تحزير من وطنية محور المشير

[gadoo30]

يوم السبت اللى فات 9/4/2016 كنت راجع من وسط البلد الساعة 2 ظهرا وكان يوم حر جدا وفية تراب في الجو فكنت مشغل التكييف
عربيتى افيو 2006
المهم قلت ادخل وطنية اللى على محور المشير علشان اغير زيت هما عندهم زيوت شل وميعاد التغيير جة
دخلت على مجرة تغيير الزيوت وفتحت الكبوت من جوة والعامل فتح الكبوت قبل ما اخرج من العربية
خرجت لقيتة بيبص للقربة وفية مية حمراء خارجة من الغطا بيقولى بص من الحرارة اية اللى حصل
طبعا اتخضيت وجريت فتحت الكونتاكنت ابص على عداد الحرارة لقيت كلة تمام سالته انت جيت جنب الغطا قال لى لاء
بصيت على الكبوت ناحية القربة لقيتة ناشف ومفيش اثر لطرطشة مية
وكانت فية عربية تانية واقفة بتحط مية خضراء والعامل قال لى دة بردة من الحر
طبعا سالتة عندكو مية حمراء قال لى ب 130 جم قلت دى موبيل ب 80 جم قال لى دى شل
طيب عندكو غسيل دورة التبريد؟ قال لاء قولت خلاص هزود نص لتر مية حمراء معايا واكمل مية مقطرة من بتاعة التكييف وابقى اغير براحتى كدة كدة ميعاد تغيير المية جه
ودخلت الماركت ملقتش عندهم مية حمراء ولا مية شل من اساسة على الرغم انة قال انها في الماركت
غيرت الزيت والعربية اخدت نص لتر مية حمراء اللى كانت معايا ومشيت
وكل يوم ابص على المية لا بتنقص ولا بتغلى
طبعا واضح انها نصباية علشان كدة قلت احذركو

على فكرة انا طبعا غيرت زيت وفلتر والفلتر كان معايا
عمل لى فاتورة في الماركت ودفعت 145 جم
135 جم زيت شل الأصفر
10 جم تغيير زيت
وبعد ما خرجت جة العامل يقوللى 10 جم تغيير فلتر
نزلت وقولتلة لية
كلمت اللى كان في الماركت قال لى اصل مصنعية تغيير الزيت 10 جم والفلتر لو من عندك 10 جم
طبعا اعترضت وقولت لة كدة مش هغير زيت عندكو تانى دة حتى إعلانات شل بتول التوصيل والتغيير في مكانك من غير اى مصاريف إضافية و انا بعمل صيانة شاملة كل 5000 كم في مركز محترم ب 70 جم شاملة تغيير زيت وفلتر وتربيط عفشة وتنظيف فلاتر وكشف على التيل ورجلاش فرامل وممكن تغيير قلاتر وتغيير بوجيهات وكمان كشف كمبيوتر
وطبعا مدفعتش ال 10 جم

[Dr_Smart]

انا غيرت زيت في ناتكويك اللي في بنزينة وطنية اللي جنب سيتي ستارز وماكنتش مرتاح برضو .. بس بسبب العامل مش شاطر ..

[hugan]

لاء مفيش نصب
مجندين ومفيش عندهم اي خبره
وومش شغلتهم

[Mohamed Desoky]

لاء مفيش نصب
مجندين ومفيش عندهم اي خبره
وومش شغلتهم

حتى لو مجند ليه يتحط فى المكان ده لازم يكون ميكانيكى مجند لان المحطه بتخدم مدنيين وسيارات حديثه ممكن سياره زى bmw عايز يغير زيت ولازم الزيت يتشفط هيعمل ايه المفروض الشخص المناسب فى المكان المناسب والعامل يكون مدنى فاهم فى الشغل والاداره من الجيش لان مش من العقل عسكرى يتعلم فى عربيات الناس علشان كل ده لازم كل واحد عنده عربيه يتعلم يغير الزيت والفلتر وتيل الفرامل والبوجيهات والسيور كل الصيانات البسيطه كلنا لازم نتعلمها نعملها بنفسنا مش عيب ولا ينزل من قيمة الانسان لانى بشتغل بنفسى واوسخ قيدى فى عربيتى اللى بحبها انا بعمل كل حاجه بعرفها بنفسى فى العربيه وببقى سعيد وراضى والحمد لله

[Dr_Smart]

اعتقد صاحب الموضوع بيتكلم عن ناتكويك اللي جوه محطات وطنية هما اللي عندهم زيوت شل ودول تقريبا مش مجندين ولا يتبعو المحطه بشكل مباشر

[mr ramo]

انا برضو ليا تجربة مش ظريفة مع وطنيى اللي طريق السويس بعد 4.5
العامل بتاعهم بعد ما زودت العجل قالي انه ب 5 جنيه عشان ينفخ شوية هوا
وانا بعلمها في موبيل مصر الجديدة كخدمة ببلاش او انت وذوقك مع الراجل لكن مش غصب كدة