طريقة تغيير زيت الفرامل بالكامل ( فرامل + دبرياش )

[عصام غنايم]

بسم الله


هنبدأ موضوعنا بنبذه تعريف مختصره عن زيت الفرامل او ( زيت الباكم ) واهميته فى السياره

زيت الفرامل ( الباكم ) من المكونات الاساسيه لمنظومة الفرامل فى اى عربيه ويمكن يكون اهم مكون
لان لاقدر الله عند وجود تسريب لهذا الزيت فلن توجد فرامل اصلاٌ

زيت الباكم هو السائل المسؤل عن توصيل الحركه الفرمليه الهيدرولكيه من الماستر العمومى ( الموجود فى صدر العربيه فوق السيرفو ) الى المساتر الفرعيه فى الاربع عجلات واحداث الحركه الفرمليه

خواص السائل ده انه ( اصفر شفاف , ذو لزوجه خفيفه , قوامه مقارب لقوام الماء , يتحمل درجات حراره عاليه بدون تغير فى خواصه , درجة غليانه تقريبا 260 درجه مئويه ( بالنسبه لل DOT 4 ) , مزيل للدهانات , سام للانسان , شره للرطوبه )


زيت الباكم انواع
( DOT 3 , DOT 4 ) للدراجات الناريه وسيارات الركوب والنقل الخفيف
( DOT 5 ) للنقل الثقيل والاوتوبيسات


طيب ليه بنغيره ؟

لما بيكون الزيت ده فى حالته الجيده بيقوم بوظيفته الفرمليه جيداٌ

ولاكن بعد فتره من التشغيل خواص السائل ده بتتغير وبالتالى ادائه بيتأثر بالسلب

وده بيبان من لونه بيتغير من الأصفر الشفاف الى البنى الغامق وبنلاحظ وجود شوائب مع الزيت فى القربه

ولذلك ينصح مصنعو السيارات باستبداله بالكامل سنوياٌ بغض النظر عن الكيلوات المقطوعه نظراٌ لشراهته الكبيره للرطوبه والتى تخفض درجة غليانه من 260 درجه مئويه الى 165 درجة مئويه


بعد معرفنا الجزء النظرى من الموضوع نخش على الجزء العملى وهو تغيير الزيت

( الطريقه دى تنفع لكل العربيات )

بسم الله

هنبداء بفتح الكابوت هنلاقى على صدر العربيه السيرفو وهو عباره عن اسطوانه سوداء مثبته من ناحية بصدر العربيه ومن الناحيه الاخرى مثبت عليها الماستر العمومى وعليه قربة زيت الباكم




هنفتح قربة زيت الباكم ونشيل الغطاء بتاعه على جنب بعد ما نفصل فيشته ونصفى الزيت الموجود فى انبوبة القياس الموجوده تحته



هنجيب سرنجه 10 سم من اى صيدليه وهنبداء نشفط زيت الباكم القديم من القربه ونرميه بره

( طبعاٌ بحزر وبعيد عن البويه لانه مزيل للبويات )

بعد ما فضينا الزيت القديم

هنملا زيت باكم جديد لحد ما نوصل لعلامة MAX اللى فى جنب القربه

طيب نوع الزيت الجديد ايه ؟

الكاتلوج بيقول غير يا اما بزيت ( DOT 4 ) او ( DOT 3 )


انا عن نفسى بحط زيت (DOT 4 ) لان خواصه ودرجة تحمله اعلى من ال ( DOT 3 )

عندك فى السوق انواع كتير واسعار كتير

انا بفضل اللوكهيد الانجليزى او ال ATE SL الالمانى

هشتغل ب SL الالمانى
ودى صورته



هنام تحت العربيه من وراء الناحيه اليمين يعنى اللى جنب السواق من وراء ودى ابعد ناحيه من ماستر الفرامل

1 هنبص على الكالبر او الدشمه من جوه هنلاقى مسمار 9 او 10 مفتوح من فوق ومتغطى بغطاء كاوتش هنشيل الغطاء وهنبداء نفك المسمار ده لحد ما ينزل زيت بغزاره



( طبعا نبعد الزيت عن ايدينا ولو لمس اى جزء من الجسم نغسله بميه بس كويس لانه زيت حامى ولو اتساب على الجلد بيسبب التهابات )

2 هنقوم من تحت العربيه ونسيبه يفضى ونبص على القربه لحد ما نلاقى الزيت وصل لعلامة MIN

هننزل تانى ونقفل المسمار ده كويس ونغطيه تانى ونكب شوية ميه على كل الاماكن اللى الزيت لامسها علشان مياكلهاش

3 هنقوم ونزود القربه بالزيت الجديد لحد ما نوصل لعلامة MAX


هننزل على الفرده التانيه من وراء

ونكرر الخطوات من 1 الى 3



وبعدين الفرده اليمين من قدام

اللى جنب السواق هنلف الدركسيون للناحيه اليمين على الآخر علشان نطول الدشمه من بره

ونكرر الخطوات من 1 الى 3



وبعدين الفردة الشمال قدام بتاعت السواق

هنلف الدركسيون الى الناحيه الشمال على الآخر

ونكرر الخطوات من 1 الى 3



كده احنا خلصنا الاربع فرد

باقى ايه ؟
؟
؟
؟
الدبرياش

لأن كلنا عارفين العربيات اللى الدبرياش بتاعها على زيت باكم بتأخد من نفس قربة الفرامل

( طبعا فى عربيات الدبرياش بتاعها على وير دى بالنسبالها الموضوه خلص كده )


بالنسبه للدايو

هنبص جنب مقاس الزيت بتاع المكنه هنلاقى ماسورة زيت الباكم واصله لبستم ماشة الفتيس وهنلاقى نفس المسمار اللى شفناه على العجل موجود عليها

هنكرر الخطوات من 1 الى 3



بكده احنا غيرنا زيت دورة الفرامل والدبرياش بالكامل

الطريقه دى برغم بساطتها الا انها فيها مميزات كتير

اولاٌ

اننا اتأكدنا ان الزيت اللى فى القربه فوق و حتى الزيت الموجود فى المواسير
اتغير بالكامل

ثانياٌ

اننا اتأكدنا من خلو مواسير التوصيل وبالتالى الدوره كامله من الشوائب والمواد الغريبه اللى بتسبب سؤ الفرمله وايضا حدفة العربيه شمال او يمين مع الفرامل الفجائيه لو كانت احد المواسير ضيقه او فيها هواء

ثالثاٌ

استنزفنا الهواء الموجود بدورة الفرامل بالكامل ( ودى مهمه اوى )


ملحوظات هامه

لازم تتأكد من ربط جميع المسامير اللى فكتها بأحكام ( دى فرامل يعنى مش لعبه )

بعد ما نخلص كل حاجه هنملى القربه زيت بس ما نوصلش لعلامة MAX علشان لما نغير التيل بتيل جديد مستوى الزيت هيعلى شويه



طبعاٌ مننساش نقفل غطاء القربه بأحكام ونوصل فيشتها تانى

نغسل كل الاجزاء اللى اتعرضت لملامسة زيت الباكم بالماء جيداٌ



بكده الموضوع خلص اللى عنده اى استفسار

اتمنى ان لا تنسونى من صالح دعائكم

وايضا الدعاء لأخونا وزميلنا المتوفى ( محمد جمعه )

اخوكم عصام غنايم

وسلام مؤقت

[pesso]

اللهم أبدله دارا خيرا من داره وأهلا خيرا من أهله وزوجا خيرا من زوجه اللهم اغسله من خطاياه بالماء والثلج والبرد ونقه اللهم من الذنوب والخطايا كما ينقى الثوب الأبيض من الدنس
اللهم ارفع درجته في المهديين واخلفه في عقبه في الغابرين واغفر لنا وله يارب العالمين...آمين
شكرا على الموضوع وان شاء الله هنفذه فى القريب العاجل لانه فعلا مهم جدا

[dr_mak]

اللهم أبدله دارا خيرا من داره وأهلا خيرا من أهله وزوجا خيرا من زوجه اللهم اغسله من خطاياه بالماء والثلج والبرد ونقه اللهم من الذنوب والخطايا كما ينقى الثوب الأبيض من الدنس

[عصام غنايم]

اللهم أبدله دارا خيرا من داره وأهلا خيرا من أهله وزوجا خيرا من زوجه اللهم اغسله من خطاياه بالماء والثلج والبرد ونقه اللهم من الذنوب والخطايا كما ينقى الثوب الأبيض من الدنس
اللهم ارفع درجته في المهديين واخلفه في عقبه في الغابرين واغفر لنا وله يارب العالمين...آمين

آمين يا رب العالمين

شكرا على الموضوع وان شاء الله هنفذه فى القريب العاجل لانه فعلا مهم جدا

لا شكر على واجب

وفعلا الموضوع مهم وبيفرق كتير اوى فى قوة فرملة العربيه

[abo_lamar]

ربنا يرحمه ويدخله فسيح جناته ... انا كنت بكلمه وهو في المستشفى كان مرح وبيضحك زي عهدنا بيه دايماً ...
مواضيعك كلها مهمة وجميلة يا باشا شكراً على المجهود بس ليا سؤال .. ليه مش بفضي الزيت على طول من الماسترات الفرعية الأول وبعدين احط زيت الباكم في القربة بتاعته من جديد ؟

[dr.hany]

شغل رائع جدا

[waleedrahmy]

مجهود أكثر من رائع تشكر عليه

[د.محمود صلاح]

...................... لم أنسَ

شكراً جزيلاً لموضوعك وشرحك المميز

اسمحلي أضيف : - يجب بعد ذلك تجربة الفرامل والسيارة في طرق مفتوحة حتى تتاكد من عدم التسريب بعد القيام بهذه العملية

[nab!l]

تسلم يابو فارس
مواضيعك مفيده

[jojowork1]

شكرا علي الموضوع انا كنت لسه بسئل علي الطريقه بس مكتوب عندي علي الغطاء الاصفر ues dot.3 only كده لازم 3 ولا ينفع 4

[popahly]

تسلملنا مواضيعك يا بشمهندس عصام،،، ربنا يباركلك يارب

[bakkarahmed]

تسلم ايديك يا باشا...انا غيرت زيت الفرامل النهاردة وعملت كل الخطوات ماعدا بتاعة ماستر الدبرياج...+اني فكيت القربة بتاعة الزيت علشان كان لونها مسود شوية(وهي راكبة كبس وفكها سهل) وجربت الفرامل ولاقيتها تمام والبدال في نفس مشوارة الطبيعي
انا مالاقيتش dot4 so i used dot3 (french made) costs 12L.E
قولت اهو حاجة تمشي بردة...والف شكر علي مواضيعك الجامدة...كمان انا عملت الشغل اللي انت كنت عاملة في العربية عندك من قدام وشكلة عاجبني ...وتسلم يا باشا
View image: 1.jpg

[memofree]

بيجد مجهود فوق الرائع

[khalid9411]

نشكرك حبيبنا على مجهوداتك الكبيرة
الله يرحمك يا محمد جمعه وسكنه فسيح جناته
امييييييييين يا رب العالمين

[A.Saad]

تسلم ايديك