حل لبطاريه السياره اللي بتزهق صاحبها في الصبح من البرد

[atpo56a]

السلام عليكم احبابي اعضاء المنتدي
اكيد الاغلبيه مننا بتعاني من مشكله عدم تدوير السياره في الصباح نظرا للبروده وكمان البطاريه حتودع علشان بقالها 2سنه شغاله فل الفل بس ييجي الشتاء وتتجن . ايه رايكم لو نعمل حمايه خارجيه لجسم البطاريه من الصوف الحراري اللي بيركب داخل البوتجاز وافران الكهرباء لعزلها من بروده الجو ونجعلها دايما دافيه اي تحتفظ بحرارتها كأنها في الصيف
انا قرأت الموضوع ده لواحد عايش في دوله اوروبيه وعزل البطاريه واشتغلت زي الفل
ايه رأيكم نجرب الموضوع ده واكيد فيه حد من الاعضاء عمل الموضوع ده قبل كده
يا ريت نستفاد من تجارب بعض
علي فكره الصوف الحراري مش غالي رخييييييص بس الموضوع ده لو اتعمل وحافظ علي البطاريه يبقي حاجه كويسه
لا تنسونا من المشاركه

[Ahmed Nasser]

انت بتقول فى اروبا اتعمل ونجح
عندنا بقى هيبقى مالوش اى لازمة لان احنا مش زى اروبا اكيد
طالما البطارية تمام هدورك
لو بتودع وشغالة بقالة سنتين زى ما انت بتقول يبقى انسى

[Salamonti]

وهي البطارية بتبوظ من الحرارة ولا من البرودة ؟؟؟؟

+ ان البطارية مابتطلعش حرارة داخلية عشان نخليها تحتفظ بيها أصلا

أعتقد كدة الصوف الحراري ده هايحافظ على برودة البطارية ويخليها ماتسخنش من حرارة الموتور مثلا

بص انا مش فاهم حاجة خالص ههههههه ^_^

[atpo56a]

الاخSalamonti يا باشا مكونات البطاريه بتتأثر ببروده الجو يعني الاقطاب الداخليه بتبقي بارده تؤدي لتهريب الكهرباء منها تيجي حضرتك تشغل العربيه الصبح في الجو الثلج تلاقي العربيه بتطلع في الروح لكن بص علي البطاريه بعد مشوار حلو حتلاقيها سخنه ده يفيد ان الاقطاب في حاله سخونه اطفي العربيه وانت لسه جاي من مشوار وشغلها تاني حتلاقي العربيه تشتغل من اول ما تدورها
انا قصدي ليه نخلي البطاريه طول الليل متعرضه للهواء
فتره الليل اللي هي بتكون تلج ما نحط قميص صوف حراري علشان يخلي البطاريه دافيه او شبه محتفظه بحرارتها كأنك جاي من مشوار
اي لا يؤثر فيها الجو البارد ليلا
اكيد حضرتك وصلت للي اقصده يا فندم

[aboomar22]

ياباشا غير البطارية علشان متعملش معاك مواقف بايخة متعرفش هتحصل امتى البطارية لو تعبانة غير وريح دماغك

[مصطفى-حسن]

شوف انا بطبعى بحب الافتكاسات والابتكارات
ولو انت عايز تجرب ......جرب وقولنا على النتيجة
بس فية حاجة بسيطة هقولك عليها
البطارية لما تكون جابت اخر وانت مشيت بالعربية 200 كيلو سفر مثلا وركنت العربية ساعتين فقط فى يوم حار (يعنى العربية لسة سخنة والجو سخن ) وجيت تدور تانى ..مش هتدور

[Salamonti]

شوف انا بطبعى بحب الافتكاسات والابتكارات
ولو انت عايز تجرب ......جرب وقولنا على النتيجة
بس فية حاجة بسيطة هقولك عليها
البطارية لما تكون جابت اخر وانت مشيت بالعربية 200 كيلو سفر مثلا وركنت العربية ساعتين فقط فى يوم حار (يعنى العربية لسة سخنة والجو سخن ) وجيت تدور تانى ..مش هتدور

طيب ده لو البطارية أساسا جابت آخرها فعلا كلامك صحيح..

السؤال هنا هل الافتكاسة دي لو اتعملت في بطارية جديدة ممكن تؤدي لإطالة عمر البطارية ؟
يعني بدل ما تبوظ بعد سنتين تبوظ بعد 3 ؟؟؟
وهل ممكن الافتكاسة دي تؤدي للعكس وتجيب نتيجة سلبية وتبوظ البطارية في زمن أسرع ؟؟

محتاجين كلام علمي عن مدى تأثر قدرة البطارية وعمرها الافتراضي بدرجات الحرارة المختلفة :)

[مصطفى-حسن]

طيب ده لو البطارية أساسا جابت آخرها فعلا كلامك صحيح..

السؤال هنا هل الافتكاسة دي لو اتعملت في بطارية جديدة ممكن تؤدي لإطالة عمر البطارية ؟
يعني بدل ما تبوظ بعد سنتين تبوظ بعد 3 ؟؟؟
وهل ممكن الافتكاسة دي تؤدي للعكس وتجيب نتيجة سلبية وتبوظ البطارية في زمن أسرع ؟؟

محتاجين كلام علمي عن مدى تأثر قدرة البطارية وعمرها الافتراضي بدرجات الحرارة المختلفة :)

شوف انا راجل بحترم معرفتى وخبرتى
يعنى ممكن اعمل بحث فى النت وارد عليك رد اكاديمى علمى منمق
لكن انا مش كدة خالص

فانا هرد عليك رد من واقع خبرة عملية
البطارية فى ظروف التشغيل العادية بتبقى فى الحوض جنب الموتور والكبوت مقفول
يعنى ظروف التشغيل بتكون فى جو دافى او ساخن بمعنى اصح

فبالتالى الفكرة دى مش هتزود عمر البطارية
دة رايى الشخصى

[waleedrahmy]

العربيات الاوربية الموجودة بمصر كلها فعلا بتيجي بصندوق بلاستيك حولها

[Khaled Lanos]

والله أنا رأيي جرب مش هتخسر حاجة..بس البطارية لما تكون جديدة وبصحتها وبتدور في البرد على طول من أول مرة.

[akmm]

والله أنا رأيي جرب مش هتخسر حاجة..بس البطارية لما تكون جديدة وبصحتها وبتدور في البرد على طول من أول مرة.

انا اؤيد الراى ده .........................

[Zing0]

معلش يا جماعة الرد بتاعى ده منقول من كلام سائق تاكسى لسة بأكلمة إمبارح
قالى المشكله فى التدوير الصبح فى الشتاء مش البطارية, المشكله فى البوجيهات بتكون مرطبه من الليل, و ده إللى بيخلى العربية تلقط على طول لما تكون سخنه (بعد مشوار سخنت فيه و بطلتها و رجعت تدورها تانى)
يعنى الحوار كله (طبعاً لو البطارية شحنتها كويسه) يبقى 100% من البوجيهات.

[Gelgel2004]

اسمحولى اشارك معاكو فى الموضوع الشيق ده
لى صديق بيغير بطاريه كل سنه - لانوس 2 - وده من الحرارة و المروحه اللى بتطلع من الموتور
افتكرنا مع بعض القول المأثور - الحراره قاتله البطاريات .
و كمان افتكرنا ان ميرسيدس كانت بتحط البطاريه تحت الكنبه فى موديلات السبعينات و بعد كده نقلتها تتت التوربيدو - و بعيد عن الحراره تماما
التجربه
نقلنا البطاريه من الكبود الامامى و حطيناها فى الشنطة الخلفيه جنب الاستبن
و وصلنا الكهرباء عن طريق كابل محترم معزول و لحمنا فيه القطاشات زى الفابريكة تماما
و ثبتنا القطاشات مع بعض بمسامير و صواميل نحاس
النتيجه
البطاريه كانت اسبانى اسمها سبيدو - اظن كده - بقالها 4 سنوات حتى تاريخه
تحياتى..

[mbakery]

طب الكلام ده علي البطارية الجافة و البطارية المياه ايضا