ايه يا جماعه دة هيا الماروتى بيتزودلها مياه فى الردياتير؟؟؟!!

[tito2020]

السلام عليكم

عربيه المدام الماروتى يا جماعه لقيناها بتسخن وطلعت انها لازم تتزود ميه هيا الماروتى مش زى بقيت العربيات ميه خضراء وخلاص على كده ولا ايه نظام الماروتى ؟؟؟؟

[M.Al-Hefnawy]

المفروض أنك بتخلي المية في القربة لغاية علامة max ... موضوع السخونية ممكن يكون عيب ثرموستات أو في تسريب في دورة المياه أو كهربة العربية مش مظبوطة.

[msa142]

قصد حضرتك ان القربة بتبقى مليانة على الماكس والرادياتير بيبقى فاضى ولا ايه ؟؟

[dr.hazem]

مبدئيا حضرتك مدتناش اي تفاصيل ولو بسيطه عن العربية
موديلها
كام كيلو
آخر صيانه دورية ليها


وعموما
لو اللي حصل معاك ان القربه كان فيها مية والراديتير فاضي فده غالبا عيب من غطا الريديتير



والماروتي زي غيرها بتتزود من القربه


تحياتي

[tito2020]

يا جماعه الى حصل ان المدام بلغتنى انها لقت القربه فاضيه تماما من المياه قامت ملياها ميه ومشيت تمام
النهارده جت تخرج بيها لقيت القربه فاضيه تماما مع صعود دخان ابيض من الشكمان
طبعا قلتلها متحركيهاش
ايه الموضو ده والقربه ممكن تكون بتسرب ميه ولا اخدها واروح على التوكيل احسن
الربيه ماروتى موديل 2011 عامله 3600 كيلو

[abogogo]

يا جماعه الى حصل ان المدام بلغتنى انها لقت القربه فاضيه تماما من المياه قامت ملياها ميه ومشيت تمام
النهارده جت تخرج بيها لقيت القربه فاضيه تماما مع صعود دخان ابيض من الشكمان
طبعا قلتلها متحركيهاش
ايه الموضو ده والقربه ممكن تكون بتسرب ميه ولا اخدها واروح على التوكيل احسن
الربيه ماروتى موديل 2011 عامله 3600 كيلو

كده اكيد في تسريب لمياه الراديتير ممكن او المروحة مش شغاله فبتالي يحدث بخر للمياه او طلمبة المياه المسؤله عن تقليب المياه عطلانه فبتالى ايضا يحدث بخر للمياه طالما العربية موديل 2011 يعني داخل الضمان فالافضل تشوف التوكيل وخد بالك لان العربية ممكن تجيب وش سلندر منك وانت رايح التوكيل ضروري جركن مياه معاك والكشف على المياه من القربة وتزويدها اول بأول

[dr.hazem]

زي ما قال اخويا العزيز ابو جنه

الموضوع مش صغير
واضح ان في تسريب ومش قليل لان بتقول الميه بتفضى من القربه والحقيقه لو الوضع سليم ممكن الميه متقلش ولا حتى في الصيف!!

فأكيد في تسريب
ضروري تاخدها للضمان وضروري يكون معاك الجركن وتنتبه ان الميه تفضى منك وانت ماشي وعينك على مؤشر الحراره

ايه الاحتمالات الوارده
اعتقد ان المشكلة كلها هيطلع خرطوم فلت في دورة المية وبالتالي الميه بتتسرب وفنفس الوقت بكميات كبيره وده اللي عامل المشكله

عموما روح التوكيل وان شاء الله خير

تحياتي

[hossamkia]

الرجاء الذهاب لأقرب مركز خدمة و الافضل ان تقطرها او تحملها على ونش (ان كانت الدخنة البيضاء من الشكمان كثيفة و نقص المياه شديد)
مع احضار الرخصة و دفتر الصيانة و ان كنت من سكان القاهرة فيمكن ان تذهب الى فرع المطار (آخر طريق السندباد) .هذا و ان كانت المشكلة عيب صناعة سيتم الإصلاح على حساب الضمان

[tito2020]

ان شاء الله يا جماعه انا حخدها على مركز الصيانه بكره
انا ورتها لميكانيكى جنبى مجرد ما حكيتلو قام فاكك حاجه كده فى الكبوت ( للاسف مش عارف اسمها ايه ) وقالى العربيه مطحنه يعنى عامله طحينه زيت على مياه ومرديش يعمل فيها اى حاجه وقالى دى فى الضمان وديها الصيانه
ايه رايكوا وممكن دا يكون ايه؟؟؟

[dr.hazem]

ان شاء الله يا جماعه انا حخدها على مركز الصيانه بكره
انا ورتها لميكانيكى جنبى مجرد ما حكيتلو قام فاكك حاجه كده فى الكبوت ( للاسف مش عارف اسمها ايه ) وقالى العربيه مطحنه يعنى عامله طحينه زيت على مياه ومرديش يعمل فيها اى حاجه وقالى دى فى الضمان وديها الصيانه
ايه رايكوا وممكن دا يكون ايه؟؟؟

لو مطحنه فعلا يبقى جوان وش سلندر ضرب غالبا

بس الحقيقه حاجه غريبه جدا ومتسبش التوكيل الا ونت واخد حقك لان كده غالبا عيب صناعه واضح


تحياتي

[hamaza81]

هو كدة الميكانيكي غالبا فك غطاء الزيت وبص فيه

اطلع على التوكيل - وأنصحك بفرع الدقي اللي هو في شارع حسين كمال جنب المطافي - وخد معاك كتالوج الصيانة وفاتورة صيانة الـ 1000
وخد معاك رقم وعنوان حماية المستهلك
لو حسيت أنهم هايحملوك مصاريف التصليح اطلب المسئول عن الضمان أو مدير فرع الصيانة
وقولهم انا هاشتكيكم في حماية المستهلك
اللي ممكن يحصل يقولولك هاتدفع مصاريف صيانة الـ 5000 نربطلك عفشة ونغير زيت - أعتقد دا ممكن يبقى مقبول لو هم صلحوا الجوان على حسابهم

[tito2020]

الى حصل يا جماعه انى روحت للتوكيل فرع الهايكستب وبعد الكشف قالولى ان وش السلندر مشروخ وهما بعتوا التقرير للضمان والمفروض الضمان يرد عليهم على اخر اليوم او تانى يوم الصبح وبالتالى سبتها عندهم

يا ريت تساعدونى ايه المفروض انه هيحصل وهل هترجع زيرو ولا خلاص كده علينا العوض؟؟؟؟؟

[ganash]

الى حصل يا جماعه انى روحت للتوكيل فرع الهايكستب وبعد الكشف قالولى ان وش السلندر مشروخ وهما بعتوا التقرير للضمان والمفروض الضمان يرد عليهم على اخر اليوم او تانى يوم الصبح وبالتالى سبتها عندهم

يا ريت تساعدونى ايه المفروض انه هيحصل وهل هترجع زيرو ولا خلاص كده علينا العوض؟؟؟؟؟

3600 كيلو ووش السلندر مشروخ !!!!! يغيرو الموتور فورا متخلهومش يعملو فيه حاجه ولا يصلحوه يغيروه ومتتنازلش عن حقك

[dr.hazem]

3600 كيلو ووش السلندر مشروخ !!!!! يغيرو الموتور فورا متخلهومش يعملو فيه حاجه ولا يصلحوه يغيروه ومتتنازلش عن حقك

وانا مع الرأي ده

يغيرولك ماتور يا اما حماية المستهلك ومتتنازلش عن حقك


تحياتي

[hamaza81]

صعب قوي تغيير الموتور
أعقتد ممكن يقولولك هايغيروا نص الموتور العلوي

إنما الاستهبال الصح انهم يقولولك هانلحمه