جديدة فى السواقة

[nadeen]

سلام عليكم ورحمة الله وبركاته

انا جديدة فى السواقة يا جماعة ، أخدت لغاية دلوقتى 3 حصص على عربيتى اوتوماتيك بس الحصص وقفت لأنى مش عارفة اطلع رخصة والمدرب خايف يطلع بيا وسط البلد علشان المرور.. انا كنت عايزة اعرف منكم هو انا لازم يكون عندى واسطة علشان اطلعها؟ وكمان انا خايفة جدا من امتحان السواقة ، يا ريت حد يطمنى ويقول لى ازاى امسك اعصاب اصل انا بخاف من اى امتحان والسلام وامتحان السواقة ده عامل لى رعب ..

[Devilishguy]

انتي لو تبع وحدة التراخيص بتاعت التجمع الخامس احب اطمنك اوي لانه اولا مش امتحان وثانيا حتنجحي ان شاء الله من غير واسطة....
انا طلعت رخصة السنة اللي فاتت من غير واسطة ولا باشيش ولا اي حاجة و في نفس اليوم كمان (معرفش نظامهم ايه السنادي)..
المهم بس تروحي بدري عشان زحمة موووووووت....
اسف للاطالة بس لو في اي استفسار انا موجود..

[Abdm]

أولا : هل أنتى هتدخلى الآمتحان بعربيتك ممكن تلاقى صعوبة بيها لو كانت كبيرة. دية نقطة .
ثانيا : وهل عندك مشكلة تدربى على عربية منيوال وتكون صغيرة تبع مركز تدريب سواقة وتدربى بيها مع المدرب أو مدربة فى أى مكان هيكون على مسئولية مركز التدريب وتأخذى حصص كتيير يعنى مثلا حتحتاجى بتاع حوالى من 14 : 20 ساعة حسب ظروفك علشان تأخذى ثقة وتبقى كويسة نوعا ما لآن على فكرة السواقة بالممارسة الكتيير لفترة طويلة .ومركز التدريب هيسعدك بعد كدة فى أستخراج الرخص وتدخلى الآمتحان بالعربية الصغيرة هتكون عربية صغيرة وسهلة التحكم فيها

ثالثا : وأهم حاجة بردة تتمرنى عليها وتحفظيها قبل ما تمتحنى السواقة ألا وهى الآشارات وفى مواقع على النت للموضوع دة ذى سائق المستقبل علشان الاشارات دية ما تستهتريش بيها هى اللى ممكن تتضيعك
رابعا : توكلى على الله أولا وأخر وأحفظى الآشارات كويس جدا وتدربى كويس على السواقة وبلاش عربيتك نصيحة وان شاء الله مع كتر الساعت التدريب تنجحى من غير وسايط ولا حاجة .بس شرط تخلصى التدريب من هنا تمتحنى من هنا أو تستمرى فى السواقة لغاية ما تدخلى الآمتحان علشان مستوى التدريب اللى هتوصليلوة ما يضعيش . واللة الموفق

[د.محمود صلاح]

ارى انك حضرتك تتدربى كويس على السواقة عشان تخشى الإمتحان من غير ارتباك

[nadeen]

عربيتى اللى بتدرب عليها اوبترا وكنت ناوية ان شاء الله ادخل بيها الإمتحان بس خايفة من حكاية كبيرة دى ، ايه رأيكم؟

[Terrible_DaRsH]

فعلا , و هتدايقك و انتى راجعة ..

انصحك بعربية هاتش باك احسن ..

[Eng.Geo]

انا دخلت بنيسان صني
وطبعا النيسان ماتتوصاش
وانا داخل كنت داخل جري وانا ماك الدركسيون بأيد واحدة وانما وانا راجع كانت اصعب كنت مركز اكتر
اعتقد الاوبترا اصغر شوية ( لو عرفتي تشوفي عربية هاتشباك يبقي افضل )
لازم تبقي داخلة وانت عاملة حسابك انك هتنجحي
اوعي تخافي وحاولي تجربيها الاول بره
وطبعا هتخشي من غير ماتلمسي دواسة البنزين عشان ماتنطش منك ( رجلك علي الفرامل بس تخفي رجلك من عليها عشان تمشي وتدوسي عشان تقف )
الامتحان هيبقي سهل ان شاء الله ولو في واسطة يبقي احسن عشان في ناس معندهاش دم وممكن يرخموا
لو في اي استفسار انا في الخدمة

[Mar80]

اعتقد انك لو اتعلمتى في المدرسة اللى تبع المرور ممكن تطلعي الرخصة اسهل و الله اعلم

[nadeen]

ألف شكر لكل اللى اهتم ورد عليا ومعلش يا ريت تستحملوا أسئلتى اليومين دول لغاية لما الموضوع ده يخلص على خير..

[Eng.Geo]

ألف شكر لكل اللى اهتم ورد عليا ومعلش يا ريت تستحملوا أسئلتى اليومين دول لغاية لما الموضوع ده يخلص على خير..

ان شاء الله يخلص علي خير
ومنورة نايل موتورز:)

[DR/WAFEK]

انا رائى ان المشكله مش فى الرخصه المشكله انك جايبه عربيه غاليه تتعلمى عليها انصحك اتعلمى على اى عربيه تعبانه ومتطلعيش بالاوبترا الى فى اوقات مش زحمه لحد ما تتقنى السواقه تمام وتعرفى ابعاد العربيه كويس وانصحك تركبى حساس ركن للعربيه لانك لسه جديده دا اولا ثم لانك بنت والبنات مشهولرين بمشاكلهم مع الركن اما مشكله الرخصه دى مش مشكله رائى خشى مدرسه وبعد شهر هتنجحى اوتوماتيك لا مفيش حد بيدخل المدرسه ويسقطوه وان اقصد طبعا مدرسه المرور مش بره

[ramy2005]

ألف شكر لكل اللى اهتم ورد عليا ومعلش يا ريت تستحملوا أسئلتى اليومين دول لغاية لما الموضوع ده يخلص على خير..

مع أحترامى واعتذارى لرأى الاعضاء الا ان الروتين فى مصر يخليخى تكرهى السواقة والعربية
انا طلعت الرخصة ب 700 جنيه من غير معرف اسوق ولا امتحان ولا..............
ولو طلعتها قانونى هاخذ من 3 الى 6 شهور مرة يسقطك سواقة ومرة اخرى اشارات
ولو بتفكرى تتعلمى على عربيتك انصحك اولا تتعلمى على عربية مانيوال ولما تتاكدى انيك متمكنة من السواقة سوقى عريتك لان انا اتعلمت على عربيتى بهدلتها وخبطتها كتير بس الحمد لله انا دلوقتى بقالى سنة ونصف بسوق
واسف للاطالة

[M.Zaher]

يا جماعه الموضوع اسهل من كده ان شاء الله
كل الحكايه حفظ و بس
لان امتحان السواقه زي جميع الامتحانات بتاعتنا احفظ هاتنجح

ازاي
اقولك
وانت داخل طبعا سلانسيه
اول ما القمع اللى على الشمال يجي على اول بوز العربيه الشمال ويبقى قصاده بالظبط اكسر كل الدركسيون شمال و خليك باصص على بوز العربيه اليمين اول ماتلاقيه قصاد القمع اللى في النص اكسر كل الدركسيون يمين طبعا سرعه الكسره حسب سرعه ما العربيه ماشيه

و بعدين لقيت بوز العربيه دخل في القمعين اللى في النص والعربيه عدت خلاص اظبط على القمع الاخير على الشمال هاتلاقي نفسك عديت الاقماع رايح

وانت جاي بقى
بص في المرايه اليمين على القمع اللى في النص و ارجع اول مايجي عند مؤخرة العربيه اليمين اكسر كل الدركسيون يمين هاتلاقي العربيه عدت القمعين اللى في النص اول ماتعدي لف وشك الناحية التانيه على المرايه الشمال و بص على اول قمع خالص و اظبط عليه
وبس كده هاتلاقي نفسك عديت وانت راجع

والله العمليه حفظ و خلاص واعمل الاختبار حوالي عشر مرات هاتلاقي العمليه ميه ميه

[juba8]

اتعلمى فى مدرسه خاصه ..عشان التعلم
وبعدين
قدمى فى مدرسه المرور ...عشان سهوله الحصول على الرخصه

اللى بيقدم مدرسه فرصته احسن فى النجاح

[A.Saad]

[COLOR="Indigo"]صباح الخير
فيه حاجة اسمها رخصة تعليم
اعرف ان اللى بيطلعها المدرسة بتاعت المرور قبل ما تاخدى رخصتك
فشوفى هل ممكن تطلعيها وانتى فى المدرسة الخاصة ولا لا

يعنى تروحى المرور وتسالى او المدرسة بتاعت المرور وتسالى
تانى حاجة
المدرب بتاعك خواف شوية هوا ممكن يكون خايف

انا اتعلمت الاول على عربية المدرب
واما شديت حيلى جبت عربيتى وكملت تعليم عليها
وده افضل علشان اكون عرفت حساسية الدواسات
عرفت الدوران والملفات

عربية المدرب فيها فرامل زيادة يقدر يدخل لو حصل حاجة لا قدر الله [
وعلى فكرة المدقب بتاعك شكله خواف شوية




/COLOR]