لمبة البطارية

[wael abbass]

لمبة البطارية عندي بتفضل منورة علي طول وانا مهدي السرعة متطفيش اللا وانا علي سرعة اعلي من 40ك هل هذا طبيعي
العربية 128

[eng_mkhalaf]

أبقى شيك على شحن الدينامو - لأنة كدة شكلة عايز يتلف

[Adham]

دينامو العربية وحش

شوف الشاربون و المخدات (الملفات) و الأول اتأكد ان السير مشدود كويس بالذات لو السير بيصفر

و شيك عالكتاوت بالمرة

[sab3aawy]

ده عيب دينامو : ممكن يكون الكتاوت او قاعدة السيليكونات او الشاربون بايظ، وممكن تكون البوبينة شايطة، كل ده هيعرفه الكهربائى، ودى الدينامو لكهربائى يشوفهولك

[wael abbass]

هو فعلا قاعدة السيلكونات باظت فالكهربائي قلي دة جديدة بمائة جنية هل هذا صحيح واقترح علية وحدة استيراد فاي رايكم

[Adham]

لا طبعا روح لكهربائي غيرة دة عاوز يشتغلك و يبيعلك دينامو من عندة هوة مضبطة

السيليكونات رخيصة على ما اذكر اني من سنين طويلة غيرتها في عربية شيروكو, خليت الكهربائي فك و رحت اشتريت زيها جديدة ب 6 جنية :P

و الله اعلم

[wael abbass]

معلش انا عاوز اتاكد هل تقصد القاعدة كلها لان عندي فعلا القاعدة كلها باظت ودية عربية 128 فلو كدة هروح امسك في خنائة بصراحة دة قلي التركي 100جنية و الصيني 80جنية

[Adham]

والله مش عارف بس اللي اعرفة ان الدينامو كلة استيراد بتاع ال28 مش ب 100 جنية اصلا او حواليها

اسأل حد تاني تكون واثق فية

[Adham]

متهيألي أستاذ سبعاوي ممكن يفيدنا قوي بالمشورة في سعر قاعده السليكونات بتاعه ال 128 او سعر الدينامو الاستيراد

هاه ياباشا أفيد أخونا الليص بالدينامو أفادك الله

[wael abbass]

يا باشمهندس سبعاوي ارجوا المساعدة

[sab3aawy]

للأمانة والتاريخ انا اشتريت قاعدة سيليكونات ل 128 من 8 سنوات ب 45 جنيه ، فغالبا ممكن فعلا تكون قربت من ال 100

آخر دينامو استعمال جبته كان بتاع سيات 133 وكان فى حدود 120 جنيه وبرضه من سنوات عديدة، بس انا اشتريت مارش ريجاتا قريبا ب 160 جنيه وعادة المرش والدينامو بيكونوا فى نفس الفئة السعرية

[أبوسيف]

ريح دماغك من الدينامو دة خالص وهاتلك واحد إستيراد بس على التجربة ويكون بتاع ريجاتا أو شاهين وخد معاك كهربائى كويس وانت بتشتريه ، هايعمله من 120-150 تقريبا ، وماتوجعش دماغك بتصليح الدينامو. أنا كان عندى نفس المشكلة دة أيام ما كان معايا ال 128 ورحت للكهربائى غيرلى الكتاوت وفضلت اللمبة برده منورة ، بعدها غيرلى البوبينة والقاعدة وبرده فضلت زى ماهى ، يعنى صرفت ثمن دينامو والمشكلة فضلت برده موجودة ، تفضل لمبة الدينامو منورة على السلانسيه وما تطفيش الا لما ازود بنزين.

[ezshereef]

أنا كان عندى نفس المشكلة دة أيام ما كان معايا ال 128 ورحت للكهربائى غيرلى الكتاوت وفضلت اللمبة برده منورة ، بعدها غيرلى البوبينة والقاعدة وبرده فضلت زى ماهى ، يعنى صرفت ثمن دينامو والمشكلة فضلت برده موجودة ، تفضل لمبة الدينامو منورة على السلانسيه وما تطفيش الا لما ازود بنزين.

أنا كان عندي نفس المشكلة بردو و حاولت زيك لحد ما تفتق ذهن الكهربائي لحاجة وهي إن السلك اللي بيوصل كهربا من البطارية لملف الدينامو ممكن يكون قدم و مش بيوصل كويس. جرب تغير السلك ده بواحد جديد و أتخن من اللي عندك إن شاء الله المشكلة تتحل. هي إتحلت عندي كده و ده مايتكلفش 10 جنيه بالكتير