لكل انواع سيارات نيـسان..نسب ومعلومات عن (زيوت الماتور-الفتيس-الفرامل-الباور-الفريون)

[Ahmed.TV]

اولا : زيت الماتور

* ينصح بضرورة تغيير زيت محرك السيارة من فترة لأخرى وفق العمر الافتراضى للزيت المستخدم، وذلك للحفاظ على ماكينة السيارة من التآكل والهلاك.

* فتغيير الزيت له أهمية كبيرة ، حيث يساعد على تبريد الموتور ، ويسهل احتكاك الأجزاء المتحركة داخل الموتور مثل (الكامات - التكهات - البساتم)، ويتم ذلك بتفريغ زيت الموتور القديم واستبداله بزيت جديد , بالإضافة إلى استبدال الفلتر آخر جديدا فى الوقت نفسه.

* كما أن هناك نوعين من الزيوت ..
- الأول زيت معدنى ويتم تغييره كل 3000 او 5000 كم ..
- وزيت صناعى"تخليقى"، ويتم تغييره من 15000:10000 كم .. وفق ظروف التشغيل فهو مزود بإضافات أكسدة، ونظافة، وثبات كيميائى، ولا يوجد له معامل احتكاك. ولذلك ينصح باستخدامه عن الزيت المعدنى

* كل زيت وله صلاحية ولزوجة ودرجة حرارة معينه والتغيير بيحافظ على الأجزاء الداخلية للقطع اللى بيتحرك فيها الزيوت وبيحميها من التآكل والصدأ
ولذلك لا يفضل ان يستمر الزيت فى المكنة لمدة اكثر من عام على الاكثر

* لا تضع زيوت مغشوشة أو رخيصة وضع الزيوت الأصلية لاجل الحفاظ على السيارة ولابد ان تكون الزيوت مطابقة للمواصفات العالمية .. واختار الزيت المناسب لسياراتك وفقا لما صرحت بيه شركة سياراتك

* واغلب سيارات نيسان اللزوجة المناسبة لها هى 5w 40 .. ووفقا الى مواصفات api اختار ال sm لسيارات نيسان او الsn الاحدث منه حاليا .. وهذه هى اعلى مواصفات الزيوت الحديثة التى وصلت اليها منظمة البترول الامريكية api

ملحوظة :-



* نيسان صنى n16 موديلات من 2001 الى الان

* نيسان صنى b14- b13 موديلات من 94 الى 2000 بتاخد كمية زيت 2.7 وبالفلتر 3لتر ...

* القاشقاى .. بتاخد 4:3

* نسب الزيت للمواتير اللى بتتعمر اكبر كما مذكور فى الجدول .. لان الماتور بيكون جديد خالص ومفهوش ولا نقطة زيت

صورة توضح شكل فلاتر نيسان الاصلية

* يجب تصفية الزيت الى اخره وبدون سرعة .. لازم يصفى الى الاخر .. ومتكنش العربية مايلة .. وتكون مرفوعة بكوريك تمساح والافضل الكوريك الثنائى عشان تصفى براحتها

* النقطة الاخرى واللى فى منتهى الاهمية وهى

يفضل استخدام قمع عند وضع الزيت بهذه الطريقة كما موضح فى الصورة ..

* عدم ملئ الماتور بالزيت اكثر من اللازم والمسوح بيه ..لان ذلك يسبب مشكلات فى الماتور نتيجة لوصول الزيت الى عمود الكرنك الذى يدور بسرعة الاف الدورات فى الدقيقة وحينما يصل اليه الزيت يتحول الى رغوة وهذا يعنى انها لن تتكمن من ايصال الزيت الى الاجزاء التى تحتاج الى زيت

ثانيا : زيت الفتيس

* زيت الفتيس الاتوماتيك بيتم تغيره كل 40 الف كيلو ولما بتغيره بياخد 4 لتر ..

* زيت الفتيس المانيول مش بيتغير الا لو كان فى تسريب وبيتزود فقط .. وعند ال100 الف كيلو ممكن تغيره اذا كنت من هواه الحرق على االغيارات وبياخد 4 لتر

ملحوظة :

* لو كان فى مشكلة فى الفتيس وفكوا الكنترول فلف بتاعه وبيتحط زيت فى الفتيس من الاول وجديد بياخد من 7 الى 10 لتر .. ده فى حالة لو اتفك خالص

* ونوع الزيت المستخدم فى تغير الفتيس الاتوماتيك atf لكل عربيات نيسان او ما يعادله

* ونوع زيت الفتيس المانيول لنيسان صنى زيت لزوجته 75w 90 بمواصفات api = GL- 4

ثالثا : مياه الردياتير والقربة

* الردياتير اهم عنصرفى مكونات دورة التبريد .. وكل ما حافظت عليه فى صيانته وكان شغال بدون اى مشاكل .. بيعطى عمر اطول للماتور

* ولذلك يجيب تغير مياه الردياتير كل 40 الف كيلو للعربيات الاتوماتيك والمانيول .. للمحافظة على الردياتير من اى عوامل صدا

* ويتم تغيره بمياه خضرا وحالة نقصان مياه القربة يتم تزويد مياه الردياتير من خلال قربة الردياتير حتى مستوى العلامة العليا بها،
ولاحظ أن منسوب المياه في قربة الردياتير يزداد وينقص تلقائياُ تبعاُ لحالةالماتور فهي تزيد والماتور سخن و تنقص عند برودة الماتور، بسبب زيادة الضغط و الخلخلة التي تحدث بالردياتير أثناء السخونة و البرودة

* وهناك نوعين من المياه .. مياه خضرا .. ومياه حمرا .. والاتنين وظيفتهم واحدة .. الحماية من الصدأ والتآكل وتبريد الماتور من السخونة

ملحوظة :-


* مواصفات مياه التبريد التى يجب وضعها فى الردياتير ..

أولا: تبريد الأجزاء الساخنة بالمحرك.
ثانيا: منع الصدأ والتآكل لأجزاء المحرك.
ثالثا: منع التجميد فى درجات الحرارة المنخفضة فى البلاد الباردة وهذا غالبا لا ينطبق على مجتمعنا المصرى
رابعا : تركيز المياه فيها يكون 50% او 40%

* عند الوصول الى 80 الف كيلو او 100 الف كيلو يفضل تغير ترموستات الحرارة لان السوستة اللى فيها بتصدى بسبب المياه والاملاح .. بدل ما تعطل بشكل مفاجئ اثناء السير

رابعا : زيت الفرامل

* بيتم تغيره كل سنيتن او 40 الف كيلو وذلك لهذه الاسباب .. لان من خواص زيت الفرامل الصناعية ( الغير مرغوبة ) هو امتصاصه للرطوبة من الهواء المحيطبه ..
المشكلة التانية ان الرطوبة فى الاساس ميه... و المية بتسبب الصداء... الموضوع مش فارق اوى لو عربيتك مفيهاش ABS... لكن لو فيها ممكن ترسبات الصداء تعمل مشكلة مع بلوف نظام الABS و تسبب انسداد يعوق عمل النظام
بعد مرور اكثر من 18 شهر نسبة الرطوبة والميه تصبح 3% وهذه النسبة لوحدها كفيلة بتخفيض درجة غليان الزيت بنسبة 25% ومن هنا نجد مشاكل مع توقف السيارة

ملحوظة :-




* يفضل لما تغير تجيب زيت DOT4 و دة له درجة غليان اعلى من DOT3 المصرح بيه من نيسان لكل سياراتها عشان يعطيك امان اكتر .. او لو هناك زيت dot 5.1 حيكون افضل طبعا
ولكن مواصفاتهم كلهم تكون مكتوب عليها (fmvss no.116) لان دى المواصفات اللى صرحت بيها نيسان وقالت انها مناسبة لزيت فرامل سياراتها ..

* لابد من استخدام نوع زيت ثابت للسيارة اثناء تغيير زيت الفرامل منعا لحدوث مشاكل تنتج عن اختلاط انواع الزيوت المختلفة داخل علبة الفرامل.

* أهمية تغيير زيت الفرامل كل 40000 كيلو يؤدى للحفاظ على قوة الفرامل، وأيضا الجلود والمساطر والخراطيم الموجودة داخل دائرة الفرامل

خامسا : فريون التكيف

* معلومات عن اوازن الفريون فى سيارات نيسان

- الصنى بتاخد 450 جرام
- التيدا بتاخد 500 جرام
- الليفينا بتاخد 500 جرام
- البلوبيرد بتاخد 500 جرام
- الاكس تريل بتاخد 550 جرام
- القاشقاى بتاخد 500 جرام

* نوع الفريون المستخدم R134a

ملحوظة :-


* زيادة كبيرة عن هذه النسب تؤثر فى سحب العربية وبيقا فى حمل على الماتور .. والنقصان بزيادة كبيرة يوثر على اداء التكيف

* زيادة طفيفة او نقصان طفيف لايوجد بيها اى مشكلة

* لما تكون العربية وقفت فترة طويلة معرضة للشمس يجب بدء تشغيل العربية وقيادتها لعدة دقائق مع فتح نوافذها. وتشغيل التكيف على درجة تبريد متوسطة بسرعة كبيرة حتى يتم طرد الهواء السخن

سادسا : زيت الباور

* زيت الباور بفعل عامل الوقت في الخدمة والظعط يفقد خواصة التزييتية .. وما أن يفقد تلك الخواص تتحول مكوناته إلى شوائب تعمل على إنسداد خراطيم ( الباور ) ويفضل تغيره كل سنتين او ثلاثة

ملحوظة :-


* عند تزويده على الى المستوى ال low والعربية باردة .. عشان مع السخونية بيزيد وبيوصل الى المستوى high

* نوع الزيت المخصص عند تغيره والمسرح من نيسان هو dexron III or equivalent

فى النهاية

الموضوع ده اخد منى وقت طويل جدا فى جمع معلومات وبالاخص من التوكيل
فاتمنى ان المجهود يحوز على اعجابكم ويكون مفيد للجميع

وارجوا عند نقل الموضوع ذكر المصدر
وهو نايل موتورز قسم نيسان

تحياتى

اخوكم فى الله
احمد مصطفى

---------
مجهود متميز وموضوع اكثر من رائع

تم التثبيت بواسطتى

مشرف القسم

1ب

[zangry]

ربنا يباركلك .. موضوع ممتاز كلعاده منك ياباشا

[sarawe511]

استاذ احمد موضوعك مهم جدا و مفيد جدا و نرجو تثبيت الموضوع و جزاك الله خيرا

[Elshennawy]

السلام عليكم ورحمة الله وبركاته
الصراحه كده مش محتاج اسئل حد عن اي معلومات ولا افتح الكتالوج حتى
مجهود متميز دائما استاذي الفاضل
بارك الله لك وجزاك عنا خير الجزاء

[A.Saad]

موضوع جميل يا ابو حميد

بس ليا تعليق عليه وارجو التأكد من صحته

يفضل لما تغير تجيب زيت dot4 و دة له درجة غليان اعلى من dot3 المصرح بيه من نيسان لكل سياراتها عشان يعطيك امان اكتر .. او لو هناك زيت dot 5 حيكون افضل طبعا

زيت dot 5 لا يصلح للسيارات المستخدم معاها dot4 or 3
البديل ليه dot5.1
لان قاعدة ومكونات الزيت مختلفة بين 5 و 4 و 5.1
5.1 مماثل ل 4
5 مختلف عنهم

[zinger]

تسلم إيدك ياباشا ع الموضوع الرائع ده بجد الواحد عرف منه معلومات كتير ماكنش عارفها ربنا يباركلك ويجعله فى ميزان حسناتك

[fady_anis]

مجهود رائع

لك منى جزيل الشكر

الموضوع ده مهم جداً يا استاذ احمد

ياريت يبقى مثبت لأن فى ناس كتير اوى سألت قبل كده عن اجزاء من الموضوع

[emadnd]

موضوع كويس جدا"
بس هل ينفع استخدم النسب دي في الانسر البوما اتوماتيك 1600cc مو2008 ؟؟؟؟؟؟؟

[SonaSteel]

هو فيه كده ;)))
رووووعه يابني.... تسلم الايادي ماشاء الله
روح يابني الهي تكسب.... ربنا يجعلها في ميزان حسناتك يارب العالمين

[Youssef.Awad]

مجهود رائع منك ياابو حميد زى ما اتعودنا دايما
بس فيه مشكلة من حلاوة مواضيع القسم بقت المواضيع المتثبتة واخدة نص صفحة تقريبا وبعد كده مش هنلاقى مكان للمواضيع الجديدة فى اول صفحة ههههههههههههههههه

[sedyrohy]

مجهود رائع و جبار

بس يوجد سؤال
تيير زيت الفلامل و زيت الباور مش المفروض يتحط ضمن الصيانات الدوريه للسيارات بالتوكيل
يعني زيت الفلامل مثلا حضرتك موضح انه يفضل تغييره كل سنتين او 40 الف كيلو متر طيب مش بيتغير ليه مع الصيانه في توكيل نيسان

في انتظار المزيد
جزاك الله كل خير موضوع هااااااااااااااااااااااااايل

[Ahmed.TV]

ربنا يباركلك .. موضوع ممتاز كلعاده منك ياباشا

تسلم يا باشا .. على تقديرك الغالى

السلام عليكم ورحمة الله وبركاته
الصراحه كده مش محتاج اسئل حد عن اي معلومات ولا افتح الكتالوج حتى
مجهود متميز دائما استاذي الفاضل
بارك الله لك وجزاك عنا خير الجزاء

تسلم يا حبى .. وربنا يخليك يا محمد على شعورك وتقديرك وحبك الغالى من شخص غالى الى قلبى

تسلم إيدك ياباشا ع الموضوع الرائع ده بجد الواحد عرف منه معلومات كتير ماكنش عارفها ربنا يباركلك ويجعله فى ميزان حسناتك

العفو يا باشا ما هو ده الغرض والهدف من قسم نيسان الافادة للجميع
شاكر تقديرك الغالى

مجهود رائع

لك منى جزيل الشكر

الموضوع ده مهم جداً يا استاذ احمد

ياريت يبقى مثبت لأن فى ناس كتير اوى سألت قبل كده عن اجزاء من الموضوع

تسلم يا فادى باشا .. واكيد باذن الله حيتحط فى الفهرس عشان يكون افداة للجميع باذن الله

موضوع كويس جدا"
بس هل ينفع استخدم النسب دي في الانسر البوما اتوماتيك 1600cc مو2008 ؟؟؟؟؟؟؟

نسب الفريون لكل عربية بتكون مكتوب فيها .. وبتختلف من عربية لعربية .. فالافضل ان حضرتك ترجع الى كتالوج العربية وتعرف ايه اللى مسموح ليها

هو فيه كده ;)))
رووووعه يابني.... تسلم الايادي ماشاء الله
روح يابني الهي تكسب.... ربنا يجعلها في ميزان حسناتك يارب العالمين

حبيبى يا سونة .. يارافع من معنوياتى .. تسلم يا حبى على تقديرك الغالى يا غالى

مجهود رائع منك ياابو حميد زى ما اتعودنا دايما
بس فيه مشكلة من حلاوة مواضيع القسم بقت المواضيع المتثبتة واخدة نص صفحة تقريبا وبعد كده مش هنلاقى مكان للمواضيع الجديدة فى اول صفحة ههههههههههههههههه

الله يخليك يا يوسف باشا .. وشاكر تقديرك الغالى
مش مهم تكون فى نص الصفحة او لو كان كل الصفحة كلها مواضيع مثبتة من الاعضاء .. المهم انها تكون موضوعات مميزة وتفيد الاعضاء القدامى والجدد .. وهو ده اللى بنسعى ليه
والحمد لله على نعمة القسم بجد وعلى المعلومات والتقارير المميزة اللى فيه

[Ahmed.TV]

موضوع جميل يا ابو حميد

بس ليا تعليق عليه وارجو التأكد من صحته


زيت dot 5 لا يصلح للسيارات المستخدم معاها dot4 or 3
البديل ليه dot5.1
لان قاعدة ومكونات الزيت مختلفة بين 5 و 4 و 5.1
5.1 مماثل ل 4
5 مختلف عنهم

فعلا كلامك صح يا بوحميد .. وصح ميه فى الميه .. زيت الفرامل المناسب والمعادل ليهم
هو dot 5.1 .. ودى حقيقة ومعايا علبة فرامل dot 5.1 وهو معادل تماما الى dot 4 & dot3
بس وانا بكتب وقع منى وحعدلها باذن الله .. ولو تلاحظ ان قولت المهم كلهم يكونوا fmvss يعنى نفس المواصفات اللى صرحت بيه نيسان
فتسلم على المداخلة وعلى التصيح يا حبى

مجهود رائع و جبار

بس يوجد سؤال
تيير زيت الفلامل و زيت الباور مش المفروض يتحط ضمن الصيانات الدوريه للسيارات بالتوكيل
يعني زيت الفلامل مثلا حضرتك موضح انه يفضل تغييره كل سنتين او 40 الف كيلو متر طيب مش بيتغير ليه مع الصيانه في توكيل نيسان

في انتظار المزيد
جزاك الله كل خير موضوع هااااااااااااااااااااااااايل

تسلم يا محمد على تقديرك الغالى يا حبى .. ومنتظرين منك انت كمان المزيد والمزيد

موضوع الزيوت دى استهلاكية يا محمد التوكيل مالوش دعوة بتغيرها بيكون على حساب العميل
زى بالظبط لما بتروح تغير زيت الفتيس كل 40 الف كيلو .. فبتغيره على حسابك
وده حال اغلب توكيلات السيارات مش نيسان بس

[DarkMagician]

والله يا احمد موضوع جميل جدا يضاف للسي في بتاعك

انا شكلي حبعت المواضيع بتاعتك لشركة نيسان اللي حتحطك مكان كارلوس غصن :d
ولا تحب تقعد مكان رئيس تويوتا اكيو تويودا

[maged george]

كلمة شكرا قليلة جدا عليك ربنا يكرمك ويعوض تعب محبتك لجميع اعضاء القسم الافاضل.