كيفية تغيير زيت المحرك ، وكذلك الفلتر.

[hanyfarrag]

العدد والمستلزمات المطلوبة:
1. فلتر زيت جديد (حسب نوع السيارة)
2. مفتاح لفك طبة الزيت ( مقاس 17 أو 19 أو ألانكيه مقاس 12 حسب نوع السيارة)
3. عبوة زيت جديد (اسو أو شل أو موبيل على حسب المستخدم فى السيارة)
4. قطع قماش ومناديل للتنظيف
5. قمع لإضافة الزيت

الخطوات المتبعة:
1. إدارة محرك السيارة حتى نصل لدرجة حرارة التشغيل العادية.
2. إيقاف محرك السيارة.
3. فك طبة الزيت الموجودة فى أسفل الموتور وبالتحديد فى كارتيرة الزيت ( إحترس من سخونة الزيت).
4. ننتظر 5 دقائق لحين نزول أكبر كمية من الزيت القديم
5. فك فلتر الزيت القديم
6. وضع طبقة رقيقة من الزيت الجديد على الكاوتشة الموجودة فى الفلتر الجديد وربط الفلتر الجديد بإحكام (يوجد أداة مخصوصة لفك وربط الفلاتر ولكن عدم وجودها لا يعوق عملية الاستبدال).
7. إعادة ربط طبة الزيت مرة أخرى
8. إضافة الزيت الجديد بإستخدام القمع من فتحة تزويد الزيت الموجودة فى أعلى الموتور بالكمية المشار اليها فى كتالوج السيارة .
9. فحص مستوى الزيت من خلال مقياس الزيت
10. تنظيف أى زيوت حول طبة الزيت أو فتحة تزويد الزيت بمناديل أو بالقماش
11. إدارة المحرك من جديد والتأكد من أن لمبة ضغط الزيت فى التابلوه مش منوره.

ملحوظة هامة جدا:
ما تنساش تقفل طبة الزيت قبل متحط الزيت الجديد لأن لو سيادتك نسيت تقفل الطبة يبقى كل الزيت الجديد حينزل فى الأرض ولو مخدتش بالك وروحت مدور العربية يبقى أكيد الموتور حيقفش وحتدعى عليا

[KiNgMaX]

شكرا على الموضوع بس بيتهيالى ان التنفيذ هيكون اصب من الكلام شوية ولذلك يفضل تغيير الزيت عند متخصص او على الاقل فى بنزية هيكون افضل من البهدلة :) :)

[Ahmed R08]

شكرا على الخطوات
وانا بصراحه مرة جربت اغيره بهدلت نفسى وبهدلت الجراج وبهدلت العربيه "كانت عربيه الحاج الوالد" :mrgreen:
وحرمت خلاص ومقضيها فى البنزينه على طول

[Nader]

شكراً بس اعتقد ان صعب انزل تحت العربية ادام الناس، هتبقى محرجة شوية

[tamim]

ياجماعة احنا لازم اللى نغير زيت العربية بادينا علشان نشجع على العربية احنا ممكن نبهدل نفسنا والجراج اول مرة بس المرة الجاية هنبقى واخدين بالنا

[tamim]

وشكرا ياستاذ هانى على الموضوع
واهم حاجة ياجماعة
1:الطبة علشان الزيت الجديد مايقعش على الارض
2:جوان الفلترنحطه ولو نسيت تجيبه مع الفلتر او مجاش معاه جوان ممكن نحط جوان الفلتر القديم

[eng_mkhalaf]

فى 2 خطوة أتنست
1- أدراة المحرك لثوانى بعد ازالة الزيت القديم
2- ادارة العربية بعد التغير وتركيب الفلتر لكشف أى تسؤيب من جوان الفلتر

[montela]

ياحدعان اللي عايز يتعلم حاجة لازم يعملها بأيدة ولا اية؟ :-)
يعني انا اهو هندسة قسم ميكانيكا سيارات ومعرفش اعمل خاجة بأيدي
علشان كدة لازم الواحد يتعلم كل حاجة يعملها بنفسة :-)

[Nader]

2- ادارة العربية بعد التغير وتركيب الفلتر لكشف أى تسؤيب من جوان الفلتر

تمام ;)

1- أدراة المحرك لثوانى بعد ازالة الزيت القديم

هنا بقى هختلف معاك يا محمد لانها مخاطرة ملهاش لزمة حتى لو لثواني معدودة وافتكر ان اكثر احتكاك بيحصل بيبقى في وقت ادارة المحرك ... وكمان هيبقى من غير زيت.

[hanyfarrag]

أتفق مع نادرفى مخاطرة إدارة المحرك بدون زيت
وشكرا على الإضافة يا محمد باشا

[tutankhamoun]

البنزينة أحسن و انظف ............ لن أستفيد أي شئ لما أغير الزيت بأيدي
المتخصصين أفضل ........... و بلاش الواحد يتعلم في حاجة ثمنها غالي

[eng_mkhalaf]

وافتكر ان اكثر احتكاك بيحصل بيبقى في وقت ادارة المحرك ... وكمان هيبقى من غير زيت.

مين قال مفبش زيت - لا فى زيت يا نادر بس بيقى عالق قى السيلندر وجزء أخر بين الشنابر حسب حالتهم ومفيش أى مشكلة فى أدارتة لبضع ثوانى وعن تجربة

[Nader]

مهو يا محمد في فرق ان الموتور يكون فية زيت وانة يكون فية بقايا زيت بس، وكدة برضة بيبقى عامل الاحتكاك عالي جداً، الموتر مش هيبوظ من اول ولا خامس مرة، بس هيخف ويتاكل اسرع من العادي،، يبقى مخاطرة ملهاش لزوم.

[eng_mkhalaf]

الصراحة يا نادر انا قلبت النت على حاجة تثبت كلامة ملقيتشى ومقدرشى أقول اكتر من أنك أنت صح وأنا أوت المرة دية - خيرها فى غيرها وصباح الفل ;) ;)

[Nader]

معلش، جت في بيتها :)