زيت شل الأصفر سيئ جدا

[SmartMega]

السلام عليكم
انا كنت مغير زيت شل الأصفر بقالي 2500 كيلو بالكتير ومن يومين كده ببص علي الزيت الصبح قبل ما ادور العربيه لاقيت الزيت عامل زي الميه مفيهوش اي نسبه لزوجه خالص كان عامل زي الميه ولما مسحت إيدي بالمنديل ولا أكن كان في حاجه علي إيدي مع ان المفروض ان الزيت ده بيتغير كل 5000 كيلو ..... ولا أنا متهيألي
وياتري تنصحوني بزيت إيه
والف شكر

[ecco]

بالعكس يا راجل يا طيب , زيت شل دا أحسن زيت موجود فى السوق .

[SmartMega]

والله ده اللي حصل يا أستاذي الفاضل انا بس كنت عايز أعرف السبب ولو عايز أعير الزيت فيه إيه أحسن ممكن أجيبه

[Ahmed Anwer]

فعلا زيت شل كويس جدا ،،

بس يمكن بقه حضرتك حطيت نوع مش الأصلي و لا حاجة

[Rembrandt]

زيت شل على فكرة من انظف وانفى الزيوت للمحرك وانا مش عارف هو اتحول بقى زى المية ازاى مع حضرتك لان دة تقريبا وعلى حد علمى مستحيل

[SAMEH_FOUAD]

زيت شل الاصفر بيتغير كل 3000 كيلو وهو زيت ممتاز جدا وبيحتفظ بدرجة اللزوجة بتاعتة واحسن من زيت موبيل xhp بكتير وارخص منة

[SmartMega]

لو فعلا بيتغير كل 3000 كيلو يبقي أصدق انه علي 2500 يبقي زي الميه
انما لو كل 5000 يبقي مستحيل .... يعني أفهم من الكلام ده ان مفيش حاجه أحسن من الشيل ؟

[ضيف]

كنت بستعمل زيت بترومين (منتج سعودي) في عربيتي السابقة (لانوس 99)-لغاية ما بعتها من سنة و عدادها 15300كم-و بغيره مع الفلتر كل 5000 , كان بينزل بلزوجة ممتازة و لونه غامق حاجة بسيطة جداً
موبيل و توتال و كالتكس كان الزيت بينزل أسود و فاقد لزوجته ألى حد ما
بالتوفيق إن شاء الله

[KoDaK_Gti]

انا لسة مغيره امبارح
دى تانى مره اغيره والزيت اللى كان نازل منها مشيت بيه 4300 بالظبط ونازل اسود شوية
الراجل قالى اخره من 3000 الى 3500 علشان فى اشارة بتقف فيها وزحمة وكل ده بيأثر على الزيت
وسعره بقة 91 جنيه بدل من 98 عليه عرض لفترة

[ahmed_su]

طول اربع سنوات كنت بستعمل شل الاصفر فى عربيتى التمبرا

وكنت بغيره كل 4000 كم وكان من افضل واجود الزيوت

التى استخدمتها وبفرق ملحوظ من جميع النواحى

اكيد فيه حاجة مش طبيعية (سواء مغشوش اوتقليد او ....الخ)

[M_Nabil]

بستعمله وهو زيت كويس فعلا وبغيره في الشتاء على 3000 و في الصيف على 2000

[SmartMega]

الف شكر يارجاله علي ردودكم وعلي العموم لما آجي أغير الزيت المره الجايه هابقي أغيره عند اي بنزينه شل إن شاء الله علي الأقل هايبقي أضمن وأنا شاف أن 3000 كم كويس اوي عليه

[zeyad1810]

انا بستعمل شل الاصفر وشايف انة ممتاز وبغيرة كل 5000 كيلو
ممكن يكون اللى استعملتة فية حاجة مش مظبوطة ؟

[max_ziro]

شل الاصفر بيتغير على 5 ولا 3 الاف كيلو ؟؟؟؟
لحد علمى 3 الاف

[zeyad1810]

فى ناس بتغيرة على 3000 وناس على 5000 بس انت ممكن تتابع الزيت وتشوف لزوجتة لو فضلت كويسة بعد 3000 يبقى خلية يكمل 5000 وبعدين غيرة