استشارة قبل تغيير بطارية ميجي

[abdo_2812]

السلام عليكم ورحمة الله وبركاته

صباح الفل على أحلى وحوش وكل سنة وانتم طيبين :)

دلوقتي ميجي امبارح الفجر جيت أدورها بقت تحاول تدور وبعدين تروح فاصلة وماتدورش
وبعدين ألاقي الفرامل حجرت كده تحت رجلي وأحيانا ألاقي مكتوب power stearing not locked
وأحيان أخرى ألاقي رسالة تانية مش فاكر تقريبا كانت (passenger airbag is off)

المهم بعد عدة محاولات دارت الحمدلله بس لقيت وحدات رفع الزجاج مش شغالة فبطلت ودورت تاني اشتغلت عادي - فكبرت دماغي ومشيت ومش في دماغي أي حاجة.

وبعدين وأنا خارج من صلاة العيد وكنت رافع الإنتظار علشان راكن صف تاني طبعا علشان الزحام، جيت أدور العربية المرة دي بقى حلفت ماتدور، ياميجي يهديكي يرضيكي ... عيب ده انتي حبيبتي وياما ضحيت علشانك بوقتي ومجهودي مع الناس اللي كانت بتتخانق معايا علشان ماشتريكيش

بارضو مافيش فايدة !!
نفس المشكلة تيجي تدورها تقطع والفرامل تحجر

بعدها بشوية جه في بالي إن ممكن تكون مشكلة بطارية، فالمهم بعد ما طولت عليكم بعد محاولات مستميتة لقيت كابل الحمدلله ووصلت توصيلة فالعربية دارت فورا بدون مشاكل والحمدلله

بس الزجاج فضل معلق شوية وكمان النور مكانش بيقبل والزجاج مكانش بيترفع مع اللوك بتاع الريموت

وبعدين بعد كام مرة أدور العربية اشتغلت كلها تمام (يظهر كان السوفت وير هنج بقى ولا حاجة)

نهايته، المشكلة دي ياشباب أكيد مشكلة بطارية؟، هي البطارية شكلها ممكن تمشي بالزق لكن أنا هكبر دماغي وأغيرها حفاظاً على العربية، لكن أرجو من الوحوش إنهم يقولولي رأيهم لأن أنا قريت أعراض مشابهة لدي قبل كده (بس مش نفسها بالظبط) وكانت المشكلة حساس سرعة ومرة كانت تبع فيشة طرمبة البنزين

في انتظاركم
وجزاكم الله كل خير مقدما :)

[Col. Eng. Khaled]

طالما هي بطارية الفابريقة و دي الأعراض يبقى فعلا محتاجة بطارية جديدة .

[abdo_2812]

مرحب سيادة العقيد، منورني والله :)

كل سنة وحضرتك طيب

والله أنا مش عارف هي بطارية الفابريقة ولا لأ، أنا لسه مشتريها من حوالي 3 أسابيع، إنما هتصل بصاحبها الأصلي وأسأله

وبما إن حضرتك اللي رديت عليا، هل تنصحني ببطارية معينة أو مكان معين أشتري منه؟
وجزاك الله كل خير

[chato_eg]

أى محل كاوتش و بطاريات روح قيس الشحن بتاع الدينامو..مادام الوضع أصبح مأسوى كده يبقى غالبا هتلاقيه أقل من المعدل الطبيعى...بس مش شرط

النوعين المرشحين هما فارتا و AcDelco ...
لو لقيت فوق ال 70 أمبير يكون أحسن..زى ال 72 أمبير مثلا..
لو مالقيتش يبقى ما تقلش عن ال 70 أمبير أبدا

طبيعى اللى بيحصل مع وحدات الرفع...لازم بعد فصل البطارية يتعمل لهم reset...كمان هاتضطر تدخل كود الكاسيت

[Ahmed Selim]

طبعاً الوحوش ردو ردود زى الفل

أنا بس هضيف حاجة

لو ملقتش 72 و ده فى الغالب حاول تشوف ال 75 أمبير أحسن

[Col. Eng. Khaled]

أى محل كاوتش و بطاريات روح قيس الشحن بتاع الدينامو..مادام الوضع أصبح مأسوى كده يبقى غالبا هتلاقيه أقل من المعدل الطبيعى...بس مش شرط

النوعين المرشحين هما فارتا و AcDelco ...
لو لقيت فوق ال 70 أمبير يكون أحسن..زى ال 72 أمبير مثلا..
لو مالقيتش يبقى ما تقلش عن ال 70 أمبير أبدا

طبيعى اللى بيحصل مع وحدات الرفع...لازم بعد فصل البطارية يتعمل لهم reset...كمان هاتضطر تدخل كود الكاسيت

طبعاً الوحوش ردو ردود زى الفل

أنا بس هضيف حاجة

لو ملقتش 72 و ده فى الغالب حاول تشوف ال 75 أمبير أحسن

ما ليش رأي بعد كده ... الله ينوّر .

أصبتما كبد الحقيقة .

[Ahmed Selim]

ما ليش رأي بعد كده ... الله ينوّر .

أصبتما كبد الحقيقة .

تعليمك يا كبير.

[abdallasoliman]

لضبط الزجاج ارفعة للاخر وخلى ايدك على زر الرفع لمدة 5ثوانى علشان يرجع لطبيعتة ودة على الاربع ازرار واذا كانت السيارة اتوماتيك فلاتقل عن 70امبير اما المانيول فيمكن 62امبير ويقال ان الفارتا مش كويسة

[abdo_2812]

جزاكم الله كل خير جميعا يارب، وإن شاء الله هطبق التعليمات بالحرف :)
وإن شاء الله لو مالقيتش 72 هجيب 75 أمبير وهاتجنب إني أقل عن كده بإذن الله تعالى

سيادة العقيد، أنا بعت لحضرتك رسالة على الفيس بوك :)
في انتظار رد حضرتك ...

[Col. Eng. Khaled]

رديت يا فندم من نص ساعة تقريبا .

[abdo_2812]

جزاكم الله جميعا كل خير

وأخص بالشكر الحبيب العقيد خالد، قد ايه كنت فخور لما اتعرفت عليه انهاردة في التليفون :)

الحمدلله ربنا وفقني واشتريت بطارية 72 أمبير بس مالقيتش ACDelco للأسف إلا 74 أمبير وعدلة يعني مش معكوسة فمكانتش تركب على العربية لكن اشتريت بطارية كوري اسمها سوبريم الراجل أكدلي إنها نفس آداء الACDelco وقالي إن مايفرقهمش غير الضمان وإكدلي إنه هيضمنهالي نفس ضمان التانية والمفروض إنه ثقة إن شاء الله وربنا ييسر والدنيا تبقى تمام ... والحمدلله البشاير بتقول إنها هتبقى كويسة

بس فيه نقطة مهمة للإفادة: هو مارضيش يبيعلي فارتا مع إن كان ممكن يجيبهالي بس قالي إنه بطل يشتغل فيها لأنها بقت مضروبة وبيقولي مش هاتشرفني مع زبايني وقالي أنا مش هجيبهالك بصراحة حتى لو مش هاتشتري من عندي وإلا أنا مش مسؤول عن أي مشاكل تحصل فيها أو معوقات تحصل في ضمانها !!

ألف شكر ليكم جميعا وجزاكم الله كل خير :)

[Col. Eng. Khaled]

جزاكم الله جميعا كل خير

وأخص بالشكر الحبيب العقيد خالد، قد ايه كنت فخور لما اتعرفت عليه انهاردة في التليفون :)

الحمدلله ربنا وفقني واشتريت بطارية 72 أمبير بس مالقيتش acdelco للأسف إلا 74 أمبير وعدلة يعني مش معكوسة فمكانتش تركب على العربية لكن اشتريت بطارية كوري اسمها سوبريم الراجل أكدلي إنها نفس آداء الacdelco وقالي إن مايفرقهمش غير الضمان وإكدلي إنه هيضمنهالي نفس ضمان التانية والمفروض إنه ثقة إن شاء الله وربنا ييسر والدنيا تبقى تمام ... والحمدلله البشاير بتقول إنها هتبقى كويسة

بس فيه نقطة مهمة للإفادة: هو مارضيش يبيعلي فارتا مع إن كان ممكن يجيبهالي بس قالي إنه بطل يشتغل فيها لأنها بقت مضروبة وبيقولي مش هاتشرفني مع زبايني وقالي أنا مش هجيبهالك بصراحة حتى لو مش هاتشتري من عندي وإلا أنا مش مسؤول عن أي مشاكل تحصل فيها أو معوقات تحصل في ضمانها !!

ألف شكر ليكم جميعا وجزاكم الله كل خير :)

كل الفخر من نصيبي لثقة حضرتك و أخذ رأيي في مسألة البطارية

طالما الراجل ثقة و هو أدرى بمهنته فإن شاء الله لا وجود للقلق ، جربت سابقا بطارية كوري في عربيتي

السابقة (لانوس 99) و كانت بسم الله ما شاء الله و لا حول و لاقوة إلا بالله .... طبعا مش كل الكوري .

و زي ما نوهت لحضرتك ، الراجل ثقة (على كلامك) و أدرى بمهنته ... فلا تقلق إن شاء الله .

[midohits]

بص هيا مشكله بطاريه اكيد انا غيرت بطاريه نوع كلورايد 70 امبير مكملتش معايه 7 شهور ودفعت فرق 150 جنيه واعطوني واحده بدالها بس ميه مش جافه فلو امكانياتك تساعدك تجيب فارتا 75 امبير معلش هتتكلف كتير شوية بس هتنساها وسيبك من الأسي ديلكوا والكلام داه