الفرده لوحت سلك

[Ayman Hussam]

السلام عليكم
ازيكم يا اجمل منتدى
انا نزلت من الشغل لقيت الكوتش نايم وهو راكب فيه شمبر
بدلتة بالاستبن وروحت البنزينة
الراجل اول ما شاف الفرده قالي الفرده دي "لوحت سلك"
انا مفهمتش فلما سألته قالي يعني باظت ولو لكبتها هتخلي العربية تتنطط
قالي هنطلع الشمبر هتلاقيه متبهدل خالص
المهم طلع الشمبر لفيت فيه خرم واحد ولحمة
بس انا عايز اعرف امتى الواحد المفروض يغير الكاوتش وايه افضل الانواع؟

[amr011111]

الفرده لو لوحت معنى هذا ان المداس بتاع فرده الكاوتش مبقاش فى مستوى واحده
يعنى لو عندك عرض الفرده 20 سم
وحطيت الفرده على مستوى افقى هتلاقى ان مثلا 10 سم من عرضها اعلى من الـ 10 سم التانيين

انما لو الفرده ضربت سلك يبقى كده جابت اخرها وهتلاقى ان الشمبر الداخلى بيتخرم كذا خرم
ولو حصل ومشيت عليها هتصرب منك

[Abo_Mazen]

الكاوتش بيتغير كل خمس سنين أو خمسين ألف أيهما أولا من تاريخ الإنتاج
رأي تاني بيقول إن كل أربع سنين أو أربعين ألف أيهما أولا من تاريخ الإنتاج
رأي تالت بيقول إن كل ثلاث سنين أو ثلاثين الف أيهما أولا من تاريخ الإنتاج

لو إنت ما بتحطش سرعات ..يعني آخرك في المشي 80 كيلو متر في الساعة ..يبقى خلي بالك بس إن الكاوتش ما يكونش عامل بلالين ولا يكون ضارب سلك من جوه ..لو إنت بتحط سرعات تتخطى ال 80 يبقى لازم تكون حالة الكاوتش كويسة

في جميع الأحوال بقى ..بتحط سرعات ما بتحطش سرعات ..الكاوتش مفيهوش هزار ..ولازم يبقى حالته تمام التمام قبل حالة المكنه كمان

[Ayman Hussam]

الف شكر يا شباب على المعلومات القيمة دي
وربنا يجعله في ميزان حسناتكم

[miam0502788391]

لوحت سلك او كسرت سلك يقى لازم لازم تتغير بكاوتش جديد حتى لو لسه مركبه من شهر لأن فيه خطورة انه ينفجر فى اى لحظة لا قدر الله
والكاوتش تشتريه جديد زيرو وانتاج حديث
واياك واياك ثم اياك من الكوتش المستعمل
بالنسبة للأنواع انا جربت الآتى فى خلال خمس سنوات , افضلهم بالترتيب
1 - البريدج ستون تايلاندى ومفيش يابانى للمقاس بتاعى الافضل فيهم
2 - الديستون التايلاندى ناعم وطرى فى المطبات
3 - اللاسا التركى جيد وبستحمل لكن ناشف شوية فى المطبات وبيكسر سلك مع الوقت
4 - السبكترا الاندونسيى طرى بس مش ناعم وعاوز عربية زوايا بتاعتها مظبوطة لأنه بيصفر فى الفرامل والملفات
تقبل مرورى

[Ayman Hussam]

لوحت سلك او كسرت سلك يقى لازم لازم تتغير بكاوتش جديد حتى لو لسه مركبه من شهر لأن فيه خطورة انه ينفجر فى اى لحظة لا قدر الله
والكاوتش تشتريه جديد زيرو وانتاج حديث
واياك واياك ثم اياك من الكوتش المستعمل
بالنسبة للأنواع انا جربت الآتى فى خلال خمس سنوات , افضلهم بالترتيب
1 - البريدج ستون تايلاندى ومفيش يابانى للمقاس بتاعى الافضل فيهم
2 - الديستون التايلاندى ناعم وطرى فى المطبات
3 - اللاسا التركى جيد وبستحمل لكن ناشف شوية فى المطبات وبيكسر سلك مع الوقت
4 - السبكترا الاندونسيى طرى بس مش ناعم وعاوز عربية زوايا بتاعتها مظبوطة لأنه بيصفر فى الفرامل والملفات
تقبل مرورى

شكرا على النصيحة وجزاك الله خيرا