زيت احادي الدرجه وتقيل ف النيواكسنت

[michohat]

السلام عليكم ورحمه الله وبركاته

اولا مفيش حد يضرب :b4_611:

اللي حصل اني سبت العربية للميكانيكي وكنت قولت له يربط عليها وقولت له ع صوت الكوستبنات الصبح وبتروح وفي وسط اليوم ع السلانيسية كده بيكون في صوت وده حسب علمي من استخدام المالك الاول للعربية لزيت معدني وكان بيسيبه فتره طويلة ف الموتور لما يفتكر يغيرة

رجعت له لقيته بيقول كله تمام لقيته حط لي زيت شل الاحمر احادي الدرجه لزوجه 50 تقيل (3.5 لتر ) و عليه 2 علبه زيت شمبر كل واحده 440 مللي
يعني كده الموتور فيه 4.5 لتر بزياده عن الطبيعي لتر كامل
وبيقول لي امشي عليه 500 كيلو وتعالى لي نحط التركيبه دي كمان مره وبعدها ترجع للزيت بتاعك

كان الوقت متأخر فمش عرفت اغير الزيت او انزله ومشيت عليه 25 كيلو ومراعي اني مش احرق ولا اقرص ع العربية
وكنت من فتره بفكر احط زيت اغسل بيه الموتور من جوه
فهل استغل الزيت اللي اتحط ده واعمل بيه زي غسيل للموتور وطبعا مش هستنى لل 500 وهنزله ع طول يومين او ثلاثه
ولا انزله وقتى

[khmshry]

السلام عليكم
بص ياباشا
انا كنت في مركز توب جير عند المهندس محمد فضالي وقلت اعمل غسيل وتنظيف للموتور فجبت فلاش اويل بتاع لوكي مولي من عنده وحطه علي الزيت القديم وبعدين شغل العربية 15 دقيقة وساب العربية تبرد وتصفي الزيت كله وبعدين جبنا زيت احادي كالتيكس اللي هو ب 50 جنيه وتقريبآ نفس اللزوجة بتاعت شل وشغل العربية لمدة نصف ساعه ونزل الزيت علشان يشيل اثار الفلاش وبعدين حطلي الزيت الجديد علي نظافة مع ملاحظة حط فلتر زيت جديد مع زيت كالتكس وبعدين حط فلتر جديد لزيت الكاسترول اللي انا شغال بيه والعربية ياباشا بقت خيفة وصوت الموتور قل فممكن يكون الميكانيكي بيعملك غسيل للموتور بالطريقة دي علشان الزيت القديم بس مش عارف بصراحة هو زيت الشنبر بدل الفلاش ولا ايه ودي تجربتي للامانه

[michohat]

ده قال لي امشي بيها 500 كيلو
اكيد هو في فكره حاجه وليه مخلي مستوى الزيت زياده عن الطبيعي

[kar!m]

هو اللي أعرفه حاجتين
أولا: مفيش زيت بينضف الموتور .. الفلش هو اللي بينضف
ثانيا: وجود زيت زيادة في الموتور بالكمية دي خطر جدا

[michohat]

هو اللي أعرفه حاجتين
أولا: مفيش زيت بينضف الموتور .. الفلش هو اللي بينضف
ثانيا: وجود زيت زيادة في الموتور بالكمية دي خطر جدا

نزلت نقصت الزيت بواسطه حقنه عمليات 50 ملي من فتحه مقياس الزيت
نقصت تقريبا ثلاث ارباع كيلو
مش فاكر عملتهم ع كام مره بالحقنه بس كان اصعب حاجه سحب الزيت من الموتور بالحقنه لان لازم ادني شادد الحقنه لفتره 5 دقايق مثلا لحد ما تتملي مع وجود قوه سحب عكسية من الزيت لانه تقيل لولا لقيت وسيله ثبت بيها مكبس الحقنه وريحت ايدي الحمد لله
ولاحظت ان مكتوب ع عبوة الزيت انه بيستخدم في محركات الديزل التربو وبرضه محركات البنزين وان من ضمن خصائصه انه بينظف الموتور من الترسبات الكربونيه وشوية حاجات كده

[amrelsaqqa]

انا معرفش هو بيعمل ايه !
بس ده هيتعب الطرمبة وممكن العربية تضرب اويلسيلات كمان ! زيت تقيل وكتير ومعاه زيت شنبر ، ياللهول :d

طيب هو ايه الفكرة اللى عاوز يعملها يعنى مش فاهم ؟

طب ما هو ده وضع اسوأ من الزيت المعدنى اللى كان مبوظ العربية

زيت احادى الدرجة وتقيل ، يعنى دمار للموتور في اي يوم تدور العربية وهى باردة في الـ 500 كيلو دول ، لان الزيت ده تقريبا كدة مش شغال خالص والعربية باردة وتخيل بقى ايه اللى بيحصل للموتور بالوضع ده ....

، ده حتى ماقاللكش تعمل الـ 500 كيلو في مشوار واحد مثلا وترجعله ، ده في ناس ممكن تقعد شهرين تمشى بالعربية كل يوم على ما يعملوا الـ 500 كيلو ! وده لو حصل بالزيت اللى هو حاطه ده هيدمرلك الموتور خصوصا مع كل تسخين للعربية على حسب تصورى وعلمى

ع العموم متاابع ، ولسة ياما هنشوف افتكاسات

[michohat]

كنت ناوي اطلع مشوار رايح جاي بس قولت بلاش النهارده واخليها بكره او بعده

[Silent~Dream]

حقا انها الافتكاسات المصريه حرام زيت احادى الدرجه يعنى تدمير و هلاك للموتور فى التدوير البارد و درجه لزوجه عاليه جدا بالنسبه للشتاء و عدم انسياب الزيت ووصوله لكل اجزاء الموتور لا وكمان زيت زياده لتر كامل يعنى اويل سيل يضرب وعمود الكرنك حركته تتشل و زيت زياده يضرب فى اى مكان لا سيبك من كل ده و كمان زيت شنبر بجد انا مش عارف هو بيفكر ازاى دى لو عربيه بتموت و بتاكل زيت وموتورها بيودع يدوب بيعملوا كده كمسكنات و يا جدعان تنظيف موتور ايه الى بزيت ردئ الى هو الزيت التخليقى الى نازل اصل انضف منه و يا عالم مغشوش كمان ولا لا الى عايز ينظف يجيب flash من مكان معتمد عشان الغش و يحطه على الزيت القديم و يشغل 10 دقايق او حسب ما مكتوب على العلبه و ينزل الزيت و يسيبه يصفى خاااااالص براحته نص ساعه ولا حاجه براحته على الاخر انتا تروح بنزينه نضيفه او اى حته و تجيب فلاش و زيت تخليقى بالكامل حسب اللزوجه الموصى بيها من الكتالوج و من مكان محترم و معتمد و بعدين تعمل الخطوات المكتوبه علي الفلاش و تسيبه يصفى براحته زى ما قولك لحضرتك فوق و بعدين تحط الزيت التخليقى و تنزله لما لزوجته تقل او حسب ما مكتوب فى الكتالوج

[حماده المصري]

واساسا حوار الكوستبانات ده عادي جدا في كتير من الهيونداي ومتعملوش اي حاجه ومش مضر

ولو في حل اعتقد ان الحل ان الكوستبانات دي تطلع وتتنضف باين او تتغير وخلاص


لعلمك الهيونداي معظمها كده وانا كان معايا نيو اكسنت برضو وعارف وقعدت معايا 160 الف كيلو

انما الي الراجل بيعمله هري رسمي

انت يا اما تدور العربيه الضهر في الحر وتغير زيت فورا ياما تخلي حد يغير لك الزيت تحت البيت من غير ما تدور ابدا

[michohat]

بكلمكم وانا ف الشغل وطبعا مشيت بيها بس مش كتير
ان شاء الله اغير الزيت النهارده ان مكنش فيها مطر زي كل يوم

[Karim_Monir]

نزل الزيت ده فورا واغسل الموتور بفلش
عارف لما تجيب شخص رياضي وتقوم ماكلة اكله تقيلة جدا جدا وبعدها تشربه نص ليتر زيت وبعد كدة عايزة يطلع عمارة 20 دور في دقيقتين
تقريبا انت بتعمل في عربيتك كدة
عايز اوضحلك حاجة مهمة انك كدة تقريبا زي ما الاخوة قالولك ماشي من غير اي مواد تشحيم بتشحم اجزاء الموتور خاصة في اول 5 دقايق
يعني البساتم عمالة تسلخ جوة
ارحم موتور عربيتك
اللعنة علي فتي الميكانيكية

[michohat]

ان شاء الله ف اقرب وقت

[mtradwan]

بكلمكم وانا ف الشغل وطبعا مشيت بيها بس مش كتير
ان شاء الله اغير الزيت النهارده ان مكنش فيها مطر زي كل يوم

انا من رايى روح للميكانيكا ده واستفسر من على كل حاجة ، هو الوحيد اللى هيفيدك فى الموضوع ده