صباح الخير .... بطارية

[احمد ابراهيم]

النهاردة نازل فى امان الله و رايح الشغل و متاخر و نازل بجرى
وصلت عند عربيتى حبيبتى و ادوس على الزرار اللى بيفتح السنتر و الانذار مفيش اى استجابة مرة و اتنين و تلاتة
المهم فتحت بالمفتاح و انا متوقع انها هتلم عليا الشارع .. وقد كان زمرت و صوصوت و عملت كل حاجة
ادور بقى .... مفيش و لقيت كان البطارية فضت كل اللى فيها من الكهرباء ... مع انى كنت بليل مدورها و تمام التمام و من اول لمسة

فتحت الكبوت و قولتلها صباح الخير .. ايه الاخبار النهارده .. يا رب تكونى راضية عنى .. لقيتها مبتردش
هزيتها .. مبتردش .. شكيتها بدبوس .. مبتردش
المهم فى النهاية لقيتها مبرقة عنيها و فاتحه بقها و مطلعة لسانها .. قولتلها انا لله و انا اليه راجعون و قريت الفاتحة على روحها و قولت مفيش غير المواصلات

و قفلت العربية و روحت الشغل فى اكتوبر مواصلات .. صباح المعاناة

انا بس حبيت اقول ان اللى بطاريته تعبانة شوية .. يخلى باله عشان فى اليومين البرد دول البطاريات بتفقس و يعمل حسابه على بطارية

و اهلا بيكم فى فصل تبويظ البطاريات

تحياتى

احمد ابراهيم

[Khaled_Nowaihy]

هى بقى لها أد ايه مع حضرتك ونوعها وماركتها ايه ؟

[zidaneelwaly]

لو هاتركنها اكتر من 3 ايام لازم تسخنها عشان ماتنامشي
معايا كرولا 2007 عملت نفس القصه و وقفلي تاكسي مو60 ووصلي البطاريه ودورهالي بس كنت صراحه مرعوب

افتحها بالريموت الانذار مفيش
طيب ريموت العربيه مفيشششششششش
دخلت بالمفتاح ادور مفيششششششششش
ازمر 123456789..................نامت في سابع نومه
كاسيت مافيششششششششش

ادور مش بتدور

[M.Alaa92]

اسلوبك رائع فى السرد و يا رب متتحطش فى موقف زى ده تانى

[Mo.Kareem]

طيب يا حاج أحمد والنبى لما تشترى بطارية ابقى قولى اشترتها نوعه ايه وبكام علشان انا كمان عندى ربع ضارب ومش عارف اشترى ايه وبكام 0
السلام عليكم
وعلى فكرة احنا جيران انا ساكن فى شارع عشرة لو تعرفوا

[rompo10]

انت كمان ياباشا انا نزلت ادور عربيتي الصبح وحلفت ماهاتدور ابدا ابدا شكلها كده ناويه علي بطاريه

[Mo.Kareem]

طيب مفيش حد ممكن يقول ايه احسن نوع بطاريات والسعر كام ، والمفروض الواحد يركب بطارية كام 55 ولا 70 وهل فيه ضرر لو كانت البطارية القديمة 55 واحنا حطينا 70 ؟