نتظيف الرشاشات خطوه بخطوه

[m_arazik]

السلام عليكم ورحمة الله وبركاته

انا لفيت كتير على حد قريب بينضف الرشاشات الترا سونيك لحد اما عرفت ان فيه واحد فى المعادى بيعملها


اولا امتى نبداء نفكر ننضف الرشاشات

1- تاخير دوارة السيارة على البارد او السخن
2- ضعف اداء المحرك
3- زيادة معدل استهلاك الوقود
4- عدم احتراق الوقود كليا
5- ضعف الاستجابة لدواسة البنزين عند الضعط عليها
6- رجرجة السيارة عند الدوارة او عند الطلوع من السكون

تعالوا ناخد جولة سريعة لمعرفة يعنى اية رشاش وازاى بيشتغل واية اللى بيحصل فية مع الشغل او نوعية البنزين الوحشة


ودى صورة المصفاه او الفلتر اللى فى اول الرشاش .. المصفاه دى وظيفتها تنظيف البنزين قبل ما يدخل الرشاش.. مع البنزين الى فيه شوائب كثيرة المصفاه دى بتتسد وممكن تؤدى الى تلف الرشاش بالكامل


طبعا الملف اللى موجود فى الرشاش وظيفتة فتح الصمام لدخول البنزين المدفوع تحت ضغط طرمبة البنزين وينزل من اخر الرشاش على هيئة رزاز

اواريكوا دلوقتى صورة الرشاش قبل التنضيف


خطوات تنظيف الرشاش على 3 مراحل

المرحلة الاولى هى تجربة وقياس الرشاش حيث يتم ضخ سائل التنظيف وهو عبارة عن سائل يشبه ال wd-40 ويتم روئية اتجاه الرش وكميته ويتم ذلك على محاكاة وضع السيارة بمختلف عدد لفات الموتور عن طريق الجهاز لمعرفة عيب الرشاشات



ثم بعد ذلك تفصل الرشاشات من على الجهاز لتوضع فى حوض ال اللالترا سونيك وهوه عبارة عن الحوض الموجود فى الصورة التالية ووظيفته تنظيف الرشاشات من الشوائب الموجودة داخلها عن طريق موجات اللاتراسونيك مع وجود سائل فى هذا الحوض يحتوى على مادة كاوية



ثم بعد ذلك يتم وضع الرشاشات على الجهاز مرة اخرى لاختبار تحسن الرشاشات

كل مرحلة بتاخد حوالى نصف ساعة

بعد كده بيطلع الرشاش نظيف ذى الفل ودى صورته بعد التنظيف


طبعا الفرق واضح جدا

ودى صور السوائل المستخدمة




ودى صورة كمية السائل المرشوش بعد تحسن وضع الرشاشات



ودى صورة البروشور بتاع الجهاز



الفرق بعد التنظيف فى دوران العربية اصبح اسهل بكتير كمان السحب زاد واستجابة العربية زادت.. استهلاك البنزين لسة ملحقتس احسبه بس كده كده مكنتش بشتكى من استهلاك البنزين . الرجة اللى فى العربية راحت وكله بقى تمام

اللى عمالى الرشاشات دى واحد فى المعادى اسمه مهندس \ مدحت دا راجل كان شغال فى توكيل مرسيدس وهوه محترم اوى وفاهم هوه بيعمل ايه و مريح فى التعامل ودى اهم حاجة

الموضوع ده كله اتكلف 100 جنيه وساعه ونصف وقت

ومكانه كالاتى

هتدخل فتحة المعادى 2 وهتطلع الكوبرى اللى بيعديك شريط المترو هتنزل هتاخد تانى شارع شمال هتمشى لحد ميدان سوارس هتلف الميدان وتدخل ناحية شارع 9 بعدين اسال على مكتب صحة المعادى اول ما توصل هناك اتصل بيه هيجيك من عند ورشته بعد دقيقتين وده رقم تليفونه
0109712688

ارجو انى اكون افادتكم من التجربة دى واللى عربيتة تتصلح يدعيلى والسلام عليكم ورحمة الله وبركاتة

[x_gomgom]

شكراً على نقل التجربه و المعلومات المفيده...
جزاك الله كل خير

[ecybrarian]

موضوع اكتر من ممتاز..يا ريت حضرتك كنت حطيته في الورشة كي يستفيد منه اكبر عدد من الأعضاء..بس اسمح لي اضيف إن الأعراض الستة إللي حضرتك عرضتهم هم اعراض مشتركة ممكن تظهر لأسباب اخرى غير الرشاشات. علشان كده الأعراض دي لما تظهر لواحد مواظب على تغيير الزيوت والفلاتر والبوجيهات واسلاك البوجيهات....إلخ يبقى عليك وعلى تنظيف الرشاشات على طول..

حاجة تانية، في ناس بتنصح بعمل تنظيف للرشاشات مع تغيير سير الكاتينة (يعني كل 60 الف) او على الأقل كل 100 الف كيلو حتى ولو أداء العربية مافيهوش مشكلة..
وفي الآخر انا عندي سؤال، هل سائل تنظيف الرشاشات يمكن ان يغني عن تنظيف الرشاشات بجهاز الألترا سونيك؟؟؟

[popahly]

ألف ألف شكر جزاك الله كل خير

[m_arazik]

هوه فعلا الرشاشات بتتنضف كل 60000 كيلو وسائل التنظيف لا يغنى عن اللالتراسونيك

ملحوظة زز متستناش على سير كاتينة الانوس بالذات 60000 لانه غالبا هيقطع كفاية عليه اوى 40000 عن تجربة زز هتغير صبابات وهتبقى مشكلة

[alexcdx]

ماذا لو الكويل بتاعه يكون ضعف هل فى أختبار له حتى لو مش قاطع؟

[N.a.j.d]

تمااااااااااااااام

[adeeb]

جزاك اللة خيرا

[TOOLA]

موضوع رائع

[TOOLA]

بس ده بيتعمل لاى سيارة عادى (أنا سيارتى بورا م 2000) م حاسس بضعف فى السحب و و بتسحب بنزين كثير و ماشيو 96000ك.

[M_Nabil]

جزاك الله خير كويس انك فكرتني بموضوع الرشاشات دة ان شاء الله اروح عندة في اقرب فرصة والموضوع ينفع لكل العربيات الانجكشن

[ahmed_h_g]

تمام الله ينور عليك
مهندس مدحت راجل محترم جدا" وفاهم هوه بيعمل ايه
أنا جربته فى أكتر من عربيه
الف شكر عالأفاده .

[tompina]

أنا قرأت هنا في المنتدى إن تنضيف الألترا سونيك مش بينفع غير لرشاشات البي إم..
طيب أنا معايا رشاشات هيونداي .. ينفع تتنضف ؟

[wanderer]

ممكن اعرف عنوانه بالتفصيل لو هاروحله من مصر الجديده
او من الدائرى علشان انا مش عارف المعادى كويس

وياسلام لو عرفت تحطه على جوجل ايرث

[BaherSamir]

الله أكبر عليك يا مدحت تسلم إيدك

السلام عليكم ورحمة الله وبركاته
أحب أوضح للأخوة ان الموضوع ده فرق معايا شخصياً بجد ياجماعة أنا إتخرب بيتى من موضوع سوائل التنظيف الموجودة فى كل البنزينات بس لما رحت لمدحت اتوهمت من دقة الشغل والكفاءة والجهاز. أنا أمتلك سيارة سكودا فابيا 1400 سى سى كانت بتعمل معايا فى الصفحية داخل البلد الجميلة 140 كيلو متر وطبعاً الطريق الدائرى اليومين دول زى ال؟؟؟؟؟ ولكن بعد ما كنت عند مدحت والموضوع اخد حوالى ساعة ونصف لأن الرشاشات عندى كانت حالتها وحشة جداً بس مدحت عنده ضمير جداً جداً جداً الله أكبر عليه وعلى شغلة ما بيسلمش الرشاشات بعد التأكد بسبة 100% انه تمام وبيطلع معاك تجرب وتشوف الفرق فى كل حاجة. والعنوان مكتوب وميتوهش وبجد يا جماعة الموضوع يستاهل أنا عربيتى كانت عاملة 130 الف كيلو ولكن بعد التنظيف اصبحت حاجة تانية خالص. والسلام عليكم ورحمة الله وبركاته.
أخوكم / باهر محمد سمير