تخزين البطارية

[Ayman Hussam]

السلام عليكم
ازيكم يا أجمل منتدى
انا حصل معايا موقف يارب ميحصلش مع حد
امبارح نسيت النور الواطي شغال ورحت الشغل وطبعا على ما رجعت لقيت البطاريه نايمة واللمبة لونها اسود بتاعت البطاريه
لقيت واحد بتاع بطاريات جبته عشان يبص عليها
راح جاب بطاريه ووصلها وقالي دور العربيه مدارتش
قالي البطريه باظت والمشكله انها لسه في الضمان
قولتله طيب الحل؟ قالي هات واحده جديده
فعلا جبت واحده جديده ب 500 جنيه ومرضيتش اديله القديمة وحطيتها في شنطة العربية
النهارده الصبح وانا نازل بصيت على لمبة البطرية القديمة لقيتها رجعت خضرة تاني
بس انا مش عارف هل كده البطرية فيها شحن وسليمة ولا ايه؟
ولو هيا سليمة وفيها شحن هل في طريقة لتخزينها ؟ بحيث اخليها عندي ولا ابيعها؟
ولو بعتها هتجيب كام؟
معلش طولت عليهم
شكرا

[Abo_Mazen]

جرب توصلها على العربية عادي ..وخد وصلة من عربية تانيه ودور العربية ..أكيد بإذن الله هتدور ..خدلك لفه كده بتاع نص ساعة أو ساعة ..وبطل ودور هتلاقيها دارت ..هو سؤال بس ..بتاع البطاريات لما جه بص عليها ..ولقي العدسه سودا ..مخطرش على باله خالص ياخد وصله من عربية تانيه ويخلي الدينامو بتاع العربية يشحنها ويشوف هيبقى إيه نظامها ؟؟؟..هو غريب بصراحه حكاية إنه نصحك إنك تغير بطارية وش كده ..خلي بالك أنا العدسات بتاعة البطاريات دي ما بتدخلش دماغي بشلن ..كان معايا بطارية قطعت مياه ونور فجأة وغيرتها وكانت العدسه بتاعتها خضرا زي عود الخس ..ولما سألت بتاع البطاريات قالي العدسات دي ممكن تهجص معاك ..بس عشان تحكم على البطارية اللي حصلت فيها المشكلة هي سليمة ولا لأ ..إعمل زي ما قولتلك الأول وشوف كده

[Ayman Hussam]

شكرا يا باشا
وان شاء الله هجرب الطريقة الى انت قولت عليها بس لو اشتغلت هيبقى ايه الحل؟ هينفع اشيلها احتياطي؟
هو بتاع البطريات جاب بطرية تانيه من عنده عشان معندوش عربية ووصلها بالكابلات على البطرية القديمة وهيا راكبه في عربيتي قبل ما يغيرها وقالي دور العربية
ف العربية مدارتش
راح جايب جهاز قياس ولما بحطة على البطرية القديمة الجهاز مش بيقرى حاجه خالص
عشان كده هو قالي البطرية دي باظت

[amr011111]

طالما قرى بالجهاز خلاص يبقى فعلاً باظت
بس الافضل انها كانت تتشحن الاول على التونجر

[Mecha]

اي بطاريه في غيبوبه لو ادتها لقطه مش هتقوم ,لازم تسيبها حبه وتعلي سلانسيه الاتومبيل اللي بتاخد منو . انا احيانا كنت بديها 24v عشان تفوق من الغيبوبه .تو ما دارت خدها علي طريق سريع وافتح .او قعدها علي تونجر مظبوط ليله.

[Ayman Hussam]

شكرا على لكم جميعا على التعليقات الى فعلا افادتني
وانا النهارده ان شاء الله هوديها لواحد يكشف عليها ويشوف اذا فعلا باظت ولا لأ

[carrier]

ولو بعتها هتجيب كام؟

ممكن رقمك عالخاص اكلمك لو تكرمت
وشكرا

[Ayman Hussam]

شكرا لكم جميعا على تعاونكم سواء بالمشورة او الناس الى بعتتلي عشان تشتريها مني
لكن للاسف انا كشفت عليها لقيتها باظت
الحمد لله