ايه اللي هيحصل لو بطاريه عربيتك 55 امبير و ركبتلها بطارية 70 او 75 امبير

[sinkort]

السلام عليكم

ايه اللي هيحصل لو بطاريه عربيتك 55 امبير و ركبتلها بطارية 70 او 75 امبير ؟ هل هتبوظ حاجة في العربية ؟؟

و بعد ازنكم لو حد يعرف سعر البطارية الفارتا السلفر ال 55 بكام و منين ؟
و سعر ال AC Delco بكام و منين.

مع الشكر

[Mecha]

بطارية اكبر مش هتبوظ اي حاجة ,يعتبر افضل المهم ليها مكان تركب فيه

[sinkort]

اصل انا في واحد قالى ممكن تبوظلك فيوزات او حساسات في العربية ... خليك دايما في اللي زي اللي في الكتالوج

[pepo2011]

لو البطارية اكبر هاتقابل مشكلة انها هاتكون حمل وعبء علي الدينامو لانه مطالب بشحن كمية اكبر مما يؤدي الي تقليل العمر الافتراضي للدينامو وثانيا البطاريا نفسها هاتبوظ بعد فترة لانك مش هاتستخدم الكمية المشحونة كلها
الموضوع نسبي الا لو انت بتشغل انوار وعدة صوت كتير مثلا

[Batman372]

اصل انا في واحد قالى ممكن تبوظلك فيوزات او حساسات في العربية ... خليك دايما في اللي زي اللي في الكتالوج

هى مش حتبوظ حاجه ... اطمان
و الصح انك تلتزم بحجم بطاريه العربيه الاصلى
التغيير للاكبر ان الدينامو حياخد وقت اطول فى شحنها. و طبعا مع الوقت حيقل عمره لانه مصمم لشحن ال ٥٥
من ٥٥ الى ٧٠ ... الفرق قريب
لكن من ٤٥ الى ٧٠ ... الفرق كبير ...
ايضا كحسبه تكلفه مقابل العمر ... تقريبا واحد ...
تحياتى ...

[sinkort]

الف شكر :)

طيب انا بالنسبالي عندى شاشة مرايا و كاميرا و مخادع دي في دى و زينون شبورة و كاسيت و سماعتين (و هركب زيرو باور و هزودهم يبقوا اربعة قريب ان شاء الله)

هحتاج اكبر مقاس البطارية من 55 لحاجة تانية و لا كده تمام ؟؟

[Batman372]

الف شكر :)

طيب انا بالنسبالي عندى شاشة مرايا و كاميرا و مخادع دي في دى و زينون شبورة و كاسيت و سماعتين (و هركب زيرو باور و هزودهم يبقوا اربعة قريب ان شاء الله)

هحتاج اكبر مقاس البطارية من 55 لحاجة تانية و لا كده تمام ؟؟

طول لما العربيه دايره ... مفيش اى مشكله مع اى حجم للبطاريه ( حتى لو مفيش بطاريه اصلا :) ) ...لان فى الحاله دى الدينامو هو الى بيشتغل فقط و البطاريه بتتقلب شحن ...
لو بتشغل كل ده و العربيه واقفه (مش دايره) يبقى لو ركبت اكبر ... حتطول مده التشغيل و البطاريه مش حتفضى بسرعه ...
لكن الافضل و الصح لك تركيب الاصلى ال ٥٥ كفايه جدا للمحافظه على عمر الدينامو الى هو بتمن ١٢ بطاريه :)
تحياتى ...

[Eng.Omar_karem]

الموضوع ده الناس مش متفقة عليه وفيه رأين ..

الاول ان فعلا لو البطارية اكبر من الاصليه بتاعت العربية ده هيأثر على عمر الدينامو وهيكون حمل اكبر عليه وهيبوظ بسرعة!!

والتاني بيقول ان مافيش اى تأثير على الدينامو لان ببساطة طول ما العربية شغالة الدينامو هو كمان شغال وبيشحن البطارية !! اللي بيحدد الشحن اللي داخل على البطارية هو كتاوت الشحن بمجرد البطارية ما تخلص شحن الكتاوت بيفصل ..لكن الدينامو في جميع الاحوال شغال وبيطلع شحن وبيشغل كل حاجة فى العربية وهى دايرة وفى الحالة دي مافيش حاجة اسمها ان البطارية الاكبر هتأثر على الدينامو عشان هتستهلك شحن اكبر لانه هو اصلا شغال طول ما العربية دايرة واللي بيحدد الشحن اللي داخل ع البطارية هو كتاوت الشحن

و عن نفسي انا مقتنع بالرأى التاني اكتر ان الدينامو مش هيتأثر بحاجة .. وبرضو الله واعلم :)

[sinkort]

الف شكر يا جماعة لكم جميعا :-)

[Mecha]

ادي ناس مش بس كبروا البطاريه لاوحطوا اتنين علي نفس الدينمو.البطاريه الكبيرة تريح الدينمو اعتبرها زي تنك الكمبرسور .مخزن كبير بيدي والدينمو يشحن براحته .لكن لو صغير الدينمو متحمل عالي عشان يغطي

[م أحمد]

كتاوت الشحن وظيفته تثبيت الجهد الخارج من الدينامو بحيث لا يكون فيه تغييرات وخشانة فى موجة الكهرباء لان دا مضر بألواح البطارية و ليس من وظيفته تثبيت امبير

الامبير .ساعة ( الشحنة) المسحوب من البطارية يتوقف على حمل البطارية و هو فى هذه الحالة المارش

الامبير .ساعة ( الشحنة) المسحوب من البطارية ال 45 هو نفسه بتاع ال 70

و لكن اعادة الشحن نفسها غير متساوية لنفس الحمل

النسبة بين اعادة الشحن كأمبير للبطارية ال 45 و ال 70 هتلاقيها زى ما تقيد الكشفات الامامية مثلا

الدينامو مصمم لشحن البطارية و تغذية الكشافات الامامية و الخلفية و الجانبية و الكاسيت بسماعاته و انوار الابواب و موبية الكهربا و مروحة التبريد و مراوح التكييف

الخلاصة : عمر أطول للبطارية بلا تأثير ملحوظ على الدينامو مع تكلفة نتيجة فرق السعر بين البطاريتين

[sinkort]

كتاوت الشحن وظيفته تثبيت الجهد الخارج من الدينامو بحيث لا يكون فيه تغييرات وخشانة فى موجة الكهرباء لان دا مضر بألواح البطارية و ليس من وظيفته تثبيت امبير

الامبير .ساعة ( الشحنة) المسحوب من البطارية يتوقف على حمل البطارية و هو فى هذه الحالة المارش

الامبير .ساعة ( الشحنة) المسحوب من البطارية ال 45 هو نفسه بتاع ال 70

و لكن اعادة الشحن نفسها غير متساوية لنفس الحمل

النسبة بين اعادة الشحن كأمبير للبطارية ال 45 و ال 70 هتلاقيها زى ما تقيد الكشفات الامامية مثلا

الدينامو مصمم لشحن البطارية و تغذية الكشافات الامامية و الخلفية و الجانبية و الكاسيت بسماعاته و انوار الابواب و موبية الكهربا و مروحة التبريد و مراوح التكييف

الخلاصة : عمر أطول للبطارية بلا تأثير ملحوظ على الدينامو مع تكلفة نتيجة فرق السعر بين البطاريتين

معني كلام حضرتك ... انه مالهاش لازمة اكبر الامبير ؟؟ خاليني في ال 55 العادية

ادي ناس مش بس كبروا البطاريه لاوحطوا اتنين علي نفس الدينمو.البطاريه الكبيرة تريح الدينمو اعتبرها زي تنك الكمبرسور .مخزن كبير بيدي والدينمو يشحن براحته .لكن لو صغير الدينمو متحمل عالي عشان يغطي

تمام يا باشا :)

[sama_Sama]

كبر البطارية براحتك ده أفضل بس طبعا أغلى
مافيش تأثير لا على دينامو ولا على فيوزات ولا على أي دواير أو ميكانيكا
بالعكس هتديك باور أعلى لكشافات أو سماعات أو حتى ال سي دي أو الدي في دي أو شاشات داخليه

[pepo2011]

لا ياباشا كبر البطارية 70 مفيش مشكلة
وبالتوفيق وتوكل علي الله

[sinkort]

الف شكر ليكوا يا جماعة