وظيفة الموبينة

[ashrofa72]

ارجاء من رجالة المنتدى توضيح وظيفة الموبينة وفايدتها فى العربية وهل الموبينة لو باظت يبقى في اثر زيت فى الموبينة يخلينا نحكم عليها انها باظت وتخلى العربية تتأخر فى الدوران طبعا المعلومة دى واحد قلى عليها وانا طبعا مش عارف اذا كانت معلومة صحيحة ولا ايه وطبعا العربية هيونداى اكسيل 1500 وشكراً.

[Nader]

اهلاً بك يا اخ اشرف في نايل موتورز:)

المبينة هي احدى المكونات الكهربائية بالسيارة وهي تقوم باستقبال وتكرير الـ12 فولت القادمين من البطارية وتحويلهم الى الاف الفولتات التي تحول اخيراً الى الاسبيراتير ومنة الى البوجيهات لحرق مخلوط البنزين والهواء بداخل الموتور.

اما بالنسبة لاعراض تلف الموبينة، فمنها التاخير في الدوران والتقطيع او وجود لخبطة في عملية الحرق وعدم التجميع...

=============

وطبعا العربية هيونداى اكسيل

الموبينة وظيفتها واحدة في كل السيارات

[ashrofa72]

شكراً جزيلا يا استاذ نادر على الرد الوافى ده ومعلش استفسار عن سعر الموبينة دي فى حدود كام وهل معلومة ان الموبينة لو باظت يبقى فيها اثر زيت طالع منها ولا دى معلومة خاطئة.

[Nader]

بصراحة معنديش فكرة عن سعرها ، لو عرفت انت قول لي:)، اما بالنسبة لموضوع الزيت فهي كما وضحت لك من قبل من المكونات الكهربائية، يعني مش بتجيب زيت وعندما تتلف لا يظهر شئ بالنسب للشكل الخارجي.

[ashrofa72]

ماشى لو عرفت سعرها حقولك اول ما اعرف.اصلى احتمال يكون تأخير الدوران منها بس لما اتأكد.

[Nader]

ربنا معاك، بس ابقى اكشف على البوجيهات الاول.

[hazem_khidr]

الموبينه ببساطه عباره عن ملف رومكورف اللي اخدناه في الفيزيا و دا بياخد ال 12 فولت بتوع البطاريه و يقويهم و يوصلهم للاسبراتير اللي بدوره بيوزعهم علي البوجيهات.
الموبينه لما بتبوظ بتلاقيها بتسخن و العربيه تقطع في المشي و تقف خالص لحد ما تبرد و تعرف تشغل العربيه تاني.اما حكايه تخير الدواره دي اول مره اسمع عنها

[ashrofa72]

يعنى يا استاذ حازم الموبينة ملهاش علاقة بتأخير الدوران لان الاعراض اللى حضرتك قلتها مش فى العربية ممكن على فكرة البرد له علاقة كبيرة بموضوع التأخير فى الدوران لان ملاحظ فى عربيات كتير بتعانى من الموضوع ده وشكراً.

[hazem_khidr]

لا يا استاذ اشرف الموبينه لو باظت او بتبوظ بتقطع.
ممكن حضرتك تغير البوجيهات احتمال كبير تكون مرطبه و قيس ميه البطاريه و قيس شحن الدينامو و ان شاء الله حاجه من دول هيا اللي حتكون بتعمل كده

[mohamadyoussif159]

انتوا ناس زى العسل

[wael6]

السلام عليكم
اكسيل مو 95 1500
العربيه بتغيب فى الدوار لما بتفصل وهى سخنه بتدور مثلا بعد رابع او خامس مره
لكن وهى بارده بتدور علطول او من تانى مره بالكتير
هل ده عيب موبينه ولا شئ آخر
وشكرا جزيلا

[wael6]

الحمد لله على كل حال
اشتريت مشط للاسبراتير استيراد ب 300 ج
وكان فيه تايوانى ب 90 ج بس بيقولوا وحش
وفى نوع ب 190 مكتوب عليه متسوبيشي برده قالوا مش مضموت
ربنا يستر ع اللى جبته ده
ومصنعيه 70 ج
هل فيه جهاز يكشف مدى صلاحية المشط والموبينه ولا مفيش اصلا
1- وهل زرار فصل الكهربا عن الموبينه للامان بيضر الموبينه ولا لا ؟
2- عطل لما بتكون سخنه وتفصل واجى ادورها بتغيب فى الدوارة
3-عندى عيب فى كتاوت الدينامو ورعشه فى النور وضعف ولما بدوس بنزين بيزيد ويثبت// هل كده وضع الدينامو يسبب مشكله غير كده ؟؟
4- انا لما اجيت اعمل نص عمره لقيت الشمايز ناعمه ومخرطتش قبل كده والكرنك سليم وركبت طقم شنبر وغيرت بساتم فقط استاندرد
فوجئت النهارده بميكانيكي اخر اللى عملت مشط الاسبراتير
بيقولى كان الافضل تجيب بساتم اكبر من الاستاندر وتخرط الشميز والكرنك وتغير سبيكه
عشان المكنه عندك جرشه وخشنه
عشان يبقي الشغل نظيف
هل كان لازم حتى مع سلامة الشمايز والكرنك ان اخرطهم واغير السبيكه
ولا المطلوب اتعمل وخلاص
5- فبرة تقليب النقلات بتاعة الفيرنا تركب ع الاكسيل ولا لا
وهل رجلشة عصايا الفتيس خلاف الفبره ولا تغيير الفبره يكفي لزوال الدقره اللى فى النقلات
خصوصا ان دلوقت اللى تاعبنى فى العصايا النقله ع التالت فقط الدقره بتبان اكتر
وما الطريقة المناسبه لرجلشة العصايا
ارجو الاجابة المستفيضه للخمس نقاط ارجوكم
ولكم جزيل الشكر والامتنان

[l0new0lf]

شكراً جزيلا يا استاذ نادر على الرد الوافى ده ومعلش استفسار عن سعر الموبينة دي فى حدود كام وهل معلومة ان الموبينة لو باظت يبقى فيها اثر زيت طالع منها ولا دى معلومة خاطئة.

فيه انواع موبينه بيكون فيها زيت من الداخل و فيه انواع مفيهاش
و برضه فيه انواع بيكون فيها مقاومه فى الداخل و فيه انواع المقاومه خارجيه بتركب عليها من بره
نضف الموبينه الاول ببنزين و نشفها و تابع لو لقيت زيت تانى غيرها
فيه نوع يابانى فى التوفيقيه ب 65-75 جنيه انت و شطارتك

[Lobnas]

سعر الموبينة

سعر الموبينة الاصلي الgm ١٥٠٠ جنيه لكن في كوري ماركه امريكي اسمها ديلفي ب ١٠٠٠ جنيه و دول اضمن نوعين في غير دول صيني من ٤٠٠ ل ٦٠٠ جنيه بس مبتعيش