل كسب البطولة المحلية للكارت و هو عندة 7 سنوات

طبعا فى مصر مفيش الكلام دة خالص... لا فيه مدارس للقيادة الرياضية ولا فية بطولات حقيقية برعاية اتحاد مصرى بينمى الرياضة دى بجد ولا حتى فيه تراكات سباق بجد... الموجود حاليا بطولات للهواه زى سبيد شالنج و تايم اتتاك... الاوتوكروس اقرب لان يكون stunt driving competition من كونة سباق بجد

مازال الحلم موجود بانشاء كيان يرعى رياضة السيارات رعاية حقيقية... مصر فيها سواقين كويسين و معاها فلوس و فيها شركات تقدر تقدم رعاية للمتسابقين و الفرق و الارض الفاضية فى الصحرا على قفا مين يشيل لكن للاسف مفيش الكيان اللى يقدر يجمع ال3 عناصر دول مع بعض

MMamdouh

[Karim Ibiza]

الله ينور والله ياباشا

[SYD]

تسلم ايدك
ربنا يبارك فيك

[MOSTAFA . AHMED]

تسلم يا معلم ،،،،،
واحب لو تسمح اضيف حاجه صغيره ان الفورمولا 1 بتجمع مابين الاشكال المختلفة لرياضة السيارات فهي لازم يكون عند السائق مهارة التجاوز ومهارة ردة الفعل وفي نفس الوقت بيكون في دماغة track note وراسم خطوط تسابق كتير وكمان بعض السواقين في الفورمولا بيستخدموا مهارة الدريفت في المنعطفات الواسعة الكبيرة زي الونسو وفيتيل وهاملتون وطبعا اول من بدأ الموضوع ده كان الله يرحمه سينا وده اللي بيميز سواق عن بقية السواقيين .
انا اسف على الرغي ده لكن انا بضم صوتي ليك في ان الحلم يتحقق ونلاقي كيان يرعى رياضة السيارات في مصر

[darkangel007]

Nice topic man (y)

[Ahmed Nasser]

طب انا عايز اشارك فى سباق اوتو كروس

[el yabany]

مشكوووووور والله يعطيك الف عافيه

[akmm]

شكرا .......................

[بيشوى_رمزى]

ياريت و الله يشجعوا رياضة السيارات فى مصر بدل ما الشباب عمال يضيع فى بنزين و كاوتش و اطقم دبرياج و تيل على الفاضى :))

[shawke hamed]

يا ريت يا استاذ بيشوى

[juba8]

الله ينور ياباشا

[juba8]

تسلم ايدك

[elmalek]

-عند الملك خدمة ما بعد البيع