مطلوب مساعدة من باشمهندس بوريو كل الشكر

[zeroten]

السلام عليكم ورحمة الله وبركاته منتدانا الرائع ومشرفيه وأعضاؤه الكرام

أدخل في الموضوع
باشمهندس بوريو الكريم كل التحية
انا شاري عربية لانوس 2017 وخلصت فترة تليين العربية
وعاوز أغير الزيت وان شاء الله هستعمل زيت تخليقي بالكامل وعلي فكرة كتالوج العربية هو هو كتالوج الدايو لانوس ماتغيرش
وعاندي في عدة لزوجات في الكتالوج المتوفر منها من شركة موبل

5w30 و 5w50

فعاوز حضرتك تفدني بالله عليك واستخدم اي لزوجة من اللزوجتين السابقتين لأني في خلال أسبوع ان شاء الله هغير الزيت

وانا استخدامي للعربية مشوار سفر 100 كيلو كل اسبوع واحيانا مشوار تاني سفر برضه 250 كم كل شهر وبسيط جدا جوه البلد
كل الشكر باشمهندس بوريو .

[borio1704]

أهلا وسهلا بحضرتك... وأشكر حضرتك على ثقتك الغالية.. وأدعو الله إني أقدر أساعدك فعلا..

أولا.. مبروك على العربية.. وربنا يعطيك خيرها ويكفيك شرها ...


ثانيا.. تعالى نراجع طلبات الكتالوج تاني...




الكتالوج بيقول:

مستوى الأداء (الجودة):
مستوى API SH على الأقل .. يعني تقدر تستخدم SJ أو SL أو SM أو SN.. والأفضل طبعا هو SN
مستوى ACEA A1 أو A2 أو A3

اللزوجة:
20W-50 أو 20W-40
15W-50 أو 15W-40
10W-50 أو 10W-40
5W-50 أو 5W-40
10W-30 أو 5W-30

اللزوجات باللون الأزرق هي المفضلة حسب الصفحة الأولى من التوصيات


نيجي لاختيار الزيوت...

طبعا .. أغلب الزيوت التخليقية في السوق مستواها API SN.. ولكن فيها اختلافات بالنسبة لمستوى الأداء بتاع ACEA...

بالنسبة للزوجة.. فالأفضل طبعا نروح على اللزوجات المفضلة... إنما لو احتجنا نروح للزوجات التانية.. فمفيش مانع مادامت مكتوبة في الكتالوج..

اللي يحدد اللزوجة بشكل كبير هو طريقة الاستخدام والتحميل على الموتور...

المهم بالنسبالي هو تحميل الموتور طبعا ...

أتوقع إن استخدام حضرتك خفيف على الموتور..
بمعنى إنك مش بتشيل حاجات كتير في العربية أثناء السفر (التحميل المعتاد: 3-4 أشخاص مع أمتعتهم غالبا لا يتجاوز وزنهم الإجمالي 250 كيلوجرام)..
وكمان داخل المدينة غالبا بتكون لوحدك في العربية أو معاك شخص أو اتنين بالكتير...
وما أتوقعش إن سواقة حضرتك فيها قرص على الموتور كتير...

لو افتراضاتي دي فيها حاجة غلط يا ريت تصححني.. علشان ده ممكن يأثر على اختيارنا..

في الحالة دي استخدام لزوجة خفيفة أفضل بكتير.. بالذات لو حبيت توفر في البنزين..

يبقى اختيارنا في اللزوجة هو 5W-30


بالنسبة للزيوت المتاحة عند موبل 1...

فلزوجة 5w-30 لوحدها فيه منها 3 أنواع عند موبل 1...

واحد اسمه ESP Formula...


الزيت ده مش هو الأفضل لموتور عربيتك... لإنه واخد تصنيف ACEA C2 و C3... والتصنيف ده غير موصى به في كتالوج عربيتك...


فيه زيت تاني اسمه FS


الزيت ده مكتوب عليه إنه مخصص للسيارات الأوروبية..

مبدئيا هو مناسب لموتور عربيتك لإن مستواه API SN و ACEA A3.. يعني محقق المطلوب في الكتالوج بالكامل...
بالإضافة إلى إنه محقق مواصفات لمرسيدس وفولزفاجن..

خد بالك إن تصنيف ACEA A3 بيدينا ثقة إن الزيت بيخدم مسافة طويلة أكتر من 10 آلاف كيلومتر


ثالث زيت اسمه x1

الزيت ده مكتوب عليه إنه مناسب للسيارات اليابانية والكورية..

الزيت ده مناسب بردو لإن مستوى أداؤه API SN و ACEA A1.. يعني بردو محقق المطلوب في الكتالوج بالكامل...
بالإضافة إلى إنه محقق مواصفات لفورد وجنرال موتورز.. وواخد ترخيص جنرال موتورز الجديد Dexos1

خد بالك إن تصنيف ACEA A1 معناه إن الزيت ده بيوفر في استهلاك البنزين بالمقارنة مع الزيوت اللي واخدة A3... بس مش بيخدم في الموتور أكتر من 10 آلاف كيلومتر...


على حسب وصف حضرتك واستخدامك القليل للعربية..

أنصحك باستخدام موبل1 x1 (الزيت الثالث).. علشان سببين:

1- الزيت هيوفر في استهلاك البنزين (أتوقع في حدود 5-10 % عن الزيت الثاني)

2- حضرتك مش هتمشي بالعربية أكتر من 10 آلاف كيلومتر خلال فترة 6 أشهر... وبالتالي معندناش حاجة نخاف منها بالنسبة لعمر الزيت وخدمته في الموتور.


آخر حاجة.. أنصح حضرتك تغير الزيت كل 6 شهور أيا كان نوع الزيت اللي بتستخدمه.. ما دام ما عديتش مسافة الـ10 آلاف كيلومتر.


وتحت أمرك في أي أسئلة أخرى.


...م

[zeroten]

بارك الله فيك استاذنا الكبير اشكرك لاهتمامك وردك البليغ الشامل لكل نقطة غامضة .... علي بركة الله اغير الزيت زي ما حضرتك اولت ان شاء الله ... الف شكر لمجهوداتك في المنتدي ..... تحياتي .