زيت محرك مناسب من فضلكم

[Marine_Sea]

انا عربيتى رينو كليو موديل 2003 16 صباب ماشيه 77 الف كيلو متر و كنت حاطط زيت كاسترول ماجنيت
دلوقتى انا عايز اغير الزيت و دخلت على مواقع كاسترول و توتال و فالفولين و حطيط مواصفات العربيه (مش بيطلب منى معرفه هى ماشيه كام كيلو) و كلهم نصحونى بلزوجه 5w30
سالت ميكانيكى قالى لا مش عارف ليه
ايه رايكم؟

[miam0502788391]

اللزوجة الموصى بها فى الكتالوج ايه ؟؟

[Marine_Sea]

مش عندى الكتالوج

اللزوجة الموصى بها فى الكتالوج ايه ؟؟

الكتالوج مش عندى

[dr.phil]

تقريبا معظم السيارات الحديثه بتاخد نفس اللزوجه سواء شل او توتال ..وكمان فى الكتالوج هتلاقى نفسس اللزوجه ..

بس هل درجه اللزوجه 5 w 30 فى منها ... زيت 5000 كم .. مش 10000 كم ؟

[دعبدالرحيم]

لو هي واخده علي الزيت التخليقي خليك عليه وممكن تغير لشل الترا ممتاز او ليكو مولي

[borio1704]

أفضل زيت للموتور هو اللي مواصفاته مذكورة في الكتالوج.. ده مفيهوش كلام

وموضوع الكيلومترات ده حدوته كده مالهاش لازمة ولا ليها أصل..


عموما.. رينو كانت نزلت ملف على الإنترنت (سنة 2004) لمواصفات الزيوت بتاعت عربياتها اللي اتعملت قبل الوقت ده.. وده قبل ما يعملوا لنفسهم مواصفة خاصة.

تقدر تنزله من هنا...

http://www.uas-bg.com/meganii/eng/6013A.pdf



المهم .. ملخص المكتوب في الملف ده بالنسبة للكليو كالآتي:

أولا: درجات اللزوجة المسموحة:

تقريبا كل درجات اللزوجة المعروفة مسموحة ... واللي بيفرق بس هو أقل درجة حرارة ممكن تشغل فيها العربية (بالذات في الصبح بدري).

(درجة الحرارة لا تقل عن 15 تحت الصفر) 15W-40 و 15W-50
(درجة الحرارة لا تقل عن 20 تحت الصفر) 10W-30 و 10W-40 و 10W-50
(درجة الحرارة لا تقل عن 25 تحت الصفر) 5W-30 و 5W-40 و 5W-50
(درجة الحرارة لا تقل عن 30 تحت الصفر) 0W-30 و 0W-40


مستوى الأداء المطلوب:

كود ACEA: مستوى A3 أو A5
كود API: مستوى SJ على الأقل ... يعني تقدر تحط SL أو SM أو SN (الترتيب من الأقل إلى الأعلى).


لو عايز تفهم الأكواد دي .. تقدر تدخل على الموضوع ده:

http://www.nilemotors.net/Nile/341680-a.html

طيب..
بناء على الكلام ده... كده زيوت كتير قوي تقدر تحطها بدون مشاكل... بس غالبا ممكن تتوه.

وهنا بقى الاختيار بيبقى بناء على أسلوب استخدامك للعربية وأولوياتك انت شخصيا.



يا ريت تقولنا إيه أسلوب استخدامك من ناحية طول مشاويرك.. عدد مرات التدوير على البارد يوميا.. الطرق اللي بيتسخدمها زحمة ولا طرق مفتوحة.. أغلب مشاويرك بتبقى العربية فاضية ولا فيها أحمال... بتحب الحرق على الموتور ولا سواقتك هادية.

وكمان أولوياتك من ناحية .. التوفير في البنزين.. سعر الزيت.. عمر المحرك.


وإن شاء الله نساعدك تلاقي الزيت المناسب.



...