زيت الفيتيس

[PAYOO]

يا جماعه الزيوت والشحوم هي الروح التي تحيي أي آله في الدنيا
وأهمية تغيير ومتابعة حالة الزيت من أهم الأشياء الواجب الأعتناء بها
وأنا فعلا كلامي كان على الفتيس العاده (عشان كده أنا قلت 35ألف كيلو) لكن لو الفتيسش أوتوماتيك يبقى لازم تغيير الزيت كل 10ألاف كم وزي ما قال أخونا "أدهم" أن الفتيس الأوتوماتيك معقد جدا في تكوينه لذلك يجب مراعاة الفتيس الأوتوماتيك رعايه فائقة لكلي لا يتلف

[Abdallah]

النهاردة غيرت الزيت لتانى مرة فى خلال يومين, وطبعا دة مش كتر فلوس ولكن هقولكوا الموضوع من الاول علشان تفهموا قصدى كويس...

الاول بما انى جايب العربية مستوردة ومستعملة استعمال خارج فاول ما جبتها كشفت على زيت الفتيس ولقيت الصنايعى بيقولى الزيت مظبوط واوعى تغيره علشان دة زيت الفابريكة وشوية كلام من الاونطة دوول وطبعا مشيت وقعد شهرين كدة ورجعتله تانى وجايب معايا جركن زيت فتيس موبيل 85 , المهم بدون نقاش قلتله نزلى الزيت وحط دة وقد كان وفوجئت ان الكمية الى نزلت حوالى لتر واحد فقط والمفروض العربية بيبقى فيها 2.75 لتر يعنى هتقولى فى 0.5 لتر منزلش يبقى فى لتر وربع ناقص معنى كدة ان الزيت كان ناقص مع انه هو نفسه قالى انه مظبوط, المهم حمدرت ربنا وحطيت الزيت ومشيت وخلصت مشاوير وركنت العربية .
تانى يوم جيت امشى لقيت الفتيس تقيل وبيعض قمت واخد بعضى ورحتله قالى الزيت تقيل والفتيس عايز زيت خفيف شوية , طيب يا شيخ والحل, قالى هننزله ونحط زيت باور, طيب يا عم ازاى مينفعش, لقيته جايبلى الزيت الى غيرهولى ببص عليه لقيته خفيف فعلا مش لزج زى ال 85 وغير كدة لونه محمر ولو انه فيه سواد طبعا من الاستعمال, طبعا انا كان دمى محروق اساسا من جركن الزيت ابو 75 جنيه الى ملحقتش اتهنى بيه ورحت جبت لترين زيت باور وقلتله لو منفعش هتدفع حقهم ( معلش اصلى حقانى :mrgreen: ) المهم حط الزيت وزودلى شوية كانوا معايا وحطينا حوالى 2.50 لتر وجيت اجرب العربية لقيت الفتيس رجع تانى كويس جدا وانا مبقتش مصدق الى حصل دة وحتى الان مش مصدق
ازاى زيت فتيس اوتوماتيك يتحط فى فتيس مانوال وزيت المانوال مينفعش ؟؟؟؟
سؤال يا ريت حد له خبرة فى الموضوع دة يقولى لانها اول مرة تحصل معايا وللعلم العربية لانوس موديل 99 .

[Adham]

دة كلام غريب جدا و اعتقد انة خطر عالفيتيس لان زيت الباور خفيف جدا وغير مقاوم للاحتكاك و ممكن يسبب تآكل للتروس في الفتيس المانيوال

انا رأيي سيبك من الميكانيكي دة و روح لمركز خدمة محترم ان ماكانش توكيل يعني

[MMamdouh]

انا عملت القصة دى قبل كدة و فعلا لقيت الفتيس بقى ناعم جدا... لما سالت اصحابى على فورم daewootech قالوا ان دة خطر جدا لان خواص زيت الباور مختلفة تماما عن زيت الفتيس

http://www.daewootech.com/forum/viewtopic.php?t=4906

لما ظهر عندى صوت فى الفتيس الميكانيكى قاللى على الفكرة دى فا قلت اجرب و اشوف ايه النظام بس الموضوع مكنش ظريف

http://www.daewootech.com/forum/viewtopic.php?t=5025

دا غير انى حرقت مرة على الرابع لحد 150 كيلو و بعديها الفتيس مرضاش ياخد اى نقلة لمدة نص دقيقة و بعدين اشتغل عادى... طبعا بعدها فضيت زيت الباور و حطيت زيت فتيس

حط زيت فتيس من محطات BP اللتر ب 9.5 و درجة لزوجتة كويسة و اخف من موبيل

MMamdouh

[Abdallah]

انا الزيت الى حطيته زيت فتيس اوتوماتيك مش زيت باور ولكن الصنايعية بيسموه زيت باور.

[Adham]

زيت الفتيس الأوتوماتيك هو زيت الباور
هو نفس الزيت
و أسمه زيت ATF
إختصاراً لAUTOMATIC TRANSMISSION FLUID
لكن مافيش حاجة اسمها زيت باور غير زيت الفتيس الاوتوماتيك , هما الاتنين واحد, اسمة زيت هيدروليك

[Abonora]

( انا بسئل عن المانيول )

طيب يا جماعة الارقام W80 و 90 ديه تدل علي الزوجة ولا علي ايه لأن في المانيوال عندى مكتوب 80 بس لما جيت اغير بعد ال10.000 كم الاولي (لاني مكنتش واثق في زيت المصنع وبالفعل كان مليان شوائب) جبت زيت موبيل 90 وده بناء علي نصيحة من مدير ورشة كيا ( وليد توفيق)

يعني عشان احط زيت عادى بس بلزوجة عاليه ( خفيف ) احط ايه 80 ولا 90 وافضل الانواع المجربة ايه عشان انا مبقيتش اثق في موبيل

[Adham]

الرقم يدل على درجة كثافة الزيت

يعني ال 90 اخف من ال140

وبالتالي ال 80 اخفهم بس غير موجود في مصر

و ال 140 يستعمل بخاصة في العربيات ال 4*4 او النص نقل او للفتيسات التي بها تآكل كبير يسبب ضجة و صوت اثناء التشغيل

[Abdallah]

طيب انا حطيت زيت 85 للفتيس وكان تقيل عليه المفروض يبقى ايه الحل دلوقتى؟؟؟
انا عايز انزل زيت الباور دة واحط زيت فتيس , احط انه نوع.؟؟؟؟
المتوافر عندى حاليا توتال وموبيل والتعاون.

[Adham]

ضروري جدا انك تفضي زيت الباور من الفتيس بأقصى سرعه قبل ما يحصل اي ضرر للفتيس لأنة ممكن يسبب تآكل للتروس و يبوظ الفتيس

و دور على زيت 80 ماعرفش فعلا ان كان موجود في السوق وللا لأ
اصل انا عندي ال3 عربيات اوتوماتيك
وحتى الفرونتيرا الجيب بتاخد زيت 140 في الكرونة فا فعلا ماعرفش ان كان فية زيوت فتيس 80 خفيفة في السوق او تلاقسها فسن

دور في الحتت النضيفة زي الماركت اللي بيبيع اكسسوارات عربيات او ارابكوم او شارع دمشق و التوفيقية او الماركت اللي في محطات البنزين اللي زي عند الوطنية وغيرها وربنا يوفقك بس ابقى قول لنا لقيت ايو و فين وبكام علشان اي حد تاني بيدور يعرف و يستفيد من تجربتك

تحياتي

[ahmed azab]

اونواع الزيوت

زيوت الفتيس الاصل فيها انه يتم تزويدها نادرا التغير لانه بطبيعة الحال غير معرض للاحتراق لان وظيفته دعم وتسهيل الحركة بين التروس وهناك عدة درجات من زيت الفلفلين 80-85-90-120 وده بيكون علي حسب كسافته ودرجة لزوجته واتقلهم 120 وينصح به في الصناديق القديمة وحاليا في مصر ان كل انواع الزيوت مش تمام زي مالحظت لان قبل كده اناغيرته كتير وكان السبب اني كنت اول ماادور العربية الصبح خصوصا الصبح في الشتا بسمع صوت نحر في الفتيس لحد مالعربية تسخن وبعد كده عادي جداا الصوت بيروح واتأكدت ان هو الزيت اللي مش تمام لما ركبت عربية تاني ولقيت نفس الصوت بالضبط يعني الفتيس مش عطلان الكلام ده بالنسبة للزيوت في المنيوال اما الاتوماتيك بيتحطله زيت زيت باور لأنه شغال علي ارب وطريقة شغله غير المنيوال [img][/img]

[sherif_84]

ممكن بس حد يقولى أفضل نوع زيت فتيس يعنى شل أحسن ولا موبيل ؟
ولو شل أحسن ممكن سعره فى حدود كام
وشكـــرا

[Adham]

بالنسبة لزيت الفتيس الاوتوماتيك هات زيت شل اللي بنزل في علبة بلاستيك سوداء عبوة كيلو عليها تكت اخضرو صناعه كندا دة اضمن واحسن زيت اوتوماتيك في السوق
بس هوة غالي شوية ب 17 جنية الكيلو
بس ارحم ما يبوظ الفتيس

[Abdallah]

النهاردة رحت نزلت الزيت وحطيت مكانه زيت توتال وبالطبع نظرا لان مركز الصيانة دة غالى شوية فحطلى اللتر بـ 15 جنيه :twisted: , عموما الحمدلله انى غيرته وخلصت من الموضوع دة , نسيت اقول انى فكيت الكارتيترة ونظفتها وعملتلها جوان جديد زيادة احتياط يعنى.

[Adham]

كارتيرة !!!!

الفتيس المانيوال اصلا مالوش كارتيرة ؟؟

انت قصدك كارتيرة زيت الموتور مش الفتيس !!!