زيوت امارات مصر

[Hossam_Hassan]

النهاردة كانت تانى تغيرة زيت من امارات مصر، أنا بصراحة عجبنى لما حطيته أول مرة بس قلت استنى لما اشوف ادائه للأخر، اداء العربية مفرقش عن زيت شل اللى كنت باستعمله قبل ده - الأصفر 5000 كم - بس الفرق الكبير اللى لاحظته كان فى اللزوجة، انا كنت بغير شل بالكتير على 3500 كم علشان بخاف بس زيت امارات مصر كانت درجة لزوجته احسن كل ما اكشف عليه و غيرته على 5400 كم و كان ممكن ادوس عليه لغاية 6000، أنا عموما ما افهمش فى الزيوت قوى بس على حسب ما اتعلمت هنا ان اللزوجة الأعلى أحسن و بالتالى انصح بزيوت امارات مصر بشدة.

فى حاجة كمان عاجبانى قوى و هى نضافة المكان لدرجة انك صعب تلاقى نقطة زيت فى منطقة غيار الزيت 8) 8)

[إسلام شاهين]

يعني يا حسام فيه منه 10000 ؟ زي الشيل ؟ أنا حاطط شيل ألترا 10000 الرمادي ولا مفيش ويا ترى عامل كام ؟ وبتغيره فين ؟ البنزينة اللي على الدائري ؟ ولافيه حته تانية ؟

[Hossam_Hassan]

فيه منه اللى 10000 ب 215 جنيه و بغيره فى البنزينة اللى على الدائرى و كمان فيه ال 3000 و ال 5000 اللى أنا باستخدمه و عندهم نظام تغيير زيت لل 3000 و ال 5000 من غير ما تشترى العبوة، يعنى سايب و تملى و تدفع على قد ما تحتاج و يعملولك دفتر و كل 7 تغييرات تاخد ال 8 مجانا.

[معاذ الشرباصى]

امارات مصر عندها زيت تخليقى زى الموبيل 1 و الشل الترا هيلكس ب 175 جنيه ال4 لتر

البنزينة اللى على الدائرى قبل كارفور عندهم

[Hossam_Hassan]

انا على ما افتكر يا معاذ انه ب 215، بس يمكن اكون نسيت علشان انا سألت لما غيرت المرة اللى فاتت من شهرين

[إسلام شاهين]

يعني رأيكوا أغير المرة الجاية عندهم ولا إيه ؟ ديه هتبقى تاني مرة أغير لأن العربية هتبقى عملت 10000 .

وبعدين محتاج أنظف الموتور علشان هغير من نوع لنوع تاني ولا إيه النظام ؟

وبعدين هو الموبيل 1 والشل الألترا تخليقي ؟

[معاذ الشرباصى]

انا سألت فى شهر 7 يا حسام باشا و دى كانت قايمة بالاسعار الزيوت عامة فى مصر

http://www.nilemotors.net/Forum/viewtopic.php?t=4431&highlight=%DE%C7%C6%E3%C9+%C8%C7%D3%DA%C7%D1+%C7%E1%D2%ED%C9%CA++%E3%D5%D1

يعني رأيكوا أغير المرة الجاية عندهم ولا إيه

بص يا اسلام باشا, هما فى الامارات ده الزيت الاساسى عندهم فى كل الماركات و الناس بتشكر فيه, و هو مستورد من الامارات

وبعدين محتاج أنظف الموتور علشان هغير من نوع لنوع تاني ولا إيه النظام

هو يستحسن تنظف الموتور ب flush motor هو تمنه تقريا 22 جنيه

وبعدين هو الموبيل 1 والشل الألترا تخليقي ؟

ايوة

[إسلام شاهين]

برضه ماقولتوليش يعني أتوكل على الله وأغيرله المرة الجاية ولا ما رأيكم ؟

[اسلام المصرى]

أنا حتى الان يا اسلام شغال على موبيل 1 , أمارات مصر ماجاربتهمش غير فى البنزين , البنزينة واسعة و نضيفة و ستاف محترم بيعرفوا اذاى يتعملوا مع الناس باحترام و أدب مش عربجية واقفين عاملين ذى اللصوص عايزين يقلبوك و يلمعلك الزجاج و يختفى لا ينتظر بقشيش , فى امارات مصر كمان قبل كارتة مصر اسكندرية الصحراوى و عندهم كمان بنزين 95 :D اعتقد ان لو الزيت فعلا مستورد من الامارات و بنفس سعر شيل و موبيل أتكل على الله و جربه.

[mtema99]

ياريت تجربوا زيت TOTAL
انا كنت مجربها لحد ما بعت العربيه و بجد تحفه

[hazem_khidr]

زيوت الامارات كنا دايما بنستخدمها لما كنت هناك في ابو ظبي و مكنش في حد عارف موبيل ولا شل ولا اي حاجه وفعلا كانت ممتازه و برضه بيبيع ليك علي حسب عربيتك سايب برضه

[tmz9111]

زيوت أمارات مصر جميلة جدا بناء عن تجربة بس البنزينة الموجودة قبل بوبات مصر أسكندرية لا يوجد بها تغيير زيت بل يوجد فى البنزينة الموجودة على الدائرى قبل كارفور

[Sharky]

ياريت تجربوا زيت TOTAL

أنا فعلا سمعت إن الزيت بتاعها ممتاز

[Abdallah]

متهيألى تخليك فى الشل افضل يا إسلام, مش كل تغييرة هتغير نوع الزيت ومتهيألى الشل ممتاز جدا فليه بقة وجع الدماغ؟؟

[اسلام المصرى]

بس البنزينة الموجودة قبل بوبات مصر أسكندرية لا يوجد بها تغيير زيت بل يوجد فى البنزينة الموجودة على الدائرى قبل كارفور

كلامك مظبوط أنا أسف على المعلومة الخطأ. فعلا هذه المحطة لا يوجد بها تغيير زيت معلش غلطتى :) شكرا جزيلا لك على تصحيح المعلومة.