مساعده فى الكاوتش ... فولدا ولا اكسيليرا ؟

[mohamed_selim]

كل سنه و انتو طيبين
امبارح بالليل ربنا كرمنى بحفرة فاصل على الدائرى قبل وصلة المريوطيه و الحمد لله الكاوتش اتقطع و ميتصلحش .... المقاس 205-60-16 و لفيت لفه لقيت الاتى
ميشلان فرنسى او المانى 850
فولدا المانى 715
اكسيليرا اندونيسى 590
فايرستون تايلاندى 855

الفابريكه كان ميشلان بس فرق السعر بين الميشلان و الفايرستون من ناحيه و الفولدا و الاكسيليرا من الناحيه التانيه كبير ... كان فى انواع تانيه كورى و تركى و كله حوالين ال 600

الراجل اللى عنده الاكسيليرا عنده سوميتومو يابانى ب 700 بس هو بيقولى خد الااكسيليرا شغال كويس و فرده نضيفه

المهم انا كده اختيارى بين الفولدا و الاكسيليرا ... اى نصيحه سريعه قبل ما اخلص؟
انا هجيب فردتين بس امامى بدل اللى اتقطعت و التانيه القديمه هشيلها لاى ظروف

مساعدتكم مشكوره مقدما !

[Amr_tika88]

الاكسليرا جربته قبل كده فرده زفت قوي وانا كنت ١٦ ٢٠٥ ٥٥ في بروتون واجا وكانت ناشفه جدا بغباء في الكاوتش انصحك في الاسعار دي شوف سوميتومو و دور لان ممكن تجيب حاجه سعرها كويس جدا في رنج ٦٥٠-٧٠٠

[Amr Axel]

لا ديه و لا ديه الاتنين عار عن تجربة عايز كاوتش نضيف من وجهة نظري
بريدجستون - دانلوب - ميشلان
تويو - يوكوهما - كونتيننتال - بريللي
هانكوك - كومهو

[mohamed_selim]

الموجود ميشلان و فارق فى السعر زى مانت شايف ..... الترتيب فوق ده مقصود يعنى الهانكوك و الكومهو كويسين بس اللى قبلهم احسن؟ و معقول الفولدا الالمانى اسوا منهم؟

[Amr Axel]

ع الترتيب اه و الكاوتش اللي في نفس المستوي و بالنسبة هانكوك و كومهو يكونوا كوري فعلا لأن نزل صيني و بالنسبة الكومهو ايكستا فيها افضل من سول
و يا باشا سيبك من الفتية بتاعت فولدا الماني مفيش حاجة اسمها فولدا الماني دلوقتي ديه اتحاد اوروبي تحديدا بولندا و لو زنقت اي واحد منهم في الكلمتين دول هيبلم و يحاول يقولك اه اوروبي و حاجة نضيفة يا بيه , التاجر اللي يهمه يبيع و يخلص من البضاعة اللي عنده ميفرقش معاه سلامتك و لا راحة بالك و لو كلمت واحد فاهم هيقولك انا مش تكنيكال و بقولك اللي شغال مع الناس و سعره كويس

اهم حاجة تجيب تاريخ انتاج حديث يفضل انتاج السنة لأن الكاوتش صلاحيته بدون تركيب 6-7 سنين و يكون متخزن بشكل سليم و طبعا التمبرتشر و التراكشن يكون A ع الاقل لكن b ده اقل في المرتبة اما السرعات ديه ع حسب سواقتك

[AHMED1718]

الفولدا لو الماني مش حاجة تانيا وليها شفتين هاتها مش هتندم. انا لغايط منزلتهم مطلش ولا بالونة

[saddam]

صديقي المواطن
قولا واحدا
اللي نصحك بإكسلتير ده مستوردها أشرفكو
وخلاصة الخلاصة

تبعد عن أي كاوتش كوري وأندونيسي وفيتنامي
وتاخد يوكوهاما.ياباني إختيارك اﻷول
إياك تاخد تويو
ثم بعد اليوكوهاما.تدور على أي كاوتش صناعة ماليزية إطارات طرية وعظيمة بلد المطاط
ثم إختيارك الثالث لاسسا التركي طري جدا وبستحمل نقل ثقيل

وبالتوفيق
ودمتم للنضال

[D . a .\ AYMAN]

الفولدا لو ألماني .. يعني تقرا عليها صنع في ألمانيا .. عشان هي دلوقتي بتتعمل في بولندا تقريبا زي ما أخي عمرو قال وبيتكتب عليها اتحاد أوروبي

والاتحاد الأوروبي اللى هي البولندي .. أنا جربتها وما كانتش حلوة وكملت الـ 40000 بالعافية أو حتى ما كملتهمش لأني فكتهم على 38 الف ولا حاجة وكانوا خلاص على آخرهم لدرجة إني ما لاقيتش ولا واحدة تنفع استبن

.....

الإكسيليرا .. جربتها زمان من حوالي 12 سنة كدة ولا حاجة وماكنتش وحشة بس برضه ما استحملتش معايا كتير .. بس بصراحة كانت بتتعامل معاملة سيئة جدا في عربية بيجو قديمة

للأسف ما فيش في القائمة اللى انت حاططها دي غير الميشلان

[mohamed_selim]

شكرا ليكم جميعا .... الميشلان بعيده شويه و لقيت كومهو كورى (سولس) ب 580 الفرده و توكلت على الله و جبتها
انا مجرب الهانكوك فى مقاس اصغر فى عربيه تانيه و كويس مش وحش ... انتاج الاسبوع 18 2013

شكرا تانى للمساعده و كل سنه و انتو طيبين

[D . a .\ AYMAN]

الكومهو سولوس حلو أنا مركبه في عربيتي بعد الفولدا .. وعامل بيه دلوقتي حوالي 25 الف تقريبا وكويس لسة كأنه جديد الحمدلله

[mohamed_selim]

بصراحه اول فرق حاسه حتى الان عن الميشلان هو فرق الصوت ... مش سامع اى صوت من الكاوتش :)

[mostafa magdy]

continental , bridgestone , michillen أكتر حاجه بثق فيها الحقيقه
fulda فرنسي مش ألماني و الكاوتش راكب عندي في الكورولا

[sonybony]

مرضوع مميز واللي نازل عندي في البيكانتو وهي خليجي الكومهو وهي حتي الان لطيفه وننتظر هتعيش اد ايه انشالله