بطارية العربية انتهت خالص

[abo_lamar]

السلام عليكم يا شباب

حصلت ليا دلوقتي مشكلة مش عارف احلها ازاي .... نازل رايح مشوار بالعربية لقيت الهانم مفيهاش كهرباء خالص ... نور العدادات ضعيف جدااااااااا ولمبه الصالون بالسلامة , ولمبة الفانوس الامامي طبعا مش شغالة حتى الكاسيت مش شغال , وفي صوت سارينة كده بتزمر لما بفتح باب العربية صوته ضعيف جدااااااااا وبطئ اوي .

اللي خلاني اتفاجئ بالحاجات دي اول مابفتح العربية بريموت السنتر لقيتها مش عايزه تستجيب خالص رحت فاتحها بالمفتاح العادي واكتشفت الموضوع ده .

هي البطارية بقالها تقريبا سنتين او اكتر ونوعها اكديلكو جافة والعدسة بتاعتها بقالها فترة لونها اسود ومازالت لونها برضه اسود .

ياترى هو الموضوع بطارية انتهت فترة صلاحيتها ولازم تتغير ولا الموضوع حاجة تانية .

والمشكلة كمان ان النهاردة الاحد مش حلاقي محلات فاتحة

[احمد المصرى]

انت نسيت نور والع بليل مثلا


الموقف دا حصل معايا من سنتين بس كن ناسى نور العربيه والع واخد وصله من واحد وبعد كدا اخد العربيه مشوار والبطاريه اشتغلت بعديها عادى جدااااااااااااااااااااااااااااااا



لحد مش شهور عملتها تانى واخد وصله من واحد برضوا وعملت مشوار وركنتها ساعتين ورجعت اشغلها لقيت ولا نفس رحت ساعدها جايب بطاريه جديده على طول


جرب الاول قبل التغيير

[tarek_2005]

لو عملتها معاك قبل كده غير البطارية فوراً

لو اول مرة تعملها تاكد من شحن الدينامو او انك مكنتش ناسي الكاسيت او النور والع مثلاً وركنت العربية

[abo_lamar]

الحمد لله عملت توصيلة من واحد صاحبي وروحت مشوار محترم والبطارية اتشحنت تاني بس بصراحة خايف تعملها تاني

[samirayad]

هل أنت متأكد من شحن الدينامو ............؟

وهل متأكد من جودة ونظافة توصيلات أصابع البطاريه بالقواطيش ....؟

[abo_lamar]

القواطيش مغيرها من فترة من حوالي شهرين والصوابع مغطيها بفزلين

[enayat]

طيب ياجماعة انا نفس الموضوع حصل عندي امبارح ورحت للكهربائي قاس شحن الدينامو تمام بس قالي البطارية فيها ربع ضارب وعاوزة تتغير قلت له اجيب بطارية جافة قالي لا السائبة احسن مع العلم ان عربيتي 128 فانا بسال دلوقتي
1- ماهي الاسباب التي تؤدي الي تلف ربع في البطارية ؟ مع العلم اني مكنتش اعرف ان لازم اعملها صيانة دورية هيا عموما في العربية من سنة ونصف وانا كنت شارية العربية وهيا فيها مغيرتهاش
2- الاحسن فعلا اجيب بطارية سائلة ام جافة مع العلم ان حاليا مشاويري قليلة يعني ممكن اخرج بيها مرتين او تلاته في الاسبوع ؟

[Ahmed Nasser]

اعتقد ان حضرتك تغيرها لان الشتاء هتخليك تكره حاجة اسمها عربيات حصلت معايا

[hazemhassan]

انا مرة نسيت النور ورجعت لقيت النور ضعيف جدددا وبعديها بفترة مرديتش تدور كشفت عليها قالى ربع ضارب سبتها وكنت كل مانزل يا دور يا مدورش لحد ما جبت اخرها ومرديتش تدور تانى بس بعد فترة
و اشتريت واحدة جافة acedlko ب370 جنية 55 امبير بمراضية الصنايعى
وقلت اشترى دماغى عشان الشتاء

[ahmed elsherif]

انا برده حصل معايا نفس الكلام من اسبوع كل ما اشحنها واركنها اجي الاقيها مش بتدور واشتريت بطاريه هانكوك جافه 70 امبير ب 470 جنيه

[yaserbasha2000]

بعد اذن صاحب الموضوع انا عندي استفسار مشابه

البطاريه عندي لها 3 سنين و الحمد لله شغاله تمام مع ان طبيعه شغلي بتخليني اركن العربيه اسبوع كامل بدون دواره
الاسبوع اللي فات و في يومين الشتاء الجامد دول العربيه كانت مركونه المهم عند اول استخدام ليها بعد اسبوع ركنه فوجئت بيها بتعتل ومش عايزه تدور المهم اني سندتها شويه بنزين مع المارش دارت تمام و الحمد لله وبقالها اسبوع بعد كده شغاله تمام بدون مشاكل

السؤال اللي عندي

اللي حصل ده له علاقه بالبطاريه يعني قربت تشيع و الحق اغيرها خصوصا ان العدسه بتعتها سوده و مقلبتش اخضر خالص ؟
و لا ده نتيجه رطوبه في بوجيهات من الركنه و المطره ؟

[Ahmed Nasser]

اللى حصل ده من البطارية
اكشف عليها وشوف فيها ايه

[rororo]

عملت معايا نفس العملة من يومين ولازم تغير

[م. محمد نافع]

السلام عليكم
هحكي حكايتي مع البطارية للي عاوز يعرف البطاريه كان بقالها سنه و5 شهور
نزلت في يوم وجيت ادور ما دارتش المهم زقيتها ودورتها وقعدت بعدها حوال 3 اسابيع شغاله تمام
وبعد كده جيت ادور ما دارتش زقيتها دارت وسيبتها 1/2 ساعة دايره وبطلتها ودورت تاني دارت تمام
المهم تاني يوم جيت ادور ما دارتش قلت اكيد البطاريه عاوزه تتشحن اصلي استخدامي للعربية كان قليل المهم دورتها حوالي 3 ساعات
وبطلتها وتاني يوم دورتها دارت تمام المهم انا كنت خايف ان يكون العيب في المرش او الدينامو لانها مكملتش سنتين
المهم بعدها بيوم ما دارتش فاكتشفت انها مبتقدرش تحتفظ بالشحنه بتاعتها لاكتر من يوم
وطبعا دي كانت بداية النهاية لانها بعد كده بطلت تدور العربيه
روحت كشفت عليها قاللي السائل بتاع البطارية ساقط
المهم قلت له اغير لها السائل قاللي هتشتغل شهر بالكتير وبعدين هتبوظ تاني قلت لا اشتري دماغي واشتري واحده جديده
المهم الدروس المستفاده من الموضوع
اولا لازم تكشف علي البطارية كل شهر
ثانيا لما اعربيه متدورش اتاكد ان شحن الدينامو سليم وان مفيش حاجة بتستهلك البطارية وبكدة يبقي البطارية في الرمق الاخير
ثالثا لما البطارية تكون بايظة متحاولش تصلحها ولكن غيرها علي طول حتي لو كانت عمرها سنه بس

[mahdyez]

نفس نوع البطاريه اللى كانت معى وقعدت سنتيت و3 شهور عملت معايابالظبط زى ماعملت بس ساعتها كنت مسافر طنطا ووقفت وانا ماشى وجبيت كهربائى ومعاه بطاريه ووصله شحن
لكن الشحن ماجبش فايده
واخيرا اشتريت واحده جديده وسالت راجل اللى اشتريت منه بتقعد كام سنه قالى سنتين من شارع احمد سعيد