المفاهيم الخاطئه عن زيوت المحركات

[agaty1st]

لاحظت كده ان ناس كتير جدا عندها مفاهيم خاطئه في موضوع الزيت و انهم متفقين و مسلمين بالمفاهيم دي و بينصحوا بعض بيها بحسن نيه و المفاهيم دي كانت عندي انا كمان قبل ما اشتغل في قطاع البترول من فتره طويله و مع الوقت لقيت ان معظم اللي كنت مسلم بصحته طلع غلط

و للأمانه كمان ...... انا مش بشتغل في الزيت انا بشتغل في وقود الطائرات النفاثه JET FUEL لكن عندي فكره لا بأس بها من خلال احتكاكي بالمتخصصين في الموضوع ده و هاقول الكلام اللي متأكد انه صح و مش هادخل في مواضيع أكبر من خبرتي المتواضعه

المفهوم الأول (متحطش زيت بتاع شركات مصريه حط زيت مستورد)
الشركات المصريه هيه اللي بتعمل الزيت لمعظم الشركات الأجنبيه و الفرق في العبوه و السعر فقط
مع العلم انه يوجد في مصر زيوت محركات مصنعه و معبأه في الخارج

المفهوم الثاني (الزيت ده بيمشي 5000 لكن بغيره على 3000)
بترمي فلوسك في الأرض لأن الكيلو متر ده بيتحدد على اساسين هما
1 – بداية حدوث تدهور في خواص الزيت التي لا تخل بوظائفه يعني بتاع الخمسه مش هايضر لو مشيت عليه 5500 أو 6000 و انا مش بقولك اعمل كده لكن بقولك كمل كيلومتراتك و متقلقش
2 – أسباب تجاريه بحته

المفهوم الثالث (جركن X الأصفر أحسن من جركن Y الاحمر)
متقارنش الزيت بلون الجركن قارن بمستوى الأداء يعني SM بتاع الشركه X بـ SM بتاع الشركه Y
غير كده تبقى ظلمت الزيت اللي مستوى أدائه أقل

المفهوم الرابع (الزيت ده خلى صوت الموتور أهدى)
المحرك وهو جديد يصدر ضوضاء محدده بالديسيبل عند كل عدد لفات لو استخدمت زيت مش مناسب ممكن يعلى صوت الموتور و ده غلط و ممكن كمان يكتم صوت الموتور و ده كمان غلط لأنه بيمثل مقاومه أكبر على ميكانيكية حركته بالظبط زي لو استخدمت زيت فتيس لزوجته 140 على فتيس موصى له بلزوجه 80
مثال لو جبت عربيه عالزيرو و قيست كمية ضوضاء المحرك و بعدين حطيت زيت شنبر على الزيت و قيست تاني هتلاقي صوت الموتور بقى أهدى لكنك هاتضر المحرك

المفهوم الخامس (الزيت النصف تخليقي هو مزيج بين المعدني و التخليقي)
هوه زيت تخليقي 100% و لكن المعالجه المعمليه تطيل السلسه الكيميائيه بنسبة 50% من السلسله الكيميائيه للزيت التخليقي و القاعده بتقول ان الزيت المعدني و التخليقي (Don’t Mix)

المفهوم السادس (الزيت بينزل من الموتور لونه أسود)
الزيت له 3 وظائف أساسيه و هما (التزييت – التبريد – الغسيل)
معني كده ان الزيت لو نزل لونه مش اسود يبقى زيت مضروووووووووووووووب
هوه ينفع مية الغسيل تكون نظيفه ؟
هوه ينفع الشكمان من جوه ميكونش مهبب ؟
هوه ينفع نواتج الاحتراق لا تترك أثر ؟

المفهوم السابع (غير الزيت كذا مره على نفس الفلتر)
فلتر الزيت بيعمل تلوث للزيت الجديد و بيؤدي إلي تدهور خواصه أسرع من حال تغييره مع الزيت

المفهوم الثامن (لو غيرت من معدني لتخليقي أو العكس أعمل FLUSH للموتور)
زيت الموتور بيكون في مذيبات لنواتج الاحتراق الكربونيه لكن بنسب مدروسه لغسيل الموتور من الداخل و ده سبب نزول الزيت اسود لكن مذيبات Flush أقوى بكتير فلا تبقي ولا تذر و الكربون ده له فايده طيب متى نستخدم الفلاش ؟
قبل العمره عشان نحكم بوضوح على التأكل داخل المحرك
في حالة اختلاط الزيت و الماء بشرط التأكد من عدم وجود تأكل داخلي

المفهوم التاسع (حط تخليقي عشان تحافظ على الموتور)
مش شرط ممكن التخليقي يضر بعض المحركات
ميزة التخليقي عن المعدني أيه ؟
1 – ثبات خواصه حتى 20000 كم في حين ان المعدني أقصى ثبات 10000 كم
2 – الوصول إلي جميع أجزاء المحرك في البروده الشديده (شتاء 2013 الرهيب لا يحتاج تخليقي)
3 – الوصول إلي أجزاء المحرك الدقيق جدا و ده في المحركات ذات معدل الانضغاط العالي زي مرسيدس و بي أم و فولفو و الفئات دي انما معظم السيارات المنتشره مش محتاجه تخليقي
الخلاصه : في الجو المصري التخليقي رفاهيه مش أساس إلا لبعض المحركات و ممكن يضر محركات قديمه لأنه سريع الانتشار فممكن يعدي من الشنبر و يوصل لغرفة الاحتراق

المفهوم العاشر (الزيت التخليقي ده مصري)
مفيش زيت تخليقي يصنع في مصر ..... نوهاااائي

المفهوم الحادي عشر (غير كل 1000كم أو 6 شهور أيهما أقرب)
حتى لو عملت 10000كم في سنه عادي جدا مش هايحصل حاجه

و الله أعلم

[hugan]

ماشاء الله
الله ينور
ياباشا الواحد بيقراء تعليقات تشيب في المنتدي
عن الزيت الفلاني او مانزل في العربيه
اللي عربيته اتحولت لسوبر كار
واللي الزيت اتحرق عنده
واللي الزيت نقص عنده للنص مواتيرهم مفوته في الاصل
واللي الزيت عنده خلي العربيه تطير من علي الارض
وفي الاخر كله زي بعضه
شغل شركات

[medo_mony]

والله مقدرش اقوول غير الله ينور يا باشا

[foxhonda2008]

معنديش غير كلمه واحده برافووووووووووو

[saddam]

صديقي المواطن
موضوع سلس وبسيط ومفيد لخدمة.زملائك أعضاء المنتدى الكرام وتوعيتهم وننتظر منك كل جديد
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[heeshooheeshoo]

كلام جميل .. وكلام معقول .. ماقدرش أقول حاجه عنه

وإذا سمحت لى أحب أضيف بعض الإيضاحات البسيطة لمعلوماتك القيمة:

بخصوص المفهوم الأول

الزيوت المعدنية المنتجة فى مصر الــ Base واحد .. وكل الشركات ممكن تاخذ الزيت الأساسى من مصدر واحد ولكن كل شركة تقوم بإضافة بعض الإضافات الخاصة بها على الزيت لتحقيق مواصفة معينة (تماما كما هو الحال فى البنزين والسولار فالمستودع واحد تأخذ منه كل شركات البترول.. مافيش حاجه إسمها بنزين التعاون وبنزين موبيل .... إلخ ...).

بخصوص المفهوم الثانى

أى زيت يحدد عمره بعدد معين من الكيلومترات بيكون له هامش أمان معمول حسابه فى الشركة المنتجة . على سبيل المثال الزيت الموصى بتغييره بعد 5000 كيلومتر يمكن أن يتحمل 7000 كيلومتر فى ظروف التشغيل العادية دون أدنى تأثير على خواصه .. بمعنى أن الشركة المنتجة تأخذ فى إعتبارها سوء الإستخدام أو سهو المستهلك لفترة عن التغيير فى الموعد المحدد .

بخصوص المفهوم الرابع

كلامك مضبوط تماااااما .. وأزيد عليه أن جانب الدعاية والإيحاء له دور هام فى هذه النقطة .
أما إن كان هناك إختلاف فعلى ملموس يمكن قياسه فى صوت المحرك بيبقى ممكن يكون فيه حاجه غلط .

بخصوص المفهوم الخامس

هذه المعلومة جديدة على تماما وأشكرك عليها وإن كنت متشوق للبحث عنها تفصيليا .. فإن كان لديك تفصيل لها أكون لك شاكرا .

بخصوص المفهوم الثامن

تأكيدا لكلامك الــ flushing oils ممكن تتسبب فى نتيجة غير مرغوب بها إطلاقا وخاصة فى المحركات القديمة نتيجة الإذابة والتفتيت الكامل لطبقة الكربون التى تملأ الخلوص الناتج عن التآكل الطبيعى لأجزاء المحرك الداخلية .

وأخيرا .. شكرا لك على هذا الموضوع المهم والمفيد ..

وتقبل تحياتى ،،،

[ahmedchina]

كلام تمام

[dr/hamza]

رائع

[HeshamBorhan]

رااااااااااااااائع....ممتاااااااااااااااااااز

[hamisa08]

كلام جميل جداااا وزى الفل
بس استفسار فى مفهوم العاشر

معنى كدة ان زيوت شل وموبيل كلها مستوردة ؟؟؟
انا على طووول بغير موبيل مكتوب علية صنع فى مصر تسد عين الشمس
دة ايه دة ؟؟

[Dr.M_baz]

موضوع رائع جدا.

[mohamedbook]

فية نقطة واحده بس ان لما لو الزيت بيتغير علي 5000 احنا نغيرة علي 3000 او 4000
السبب اننا مش بنحسب الدوارة بتاعت العربية ممكن العربية تدور اكتر ما تمشي ممكن نقفف في الاشارات والطرق اكتر مانمشي فالزيت بيتحرق اكتر وكل ده مش بيتحسب في الكيلومتراتوعشان كده يفضل اننا نغيرة بدري عن معاده

[محمد طايع]

شكرا لحضرتك على الموضوع الهايل
ليا تعليق فقط على المفهوم الخامس

الزيت النصف تخليقى هو مزيج فعلا بين المعدنى والتخليقى
بحيث لا تزيد نسبة التخليقى عن 30%
والمزج بين الأثنين يتم فى معامل شركة الزيت ولا يمكننا المزج بين النوعين بانفسنا
واعتقد ان هذا ما كنت تقصده بعبارة ان الزيت المعدنى والتخليقى Don't Mix

Semi-synthetic oil

Semi-synthetic oils (also called 'synthetic blends') are blends of mineral oil with no more than 30% synthetic oil designed to have many of the benefits of synthetic oil without matching the cost of pure synthetic oil. Motul introduced the first semi-synthetic motor oil in 1966

المصدر
Synthetic oil - Wikipedia, the free encyclopedia

وشكرا لحضرتك مرة اخرى

[agaty1st]

كلام جميل .. وكلام معقول .. ماقدرش أقول حاجه عنه
يا باشا ده بس عشان انتا راجل محترم

وإذا سمحت لى أحب أضيف بعض الإيضاحات البسيطة لمعلوماتك القيمة:

بخصوص المفهوم الأول
الزيوت المعدنية المنتجة فى مصر الــ Base واحد .. وكل الشركات ممكن تاخذ الزيت الأساسى من مصدر واحد ولكن كل شركة تقوم بإضافة بعض الإضافات الخاصة بها على الزيت لتحقيق مواصفة معينة (تماما كما هو الحال فى البنزين والسولار فالمستودع واحد تأخذ منه كل شركات البترول.. مافيش حاجه إسمها بنزين التعاون وبنزين موبيل .... إلخ ...).
فعلا الزيت الاساسي مصدره واحد و الاضافات واحده و نسب الخلط منصوص عليها من ال API لكن انا حبيت الموضوع يكون بسيط بدون الدخول في تفاصيل فنيه


بخصوص المفهوم الثانى
أى زيت يحدد عمره بعدد معين من الكيلومترات بيكون له هامش أمان معمول حسابه فى الشركة المنتجة . على سبيل المثال الزيت الموصى بتغييره بعد 5000 كيلومتر يمكن أن يتحمل 7000 كيلومتر فى ظروف التشغيل العادية دون أدنى تأثير على خواصه .. بمعنى أن الشركة المنتجة تأخذ فى إعتبارها سوء الإستخدام أو سهو المستهلك لفترة عن التغيير فى الموعد المحدد .
كلام سليم لكن محبيتش اقوله لأنه هايكون صادم لمعظم الناس و هايفتح مجال للتشكيك لكن عاوز اقولك ان الزيت التخليقي بتاع ال 10000 كيلو اعرف ناس كانت بتمشي عليه لحد 16000 و في عربيات زيرو و غاليه جدا


بخصوص المفهوم الرابع
كلامك مضبوط تماااااما .. وأزيد عليه أن جانب الدعاية والإيحاء له دور هام فى هذه النقطة .
أما إن كان هناك إختلاف فعلى ملموس يمكن قياسه فى صوت المحرك بيبقى ممكن يكون فيه حاجه غلط .

بخصوص المفهوم الخامس
هذه المعلومة جديدة على تماما وأشكرك عليها وإن كنت متشوق للبحث عنها تفصيليا .. فإن كان لديك تفصيل لها أكون لك شاكرا .
الموضوع ده شرحهولي مسئول خلط الزيت في شركه عالميه كان في زياره عندنا و استغليت الفرصه و سألته


بخصوص المفهوم الثامن
تأكيدا لكلامك الــ flushing oils ممكن تتسبب فى نتيجة غير مرغوب بها إطلاقا وخاصة فى المحركات القديمة نتيجة الإذابة والتفتيت الكامل لطبقة الكربون التى تملأ الخلوص الناتج عن التآكل الطبيعى لأجزاء المحرك الداخلية .
ده الوسيله السحريه عشان تفوت الموتور

وأخيرا .. شكرا لك على هذا الموضوع المهم والمفيد ..
وتقبل تحياتى ،،،
تحياتي يا باشا و تشرفت بالحوار معاك

[FAR!D]

الف شكر على المعلومات القيمه المفيده ديه