المساعدين ودورها فى العربية

[ahmedshafei77]

السادة

لما باجى اخد مطب بحس ان فيه صوت زى هوا بيتنفخ طالع من العربية من ورا

هل ده المساعدين فيه مشكله ولا ايه وده بيبقى فى المطبات بس

كأن حد بينفخ هو


شكرا

[sab3aawy]

انت عندك سؤاين ، سؤال فى عنوان الرسالة وسوؤال فى محتوى الرسالة

بالنسبة للسؤال فى عنوان الرسالة:
المساعدين ودورها فى العربية
الاجابة: المساعدين او ممتصات السرعة هى عائق تفاضلى مكانيكى من الدرجة الثانية يضاف الى نظام تعليق السيارة لكى يقوم بخمد الشق التكاملى Integral من المركبة الرأسية لحركة السيارة اثناء مرورها على ارضية غير مستوية....................إنشاللا يا رب ان كنت فهمت حاجة من الكلام ده اطفحه بس المصيبة ان هو ده الكلام اللى كانوا بيدرسوهولنا فى هندسة عين شمس من 16 سنة، علشان كدة محدش مننا فلح :) ، لكن عموما لو ترجمنا الكلام ده الى اللغة العربية هنلاقى ان المساعدين هى وكما يوضح اسمها بالفصحى(ممتصات الصدمات) اداة بتتركب على كل عجلة علشان تقلل من سرعة حركة العجلة لفوق ولتحت فى المطبات علشان متهبدش فى العربية، والمساعدين لها خاصية تصميمية لطيفة هى ان كل ما سرعة حركة العجلة(لفوق ولتحت) فى المطب زادت ، كل ما قوة المساعد فى مقاومتها تزيد، يعنى قوة مقاومة المساعد للخبطة بتناسب طرديا مع قوة الخبطة، وهو ما لا يتوفر فى سوستة السيارة، السوستة بتقاوم بقوة ثابتة لا تتغير بعكس المساعد الذى تزيد مقاومتة مع زيادة قوة المطب ، علشان كدة لو عندك مساعد بايظ أو خفيف ممكن متحسش بالمطبات البسيطة التى تتناسب مع قوة مقاومة السوستة لكن تحس بالهبد فى المطبات العنيفة
اما بالنسبة للسؤال الثانى الخاص بصوت الهسيس اللى انت بتسمعه فهو فعلا من المساعد وهو ليس صوت هواء وانا صوت حركة زيت المساعد من اعلى مكبس المساعد الى اسفله ومن اسفله الى اعلاه عبر الثقوب الضيقة المخصصة لهذا الغرض( وبالمناسبة هى دى الطريقة اللى المساعد بيخمد بيها الهبدة بتاعت المطب، انه بيستغل قوة الهبدة فى الضغط على المكبس المرتبط بعمود المساعد لكى يحركه الى اعلى وأسفل داخل اسطوانة المساعد عبر مقاومة الزيت الذى يملأ المساعد والذى ينتقل من اسفل المكبس الى أعلى وبالعكس عبر ثقوب ضيقة تمتص قوة الصدمة)، وهذا الصوت طبيعى جدا وهو جزء من اسلوب عمل المساعد ولا يمثل اى مشكلة من أى نوع


الموضوع ده هتاقى فيه معلوامات وافية عن المساعدين

http://www.nilemotors.net/Nile/1215-5.html

[samirayad]

إنشاللا يا رب ان كنت فهمت حاجة من الكلام ده اطفحه بس المصيبة ان هو ده الكلام اللى كانوا بيدرسوهولنا فى هندسة عين شمس من 16 سنة، علشان كدة محدش مننا فلح :)

والله ياخالد باشا
أنت فكرتنى بزميل وصديق كنت بأتكلم معاه
وعمال أقنعه
أن علم الهندسه من أعقد العلوم على وجه الأرض

فى نظرى
أعقد من العلوم الطبيه كمان بكثير

كفايه أنك فى الطب بتتعامل مع منظومه ( زى الأنسان بيقدر يعبر عن آلامه )

أما فى الهنسه ( فأنت لازم تعيش دور المريض والطبيب علشان تشخص الحاله صح ...وده دور الهندسه الفراغيه

بتحاول تمشى مع الأحداث بمخيلتك )

لأنك بتتعامل مع جماد ( المنظومات الهندسيه )

تخيل بأه بتتعامل مع جماد
وبتحاول تشوفه بيشتكى من أيه

نفس الوضع لو شبهنا بحالات طبيه

فلو فرضنا

دخل على طبيب أنسان مريض أخرس

حيقدر الطبيب يعرف شكواه زى مايكون سليم وبيتكلم

بالطبع لا

[ahmedshafei77]

باش مهندس سبعاوى ربنا يخليك على ايجاباتك الوافية


وشكرا