تجربة زيت كاسترول ايدج مع الاوكتافيا

[mezo73]

اصدقائي الاكتافياوية
كل عام وانتم بخير ومبروك علي انتخاب اول رئيس لمصر
معلش انا تقريبا من ساعة المقابلة وانا مسحول في الشغل بس ما اقدرش ابعد عن المنتدي طبعا المهم

انا لسة مغير زيت من موبيل 1 الي كاسترول ايدج
5w-40

التجربة فات عليها 1000 كم تقريبا سعر الجركن 270 جنية
اولا
زي ما انا معتاد بانزل الشغل بدري وعادة بشغل الراديو الصبح وكنت بعد ما بمشي شوية كنت بعلي الصوت نظرا لان صوت الموتور بيعلي
ولكن بعد تغيير لكاسترول صوت الموتور هدوء تام وكان العربية مش دايرة وهي واقفة

تاني نقطة
لفتت انتباهي اني دايما بنقل الغيارات علي حسب صوت الموتور
اكتشفت اني بنقل علي سرعة ازيد من الاول نظرا لان صوت الموتور هادئ تماما ومش بينعر ( عربيتي مانيوال )

الملاحظة الثالثة
ان العربية فوجئت ان معدل الاستهلاك اللحظي للبنزين فيها قل بدرجة ممتازة
وادي الدليل بس ماعنديش صورة قبل ما اغير الزيت

Uploaded with ImageShack.us

كان معدل استهلاك البنزين من 7 ال 7.5 دلوقت من 5 الي 6 لكل 100 كم
وهذا ماحدث بدون مبالغة

وفي موضوع قريتة عن درجات اللزوجة للزيوت حبيت انقلة ليكم للاستفادة


اية فايدة الزيت اللى بيتحط فى الموتور؟
زيت الموتور بيعمل حاجتين مهمين اول حاجة بيعملها انة بيعمل طبقة عازلة لمنع احتكاك المعادن ببعضها وكمان بيعزل الحرارة عن غرفة الاحتراق.
لازم يكون زيت الموتور قادر على الاستمرار فى إبعاد كل المنتجات السيئة ذى السيليكا اللى هو (اكسيد السيليكون) و الاحماض .
اخر نقطة الزيت بيقلل من اكسدة الاكسجين ,والكلام دة بيتم تحت الحرارة ولضغط العالى جدا.

دلوقتى تقدر تقارن او تفهم اية الارقام اللى موجودة على جيركن الزيت اللى بتشترية
على سبيل المثال (5W-40)
من الطبيعى ان الزيت لما بيتعرض لدرجة حرارة عالية سماكتة بتقل ,خصوصا الزيت أحادى الدرجة مع المواتير الحديثة , ومن هنا بقى جة دور الزيت متعدد الدرجات , الموضوع سهل وبسيط من خلال العلوم والفيزيا قدرو ان هم يقليلو من معدل سماكة الزيت تحت درجات الحرارة العالية.

دلوقتى حنرجع للمثال بتاع (5W-40) الرقم اللى قبل حرف ‘W’ دة بيعبر عن درجة سيولة الزيت فى البرد, يعنى العربية لما تكون واقفة اللى حيساعد الموتور هو سيولة الزيت ورقم 5 دة بيعبر ان السيولة بتكون اقل خمس اضعاف الزيت العادى, ورقم 40 دة بيعبر ان لزوجة الزيت بتكون ازيد اربعين الضعف عن الزيت العادى فى الحرارة .
من الاخر انواع الزيوت بتتلخص فى الاتى:

1-زيت اصطناعى زى(0W-30, 0W-40, 5W-40)ودة حيظبطك(حيوفرلك فى البنزين – بيطول عمر الموتور- حيحافظ على اداء الموتور وقوتة- سهولة فى الاداء تحت درجات البرودة )

2-زيت شبة مصطنع زى (5W-30, 10W-40, 15W-40) ودة حيبقى اقل تظبيط من النوع اللى فوق (حماية افضل لموتور العربية- حيديك حماية للعربية اول عشر دقائق بعد تدوير العربية- بيطول عمر الموتور- وبيبعد من فترات تغيير الزيت)

3-زيت معدنى زى (10W-40, 15W-40) من الاخر متغيرش من الزيت دة ,دة مفهوش اى تظبيط غير (حيعمل الحماية العادية للموتور-حتغير زيت كتير فى وقت قليل)


واخير تحياتي لكم
اخوكم محمد حمزه


Uploaded with ImageShack.us

[A.samy]

لو دى عربيتك ياريت تشيل الصوره اللى علمتلك عليها لانها دعاية لشىء رخيص ارجو ان تقبل النصيحة من اخوك
[IMG][/IMG]

[snakeson2]

فعلا الزيت اكتر من رائع انا مغيرة بعد ال15 الف وكان زي الفل . انا جربت كل الانواع وشل كان الافضل بس كان بعد ال8الاف الزيت بيهيس ...

[alu]

معلومات جيدة الف شكر عليها

[AhMeD MeTwAlY]

شكرا علي نقل التجربه والفائده تعم

[me_medoo]

موضوع جميل يافندم ... بس هو الواحد بيجيبوا منين !
أنا جربت زيت ألماني مشهور من غير ذكـر أسماء ... جيت أرج الجركن حسيت أني برج قزازة مية فتحت ولمست الزيت لقيتوا ميه ... بس أستغربت الناس بتشكـر فيه ... ورغم أن الصوت المتور هدي ... بس حسيت العربية بتموت وبتطلع في الروح لمن أجي أشغل التكيـــــــــف .

بس كاستروا كنت بسمع عنوا من أيام ماكنت صغيـر ... هو صنعتوا ايه يا فندم وجبتوا منين وشكراً على التقرير بتاع حضــــــــــــرتك .

[mezo73]

لو دى عربيتك ياريت تشيل الصوره اللى علمتلك عليها لانها دعاية لشىء رخيص ارجو ان تقبل النصيحة من اخوك
[img][/img]

شكرا علي النصيحة
علي العموم انا شاري العربية بالعلامة
بس انا لية تعقيب علي الموضوع دة لان كذا حد لفت انتباهي لنفس الموضوع
ماهي نفس الماركة نظارات وملابس ومش الشيئ اللي اشرت بس

[mezo73]

موضوع جميل يافندم ... بس هو الواحد بيجيبوا منين !
أنا جربت زيت ألماني مشهور من غير ذكـر أسماء ... جيت أرج الجركن حسيت أني برج قزازة مية فتحت ولمست الزيت لقيتوا ميه ... بس أستغربت الناس بتشكـر فيه ... ورغم أن الصوت المتور هدي ... بس حسيت العربية بتموت وبتطلع في الروح لمن أجي أشغل التكيـــــــــف .

بس كاستروا كنت بسمع عنوا من أيام ماكنت صغيـر ... هو صنعتوا ايه يا فندم وجبتوا منين وشكراً على التقرير بتاع حضــــــــــــرتك .

بص ياباشا دة لينك كاسترول
Castrol Arabia : Edge

ودة لينك الموزعين

Castrol Arabia : Egypt

وانا جبت من موزع معتمد في الشارع اللي جنب حديقة بدر بجسر السويس
بالنسبة للصناعة علي ما اتذكر انة معبأ بالامارات
وطبعا هو غني عن التعريف كفاية انة الراعي الرسمي ليورو 2012

[HAITHAM1985]

لو حد شاف فيلم fast and furious 4 هيلاقى إن أغلب العربيات كانت بتحط كاسترول ......... زيت مشهود له بالكفاءة

بس أرجع وأقولك إنه للأداء الرياضى ........ مش سواقة الشوارع بتاعتنا وغير موصى به من أغلب الشركات الأوروبية ومعرفش إزاى ممكن يكون الموضوع تجارى بحت

بالتوفييييييييييييق

[midoabokhadra]

هو كاسترول بيتغير كل كام الف ؟؟؟
انا كنت بحط موبيل 3 الاف وبقيت احط الف . وفي ناس قالتلي ايسو افضل

[mezo73]

هو كاسترول بيتغير كل كام الف ؟؟؟
انا كنت بحط موبيل 3 الاف وبقيت احط الف . وفي ناس قالتلي ايسو افضل

اخي الكريم
كاسترول ايدج دة 10000 كم وهو افضل فعلا من موبيل 1 والذي يعاني في الفترة الاخيرة من سرعة التبخير
وهو بيقولوا عليه 15 الف مش 10 بس علشان الامان هاغير علي 10

[EngAhmedSayed]

الف شكر
يا حمزة
على نقل التجربة و شرحك المبسط و الجميل للموضوع
و تقرير اكثر من رائع
لك من تحياتى بالتوفيق و النجاح
و ياريت متغيبش عننا كتييييييييير ابقى حتى ادخل سلم علينا
وربك المستعان
اخوك و صديقك
احمد سيد

[mezo73]

شكرا يا احمد علي سؤالك عني وان شاء الله اكون دائما معاكم عالطول
وكل عام وانت بخير واصدقائنا بالقسم والمنتدي بمناسبة قرب حلول شهر رمضان الكريم اعادة الله عليكم بالخير واليمن والبركات
واسأل الله لي ولكم ان يبلغنا شهر رمضان

[bob12345]

لو حد شاف فيلم fast and furious 4 هيلاقى إن أغلب العربيات كانت بتحط كاسترول ......... زيت مشهود له بالكفاءة

بس أرجع وأقولك إنه للأداء الرياضى ........ مش سواقة الشوارع بتاعتنا وغير موصى به من أغلب الشركات الأوروبية ومعرفش إزاى ممكن يكون الموضوع تجارى بحت

بالتوفييييييييييييق

ياباشا علي غطا الزيت عندي في الجيتا و في بي ام 330 مكتوب كاسترول

[TOOLA]

طيب انا مجربو عندى فى البورا و هى موديل 2000 يعنى الماكينة بقالها 12 سنة بس الحمد لله حالتها ممتازة, الفكرة انا لسه جايبها من كام شهر و ديه كانت اول تغييرة زيت, و حاسيت بفرق فى الأداء, لكن المشكلة انى بحرق شوية و بجرى على سرعات 160 او زيادة سواء فى السفر او على الدائرى بليل لما يكون فاضى.

النقطة ان الزيت عندى كان بينقص من فترة لأخرى يعنى خلال ال 5 شهور الفاتو (7 الاف كيلو تقريبا) خلصت النص كيلو زيت الزيادة (انا كنت حاطط 4.45 كيلو بالفلتر و بالتالى اتبقى معايا 0.5 كيلو), معلوماتى بشكل عام ان مواتيرنا (اوكتافيا 4 و البورا ماتور واحد) بتاكل زيت بنسبة بسيطة و خصوصا مع الحرق و السرعات, فتجربتى الجاية هتكون شل ان شاء الله, و متنساش تراقب مقياس الزيت من فترة لأخرى (كل 1000 او 2000 ك مثلا و طمنى), و ان شاء الله خير.