نقص فزيت الموتور اكسنت ار بي

[thatha]

السلام عليكم،
انا معايا اكسنت 2015 عملت صيانه 10,000 من سنه و كمان اسبوع حعمل صيانه العشرين. لحظت النهارده ان صوت الموتور فيه تكتكه خفيفه اوي بسمعها لما اقفل الزجاج و اركز. بصيت على الزيت لقيته قليل جدا تقريبا لامس l . فهل ده طبيعي؟ انا خايف امشي بيها

[tameem2010]

العربية معاك لسه زيرو .... بس الزيت اخره اخره سنة حتى لو مكملش مدته ...
الاهم انت متاكد انك قيست الزيت صح ؟
يعني تقف في ارض مستويه وتدور العربيه لحد ما توصل لحرارتها الطبيعيه يعني بعد 5 دقايق تشغيل وبعد كده تطفيها وتستنى دقيقة او دقيقتين وتقيس

عموما مستحيل الزيت يكون في المعيار ده ابدا مع عربية زيرو

اتاكد ان مفيش تسريب من ناحيه الكارتيره ممكن تكون فيه نشع زيت منها
وبص على الموتور نفسه فيه زيت عليه ولا لا ؟
وبص لفلتر الهواء وشوف فيه اثار زيت عنده ولا لا

بس العربية لسه زيرو مستحيل تاكل زيت

عموما لو لقيت الزيت ناقص اطلع بيها على التوكيل على طول
هي لسه في الضمان

[borio1704]

صوت التكتكتة ده طبيعي.. مواتير هيونداي وكيا كده

بالنسبة لنقص الزيت.. فزي ما قاللك أستاذ tameem2010.. اتأكد إنك بتقيس صح..

وطريقة القياس الصح موجودة في كتالوج عربيتك... ارجعله.

والمفروض تقيس مستوى الزيت كل شهر (مكتوب في الكتالوج كل 500 كيلومتر)..


بالنسبة لنقص الزيت..

يا ريت تقوللنا إيه نوع الزيت اللي بتستخدمه؟؟ هل هو الG-ENERGY بتاع التوكيل ولا بتحط حاجة تانية؟؟


راجع الموضوع ده بردو لمزيد من المعلومات..

http://www.nilemotors.net/Nile/492938-a.html

...

[tameem2010]

التكتكه ديه بيبقى صوت الكوستبان
ده معناها ان الكوستبنات بقت خشنة
ده بيحصل على طول في هيونداي بس مالوش اضرار وبيروح بمجرد ما العربية توصل لحرارتها الطبيعيه ومفيش منه اي مشكلة نهائي فمتشغلش بالك بيه

الزيت لو بيسرب او بيبخر بيبان اثره
هيكون واضح جدا على البلوك بره
لو البلوك نضيف يبقى مفيش تسريب ولا غيره
او ممكن تكون الطبة بتسرب وده بيبان على الطبة من تحت

[thatha]

متشكر ياجماعه جدا. فعلا يا استاذ تامر فيه تسريب. انا روحت التوكيل و لقو ان الورده الي عند الطبه بتاعت الزيت بايشه و الطبه مهويه سنه. المهم غيرو فلتر و الورده و حطوا زيت جديد . و الحمدلله الدنيا كويسه و صوت الموتور هدي . الكتكه بقت بسيطه جدا لازم اقفل الازاز و اركز عشان اسمعها .

شكرا على المساعده