نقص زيت الموتور

[mahmoudbadr]

أرجو من خبراء المنتدى الكرام الافادة فى هذه المشكلة الكبيرة

الزيت عندى بينقص بمعدل 2 لتر كل 3000 كيلو متر

كان فيه دخنة بتطلع من الجكمان (بيضاء) فى أول الدوارة و بعدين مشوار صغير بتروح

رحت للميكانيكى قال لى ان دى بخار مياة مش دخنة

فكيت البوجيهات لقيت تعريق بسيط على سن القلاووظ بتاع 2 بوجيه منهم بس مش على سن الاشعالو الميكانيكى قال لى ده ممكن يكون عادى

المهم الميكانيكى نصحنى بالاتى:

نضبط مستوى الزيت و نمشى فى داخل البلد و نحسب استهلاك الزيت

و نضبط و نحسب الاستهلاك فى السفر

لو بتستهلك فى السفر يبقى شنبر زيت و لو داخل البلد يبقة كاوتش صباب

هل الكلام دة صحيح أم لا

و ازاى أعرف استهلاك الزيت دة منين ( مش عايز ميكانيكى يحط ايدة قبل ما نكون بالتقريب حددنا العيب )

آسف على الاطالة و شكرا

العربية دايو اسبيرو 1994 مانيوال
فلتر الهوا جديد و فلتر بنزين بردة من 3 شهور
البوجيهات طالعة نضيفة
دورة التبريد مغسولة من شهر و العربية مش بتسخن
سحب العربةو كويس

[romeo_6887]

ممكن يكون جوان التاكيهات محتاج يتغير
بس هل الزيت مطحن و لا لونه طبيعي
و ايه اخبار ميه التبريد ؟
و طالما السحب كويس
يبقي غالبا طقم الشنبر سليم

[ابوهاشم]

تابع العربيه بنفسك من عند الموتور
ربما يكون حاجه بتسرب
طبة الزيت او قاعدة الفلتر او جوان الكارتيره
او جوان التاكيهات
وكمان بص تحت العربيه بعد الركنه شوف فى زيت تحتها

[SAMEH_FOUAD]

اولا مش هتفرق اذا كنت على طريق سفر او داخل البلد
شوف جرب كدة زود بنزين شوية والعربية متمورة وشوف فية دخان هيطلع ولا لأ
وانت بتقول ان فية دخان بيطلع مع الدوارة يبقى كدة كاوتش صمام وطبعا كافى انة يهرب زيت بس مش بالمعدل اللى حضرتك كاتبة دة

[sab3aawy]

الأعراض اللى انت بتتكلم عليها دى تشير باصابع الاتهام الى كاوتش الصباب، هو اللى بيسبب الدخنة البيضاء لساعة الدوراة اللى بتروح بعد كدة

بص انا شايف الأتى

1- اغسل المحرك فوق وتحت
2- غير الزيت وقيس مستوى الزيت الجديد(يقاس بعد ما تغير الزيت وتعمل مشوار بالعربية وبعدين تركنها لمدة ساعتيم على الأقل)
3- تابع حدوث تسربات من عند الجوانات(وش التاكيهات، وش السلندر، الكارتيرة، الطبة،فلتر الزيت، الكانتينة، طرمبة البنزين...الخ)
4- قيس الزيت بعد 1500 كيلومتر وقم بتزويد الزيت حتى الوصول لنفس قياس الزيت عند الغيار وملاحظة الكمية التى استخدمتها للتزويد من واقع العلامات على جركن الزيت

والآن

1- اول حاجة لو فيه زيت مسيل(مش معرق) من عند جوان ما غير هذا الجوان وقم باعادة التجربة
2- ثانية، لو ما فيش تسييل وفيه نقص، او لو بعد اصلاح الجوانات لسة فيه نقص يبقى نبص على خرطوم الفايض والعربية دايرة وسخنة، لو رادم الدنيا بخار يبقى الشنبر تعبان وهنفك الموتور، لو مش رادم الدنيا بخار يبقى ناخد العربية المحطة ونقس الكبس، لو الكبس اقل من 70% يبقى برضه الشنبر مسئول ويتم فك الموتور وعمل شنبر وصباب لو احتاج الأمر، اما لو كبس الموتور اكثر من 70& يبقى المتهم الواحيد فى هذة الحالة هو كاوتش الصباب ويجب تغييره، وهو مسألة اصلاحها غير معقد وويستغرق نصف يوم الى يوم من العمل بحسب زحام الورشة ومبلغ فى حدود 100 -150جنيه بالمصنعيات

[mahmoudbadr]

ألف شكر اخبرائنا الكرام

بالنسبة لترشيح الزيت من الجوانات مفيش (بس هل فيه جوانات أنا معرفش أوصل لها بعينى من فوق )

لسة عامل جوان سيليكون للكارتير من شهريم و مغير الطبة و عامل لها سن جديد

ساعة الزيت كانت من شهر ضربت و جابت زيت من جواها تم تغييرها و مفيش منها تسريب

بالنسبة للدخان الأبيض أنا كنت بقول عليه دخان بس الميكانيكى قال لى انه بخار مش دخان ( وأنا برده متحفظ على كلامه ) لأن فى النهاية الزيت بينقص

إن شاء الله هشوف خرطوم الفايظ و باذن الله برده هأعمل بكل نصائحكم و ان شاء الله تكون بسيطة

[sobhysm]

الأعراض اللى انت بتتكلم عليها دى تشير باصابع الاتهام الى كاوتش الصباب، هو اللى بيسبب الدخنة البيضاء لساعة الدوراة اللى بتروح بعد كدة

بص انا شايف الأتى

1- اغسل المحرك فوق وتحت
2- غير الزيت وقيس مستوى الزيت الجديد(يقاس بعد ما تغير الزيت وتعمل مشوار بالعربية وبعدين تركنها لمدة ساعتيم على الأقل)
3- تابع حدوث تسربات من عند الجوانات(وش التاكيهات، وش السلندر، الكارتيرة، الطبة،فلتر الزيت، الكانتينة، طرمبة البنزين...الخ)
4- قيس الزيت بعد 1500 كيلومتر وقم بتزويد الزيت حتى الوصول لنفس قياس الزيت عند الغيار وملاحظة الكمية التى استخدمتها للتزويد من واقع العلامات على جركن الزيت

والآن

1- اول حاجة لو فيه زيت مسيل(مش معرق) من عند جوان ما غير هذا الجوان وقم باعادة التجربة
2- ثانية، لو ما فيش تسييل وفيه نقص، او لو بعد اصلاح الجوانات لسة فيه نقص يبقى نبص على خرطوم الفايض والعربية دايرة وسخنة، لو رادم الدنيا بخار يبقى الشنبر تعبان وهنفك الموتور، لو مش رادم الدنيا بخار يبقى ناخد العربية المحطة ونقس الكبس، لو الكبس اقل من 70% يبقى برضه الشنبر مسئول ويتم فك الموتور وعمل شنبر وصباب لو احتاج الأمر، اما لو كبس الموتور اكثر من 70& يبقى المتهم الواحيد فى هذة الحالة هو كاوتش الصباب ويجب تغييره، وهو مسألة اصلاحها غير معقد وويستغرق نصف يوم الى يوم من العمل بحسب زحام الورشة ومبلغ فى حدود 100 -150جنيه بالمصنعيات

كلامك مفيد جداً وجميل جداً يا باشمهندس سبعاوى

[mohamedkhalefa]

السلام عليكم الف شكر علي المعلومات الجميله ده - انا عندي نفس مشكلة نقص الزيت في سيارتي الفولكس ( بيتلز) الزيت علي 1000 كيلو بلاقيه حوالي نص كيلو وفيه تسريب زيت تحت العربية من عند مربع الكارتيرة لان الميكانيكي عمل خرطوم فايز من الفتحة اللي بنزود منها الزيت ونزل الخرطوم تحت العربية ياتري الزيت المتسرب ده من الخرطوم ولا من حاجه اخري وليه بينقص بالشكل ده رغم سحب السيارة كويس ومفيش دخان ومفيش تعريق زيت علي البوجيهات - افيدوني جزاكم الله خيرا

[AHMED1718]

أرجو من خبراء المنتدى الكرام الافادة فى هذه المشكلة الكبيرة

الزيت عندى بينقص بمعدل 2 لتر كل 3000 كيلو متر

كان فيه دخنة بتطلع من الجكمان (بيضاء) فى أول الدوارة و بعدين مشوار صغير بتروح

رحت للميكانيكى قال لى ان دى بخار مياة مش دخنة

فكيت البوجيهات لقيت تعريق بسيط على سن القلاووظ بتاع 2 بوجيه منهم بس مش على سن الاشعالو الميكانيكى قال لى ده ممكن يكون عادى

المهم الميكانيكى نصحنى بالاتى:

نضبط مستوى الزيت و نمشى فى داخل البلد و نحسب استهلاك الزيت

و نضبط و نحسب الاستهلاك فى السفر

لو بتستهلك فى السفر يبقى شنبر زيت و لو داخل البلد يبقة كاوتش صباب

هل الكلام دة صحيح أم لا

و ازاى أعرف استهلاك الزيت دة منين ( مش عايز ميكانيكى يحط ايدة قبل ما نكون بالتقريب حددنا العيب )

آسف على الاطالة و شكرا

العربية دايو اسبيرو 1994 مانيوال
فلتر الهوا جديد و فلتر بنزين بردة من 3 شهور
البوجيهات طالعة نضيفة
دورة التبريد مغسولة من شهر و العربية مش بتسخن
سحب العربةو كويس

انتا بتحط زيت ايه ؟
لو بتحط زيت الخمس الاف جرب حط زيت ال 3 بس وشوف النقص عامل ايه ؟
المواتير القديمة مينفعهاش الزيوت الخفيفة
وان شاء الله تبقا مشكلة بسيطة