اهمية ظبط هواء الكاوتش

[محمد طايع]

السلام عليكم
مرحبا اخوتى الكرام

حبيت اشارك مع حضراتكم تجربه عمليه يمكن تفيد حد
طبعا معظمكم عارف اهمية ظبط هوا الأربع فرد كاويتش لتجنب اضرار كثيره منها تآكل الفرده
لكن انا تجربتى كانت مختلفه شويه ...
بعد ما جبت كريستالتى بيومين كده روحت لبتاع الكاوتش خصوصا انى بسافر يوميا الى القاهره
وطلبت منه يظبطلى الهوا ... المهم الراجل ابتدى يشتغل

سألته بتظبط هوا على كام ؟
قالى على 35 يا بيه
قولتله ليه كده ده مش كتير ؟؟؟
قالى لأ يا باشا احنا بنظبط على 35 علشان الرطوبه عاليه وحتى اسال كل بتوع التاكسيات الى واقفين دول
قولتله خلاص توكل على الله

النتيجه : زحف رهيب مع الفرامل على الطريق السريع - خصوصا لما تحب توقف العربيه فى موقف او بسرعه بسبب مطب أو لو فيه شويه رمل فى الأرض
طبعا انا كنت سافرت مرتين قبل موضوع الظبط ده والموضوع كان احسن من كده

بدون تفكير رجعت روحت لواحد تانى قولتله اظبطلى الهوا على 30
الراجل نزل الهوا
وسافرت تانى يوم الموضوع بقى احسن بكتير وبقى معايا فرامل وحاسس ان العربيه بتمسك فى الأرض

انا آسف على الأطاله
بس قولت انقلكم تجربتى

ويا ريت تعرفونا بتظبطوا هوا على كام ؟
انا الكاوتش عندى 13 وبيتهيالى المناسب ليه هيكون من 30 الى 32 صح كده ؟

وتقبلوا تحياتى

[mado83]

فعلا مهم جدا ظبط الكاوتش وال13 لما بيكون على 30 او28 كمان بيبقى مريح جدا معاك ومش بتحس بالنقر والظلط اللى فى الشوارع
مره نزلتهم لحد 25 وكانت اييييييييه ريشه ولكن الدريكسيون تقل شويه

[Land_Cruiser]

اتفق مع حضرتك ان تظبيط الهواء مهم و بيؤثر علي سلامه الاطار و سائق السياره بالاضافه الي استهلاك البنزين و مدي استجابه الفرامل و مدي نعومه العفشه. طبعا ٣٥ ده رقم مبالغ فيه جدا و مع الاحتكاك و تمدد الهواء داخل الاطار نتيجه السخونه ممكن لاقدر الله يعمل كوارث. ياريت حضرتك تبقي تشوف من علي قائم العربيه او من الكتالوج او حتي من زملاء عندهم نفس الموديل ايه هو ضغط الهواء الموصي به و ده اللي تظبط عليه الكاوتش بعد كده و ما تسمعش كلام بتوع الكاوتش و ممكن كمان تجيب منفاخ الكاوتش اللي بيتوصل علي البطاريه و تبقي تزود الهواء بنفسك ووجوده هيبقي مفيد معاك في الطوارئ كمان طالما بتسافر. بتاع الكاوتش بيعّدي عليه في اليوم عشرات الماركات و اكيد يبقي صعب جدا يبقي حافظ ضغط الهواء بتاع كل إطار كام لكل موديل و مع الاسف كرامته ما تسمحلوش انه يسأل صاحب العربيه و علي فكره احيانا كتير لو قلت له هيقاوح و يفتي عليك و يحاول يقنعك ان الضغط اللي بتقوله عليه ده مش مناسب و لازم يفتي و يحط التاتش بتاعه و لذلك يفضل عدم الاعتماد عليه

[محمد طايع]

فعلا مهم جدا ظبط الكاوتش وال13 لما بيكون على 30 او28 كمان بيبقى مريح جدا معاك ومش بتحس بالنقر والظلط اللى فى الشوارع
مره نزلتهم لحد 25 وكانت اييييييييه ريشه ولكن الدريكسيون تقل شويه

تمام كده انا برضه لما نزلت الهوا ل 30 حسيت بتقل بسيط فى العربيه وده طبعا لأن انا كنت ماشى على بلالين مش على كاوتش
وبعد دقيقتين خلاص بقى ده الوضع الطبيعى اتعودت عليه والأهم من كده بقى عندى فرامل

شرفنى مرورك

[محمد طايع]

اتفق مع حضرتك ان تظبيط الهواء مهم و بيؤثر علي سلامه الاطار و سائق السياره بالاضافه الي استهلاك البنزين و مدي استجابه الفرامل و مدي نعومه العفشه. طبعا ٣٥ ده رقم مبالغ فيه جدا و مع الاحتكاك و تمدد الهواء داخل الاطار نتيجه السخونه ممكن لاقدر الله يعمل كوارث. ياريت حضرتك تبقي تشوف من علي قائم العربيه او من الكتالوج او حتي من زملاء عندهم نفس الموديل ايه هو ضغط الهواء الموصي به و ده اللي تظبط عليه الكاوتش بعد كده و ما تسمعش كلام بتوع الكاوتش و ممكن كمان تجيب منفاخ الكاوتش اللي بيتوصل علي البطاريه و تبقي تزود الهواء بنفسك ووجوده هيبقي مفيد معاك في الطوارئ كمان طالما بتسافر. بتاع الكاوتش بيعّدي عليه في اليوم عشرات الماركات و اكيد يبقي صعب جدا يبقي حافظ ضغط الهواء بتاع كل إطار كام لكل موديل و مع الاسف كرامته ما تسمحلوش انه يسأل صاحب العربيه و علي فكره احيانا كتير لو قلت له هيقاوح و يفتي عليك و يحاول يقنعك ان الضغط اللي بتقوله عليه ده مش مناسب و لازم يفتي و يحط التاتش بتاعه و لذلك يفضل عدم الاعتماد عليه

مرحبا أخى الكريم

كلام حضرتك مظبوط جدا هو بيتعامل مع كل العربيات على انهم شىء واحد
ان شاء الله هسأل على منفاخ الكاوتش ده لأن شكله مفيد

واتمنى من اصحاب الكريستاله يقولولى بيظبطو هوا على كام لأنى ما عرفتش اوصل للمعلومه دى
التيكت الى على الباب عندى ما فهمتش منه حاجه

[ehabahmedie]

السلام عليكم ورحمة الله وبركاته

خلينا نفهم المكتوب على القايم و نحل المشكلة من جذورها..... أغلب المكتوب على قائم الباب بيبقى بوحدة kilogram per sq. cm لكن الورش عندنا بتتعامل بوحدات (pounds per square inch (psi

وللتحويل بين الوحدتين

1 kilogram per sq. cm (kgf/cm2)= 14.22 pounds per square inch (psi)

يعني اضرب الرقم اللي عندك في 14.22

بالنسبة للبومة مكتوب عليها انها تتظبط على 2 أمامي و 1.8 خلفي يعني تبقى بالتقريب 28 أمامي و 26 خلفي

وأي خدمة

[محمد طايع]

السلام عليكم ورحمة الله وبركاته

خلينا نفهم المكتوب على القايم و نحل المشكلة من جذورها..... أغلب المكتوب على قائم الباب بيبقى بوحدة kilogram per sq. Cm لكن الورش عندنا بتتعامل بوحدات (pounds per square inch (psi

وللتحويل بين الوحدتين

1 kilogram per sq. Cm (kgf/cm2)= 14.22 pounds per square inch (psi)

يعني اضرب الرقم اللي عندك في 14.22

بالنسبة للبومة مكتوب عليها انها تتظبط على 2 أمامي و 1.8 خلفي يعني تبقى بالتقريب 28 أمامي و 26 خلفي

وأي خدمة

كلام جميل جدا ومعلومه جديده عليا
ان شاء الله بكره هشوف الأرقام الى عندى وهكتبها هنا
شكرا لحضرتك على المرور وتقبل تحياتى

[محمد طايع]

السلام عليكم

أنا بصيت على الأرقام الى عندى لقيت العجل الأمامى والخلفى بيتظبط على 2.1 (kgf/cm2)
يعنى على 30 بلغة الصنايعيه عندنا

تحياتى للجميع

[waleedrahmy]

30 انسب حاجة

[S O P H O S]

كلامك حضرتك هو الي صح

[Dragon78]

أنا كمان باظبط الكاوتش كله على 30 عندي والرقم ده مريحني جدا ومريح للكاوتش

ولو قل عن كده باحس ان الفرده نايمه

[Dragon78]

أنا كمان باظبط الكاوتش كله على 30 عندي والرقم ده مريحني جدا ومريح للكاوتش

ولو قل عن كده باحس ان الفرده نايمه

[محمد طايع]

30 انسب حاجة

كلامك حضرتك هو الي صح

أنا كمان باظبط الكاوتش كله على 30 عندي والرقم ده مريحني جدا ومريح للكاوتش

ولو قل عن كده باحس ان الفرده نايمه

تمام الكلام ... وشكرا لمشاركة حضراتكم معانا :)

[Eng.Peter]

شكرا بس الاصح على حسب الكتالوج او القائم بتاع العربية

[محمد طايع]

شكرا بس الاصح على حسب الكتالوج او القائم بتاع العربية

تمام انا جبت الرقم من على قائم العربية فعلا
2.1 (kgf/cm2) امامى وخلفى
وللتحويل لوحدة ال (psi) الى شغالين بيها فى مصر نضرب الرقم فى 14.22
يكون النتيجه 29.862 يعنى "30"
وده انسب مقاس لكاوتش الكريستاله عن طريق القايم وعن طريق التجربه

شكرا لمرورك اخى الكريم