فتيس البيجو 301 اتوماتيك موديل 2015

[sherif_ali]

استفسار عن زيت الفتيس بتاع البيجو 301 الاوتوماتيك موديل 2015
العربية برة الضمان وعاملة 30 الف كيلو ... هل محتاج اغير زيت الفتيس ؟
وهل فعلا في نوع من الفتيس الاوتوماتيك مبيتغيرش لية الزيت بمعني ان الفيتس زيتة مقفول علية ومبتغيرش ؟
ومين احسن واحد يغير زيت الفتيس بتاع بيجو في دائر مصر الجديدة ومدينة نصر ... وياريت يكون مركز متخصص

[borio1704]

مرجعك الأساسي في نوع الزيت ومواعيد تغييره هو كتالوج العربية.. ارجعله..

غالبا هيكون عندك كتالوجين.. واحد اسمه دليل المالك أو كتيب الاستخدام... والتاني اسمه كتيب الصيانة

التاني ده هو اللي فيه أنواع الزيوت والسوائل .. وكمان جدول الصيانة الوقائية للعربية..


حضرتك هتعرف إيه الزيت المطلوب من الكتالوج (غالبا له كود أو مواصفة محددة).. وبعد كده تقدر تشتري أي زيت من أي ماركة عليه نفس الكود... مش شرط يكون بتاع بيجو مخصوص.. ولو إني في الفتيس بالذات بفضّل استخدام الزيوت الأصلية..

بس لازم حضرتك تعرف الكود بردو علشان ممكن يكون فيه أكتر من نوع زيوت بتوع بيجو.. فعلى الأقل تقدر تعرف إذا كان الزيت اللي اشتريته ده بتاعها ولا بتاع عربية بيجو/سيتروين تانية.


بالنسبة لموعد تغيير الزيت..

في العادة .. الزيوت بتتغير حسب أسلوب استخدامك ... وغالبا الكتالوج بيحط طريقتين للاستخدام.. استخدام عادي و استخدام شاق..

في أغلب الأحوال.. الاستخدام العادي بيحط مسافات طويلة لتغيير السوائل والزيوت.. إنما الاستخدام الشاق بيقصر العمر بتاعها وغالبا الكتالوج بينزله للنص تقريبا...

القاعدة إن أي استخدام العربيات في الشرق الأوسط بالكامل يعتبر استخدام شاق لطبيعة الجو والشوارع..


بالنسبة لزيوت الفتيس...

زمان كانت زيوت الفتيس بتتغير على مسافات قصيرة نظرا لطبيعة الزيوت في وقتها وطبيعة تصميم الفتيس الأوتوماتيك.. دلوقتي الدنيا اتغيرت.. فبقت الزيوت بتعيش مسافات أطول..

عموما.. أي زيوت أو سوائل في العربية مكتوب إن عمرها Lifetime أو "من عمر العربية" هي في الواقع لا يزيد عمرها عن 200 ألف كيلومتر بأي حال من الأحوال.

طيب ليه بيقولوا إنها ما بتتغيرش؟؟؟

لازم نفهم إن متوسط عمر السيارة في البلاد المتقدمة بيكون حوالي 7 سنوات... وبناء على الكلام ده.. فعداد الكيلومترات مش متوقع يعدي 150 ألف كيلومتر.. باعتبار إن معدل المشي بالعربية بيبقى حوالي 20 ألف كيلومتر سنويا

زيوت الفتيس الحديثة عمرها بيبقى حوالي 150-200 ألف كيلومتر .. ده في الأحوال اللي بيسموها في الكتالوج (عادية).. إنما هي في الحقيقة بتبقى أحوال (مثالية).. بتستخدم فيها العربية بدون تحميل حقيقي وفي أجواء ربيعية وشوارع مسفلتة ومفيش زحام..

إنما في أحوال الاستخدام الشاق (اللي كلنا عايشينها في الشرق الأوسط).. فعمر الزيت بينزل للنص.. يعني بنتكلم عن 75-100 ألف كيلومتر..

من الكلام ده نقدر نقول إن الكتالوج لما يقول إن الزيت عمره من عمر العربية .. فده بناء على إن العربية أصلا عمرها 7 سنوات وعدادها مش حيعدي الـ150 ألف .. ده لو بتستخدم العربية استخدام بسيط...

إنما فكرة إن زيت فتيس ما بيتغيرش... الكلام ده طبعا مش مضبوط... والتغيير يتم في بلادنا على 75-100 ألف كيلومتر على أقصى تقدير.


...

[akmm]

ونعم التعليق الفني المقنع ...تحياتى .