بطارية سايلة أحسن ولا جافة ؟؟ وأنه نوع ؟؟

[Ahmed Hamdy]

عايز أجيب بطارية بس مش عارف أجيب ايه ..
أنا كنت ناوى أجيبها جافة .. بس الكهربائية بيقولولى هاتها سايلة أحسن عشان ممكن تتشحن لكن الجافة لأ ..

بس أنا عارف إن الجافة أحسن انها مش بتحتاج صيانة ..

أنا كنت ناوى أجيب Acdelco عشان سعرها كويس "أنا عربيتى ماروتى بتاخد بطارية 40" .. سعرها فى حدود 280 .. الفارتا 360 تقريبا ..

بس نزلت امبارح أجيبها ملقتهاش وكذا محل يقولى عندى نوع كورى أحسن ميت مرة من الـ Acdelco .. بس أنواع غريبة الصراحة معرفهاش .. نوع اسمه Nova بـ 360 .. ونوع تانى مش فاكر اسمه بـ 300 .. بس قلقت انى أجيب نوع غريب معرفش حد جربه ..

رأيكوا ايه يا جماعة ؟؟؟
أجيبها جافة ولا سايلة ؟؟
ولو سايلة تبقى ايه ولو جافة تبقى ايه .. بس لا تتعدى 300 جنيه .. ؟؟

[mrghost]

إن الجافة أحسن انها مش بتحتاج صيانة
وعلشان تجيبها رخيصه انزل التوفيقيه فى محلات بتاعة بطاريات امام سنترال رمسيس بيبيعوا باسعار كويسه وممكن تلاقى عنهم acd delco

[superzok]

Ac Delco

عن تجارب ناس

[sikobiko]

انا عندي فارتا من 3 سنين ونشكر ربنا شغاله بكفائه كويسه

[Ahmed Hamdy]

أنا نزلت تانى النهاردة ملقتش برضه Acdelco .. جبت واحدة كورى اسمها Aurora بـ 300 جنيه بعد خصم القديمة ..
الراجل قعد يشكرلى فيها ويقولى انها أحسن من الـ Acdelco ..

جبتها من محل من اللى قدام سنترال رمسيس ..

ربنا يسهل وتطلع كويسة ..

[hdmrdash]

أنا نزلت تانى النهاردة ملقتش برضه Acdelco .. جبت واحدة كورى اسمها Aurora بـ 300 جنيه بعد خصم القديمة ..
الراجل قعد يشكرلى فيها ويقولى انها أحسن من الـ Acdelco ..

جبتها من محل من اللى قدام سنترال رمسيس ..

ربنا يسهل وتطلع كويسة ..

الف مبروك
المهم لو كانت سائله تروحله كل 15 يوم تعمل صيانه قياس كثافه وشحن ويختم لك على الضمان
لو جافه تروحله كل شهر تقيس الشحن ويختم لك على الضمان

[Ahmed Hamdy]

هى جافة ..

وقالى ضمانها سنة و نص .. تيجى كل شهرين تقيس شحن الدينامو ..

[meeezo333eg]

عن تجربة ناس معرفة ان الجافة مرة واحدة ما بتلاقيهاش يعنى تكون شغالة 100/100 و الصبح تلاقيها 0/100 اما السايلة بتقعد قبل ما تبوظ ب 3 شهور تقريبا تخسع و تبقى مش تمام يعنى بتديك انذار

[emadno1]

السائله وحشه بتفور و تبوظ المنطقه اللى تحتيها و تلاقيها صدت و تكرهك فى العربيه

[socool]

السايله عايزه عناية وتزويد مايه الجافه بترميها فى الكابوت لغاية ماتبوظ انا عندى الجافه قعدت معاية سنتين مالهاش مشاكل

[Qamar]

يا جماعة كونها تقعد سنتين أو تلاتة ده بيعتمد على حاجات كتير هاقول اللى اعرفه منها:
1- الصيانه الدورية
2- الجري الكتير على السريع ما بيستهلكش زي وسط البلد
3- الدوارة و أسلوب تعاملك معاها ( خليك حنين)
طبعا ده للجافة و السايلة.
ربنا يباركلك فيها

[Kareem Khattab]

الجافة احسن طبعا

[sab3aawy]

الجافة ميزتها انها مبتبوظش حوض الموتور حواليها ومبتحتاجش صيانة من اى نوع

اللى متجربين فى مصر وسمعتهم كويسة هم طبعا الإيه سى ديلكو والفارتا

[Ahmed Hamdy]

أنا كنت عايز أجيب فارتا بس لقيتها غالية بصراحة .. وكمان قالولى انها مبقتش ألمانى .. بقت اتحاد أوروبى ..
فقلت أجيب Acdelco بس للأسف ملقتش 40 .. سألت فى كذا مكان وملقتش وكنت عايز أجيبها بسرعة بأه عشان العربية كانت مزهقانى كل شوية زق ..

فجبت الكورى دى .. كنت كل ما أروح محل وأسأل على الـ Acdelco يقولى ما تاخد الكورى دى أحسن بكتير .. حتى هى أغلى سنة ..
فجبتها بأه وربنا يسهل وتطلع كويسة ..

فى دلوقتى أنواع كتير كورى .. أنا جبت نوع اسمه Aurora شكلها نضيف ..

[osamaelbaz]

هى البطاريات الى بتنزل فى العربية وهى زيرو بيكون نوعها اية سايلة ولا جافة واعرفها ازاى انا معايا ماتريكس 2008 ومعرفشى البطارية الى فيها نوعها اية