عندي مشكلة فظيعة مع الغيارات!!!

[M.Radwan]

ازيكم يا وحوش
بسم الله ما شاء الله القسم التعليمي في المنتدى من أفضل الأشياء
اللى شوفتها في حياتي.
استمتعت بقراءة مواضع المهندسين سبعاوى وسمير عياد وغيرهم
ربنا يباركلكم يارب

سؤالي يتلخص في إنى جديد في السواقة، وجيبت رينو لوجان جديدة
أنا بعرف أعمل كل حاجة الحمد لله، عمرى ما خبط في حاجة أو قابلتنى مشكلة في الركن او المرور في الشوارع الضيقة
المشكلة بقى، إني مش عارف امتى انقل؟!!
يعنى دلوقتى أول ما اطلع بالعربية، هل ينفع أمشي على الأول لفترة طويلة
إذا كان الطريق اللى ماشي فيه كله مطبات وكده
ولا أطلع العربية بالأول وبعدين أنقل على التانى علطول؟!
نفس المشكلة بتحصل عند المطبات
هل أنزل من الغيار التالت أو الرابع الى الأول لما أهدي قبل المطب؟
ولا أنزل على الغيار التاني؟
السؤال التالت بقي، لما أنقل بين الغيارات، هل أسيب الدبرياج مرة واحدة
ولا أسيبه بالراحة مع دوسة البنزين؟

[meeg]

اولا الف مبروك على السياره الجديده وربنا يعطيك خيرها ويصرف عنك شرها
بالنسبه لموضوع النقلات الاول ده لبدايه تحريك السياره فمطولش عليه انما لو على مطب فلو المطب خفيف وانت هديت بس مش لدرجه الوقوف فسقط الغيار التانى وامشى انما لو وقفت على المطب سقط الاول علشان العربيه متبطلش
وموضوع النقلات ده انت هتحس بصوت الماتور
انا قولتلك اللى انا عارفه وياريت اكون افدتك
وربنا يوفقك

[sab3aawy]

القاعدة الذهبية للغيار: لو انت ماشى براحتك خلى الموتور من 2000 الى 3000 rpm وغير على هذا الأساس، يعنى كل ما تلاقى الrpm قربت من 3000 ادى الغيار الأعلى، كل ما تلاقى النقلة هتنزل عن 2000 ادى الغيار الأقل، لو انت قارص على العربية او فى مطلع زود على الأرقام دى 500 RPM
بالنسبة للمطبات والملفات: المطبات العالية جدا والمنخفضة جدا تتاخد على الأول ويفضل التوقف التام ولو لنصف ثانية قبلها لتبييت الغيار الأول بدون مشاكل، المطبات اللى ينفع تتاخد اسرع قليلا تتاخد على التانى، الملفات العمودية(يعنى هتحود فى شارع يمين او شمال) تتاخد على التانى

قدر الامكان متمشيش على الأول كتير

الدبرياش بندوس عليه مرة واحدة( كل مشوار الدبرياش فى خلال 1 ثانية) ونسيبه بالتدريج مع كل الغيارات، طبعا بنسيبه بطيئ جدا مع الأول(يعنى فى حدود 5 ثوانى مثلا) ، وبنسيبه اسرع شوية مع التانى والتالت( فى حدود 3 ثوانى مع كبس البنزين قليلا لمساواة سرعة الموتور بسرعة حركة العربية) ، وبنسيبه اسرع مع الرابع والخامس (ثانيتين مثلا) وفى النهاية احساسك بعربيتك هو الى بيحكمك، اللى انت محتاج توصل له ان العربية لا تجعر منك وانت ماش او وانت بتنقل، ولا تهبد منك وانت بشتيل رجلك من على الدبرياج

[Abdm]

الله ينور عليك يا بشمهندس سبعاوى ومنور يا باشا ويبارك فيك يا رب ويستر طريقنا جميعا يا رب العالمين وجزاك الله خيرا

[M.Radwan]

بارك الله فيكم
سؤال تاني معلش
هل بيحصل للموتور مشاكل كبيرة لما يبطل مني عند الطلعة
أو لو اديت الغيار الغلط والعربية بطلت؟

[sab3aawy]

بارك الله فيكم
سؤال تاني معلش
هل بيحصل للموتور مشاكل كبيرة لما يبطل مني عند الطلعة
أو لو اديت الغيار الغلط والعربية بطلت؟

لأ مبيحصلش مشاكل للموتور لكن ممكن تحصل شتائم لو ده حصل منك فى تقاطع مزدحم :)

[وائل عطية]

لأ مبيحصلش مشاكل للموتور لكن ممكن تحصل شتائم لو ده حصل منك فى تقاطع مزدحم :)

هههههههههههههههههههههههه

[M.Radwan]

لأ مبيحصلش مشاكل للموتور لكن ممكن تحصل شتائم لو ده حصل منك فى تقاطع مزدحم :)

هههههههههه
ربنا يكفينا شر الشتائم
متشكرين يا هندسة.

[kamatsho85]

طيب بخصوص نقل الغيارات التنازلى . انا مثلا ماشى على الرابع وواجهتنى اشارة بعد مسافة لما باجى انزل للاول او التانى بسمع صوت العربية بيعلى جدا ... اعمل ايه ؟

[Moe86]

يبقى بتديها غيار أقل من اللى محتاجاه
يعنى بتديها تانى مثلا بدل تالت

[M.Osman]

ولا تهبد منك وانت بشتيل رجلك من على الدبرياج

شكراً بشمهندس على الإفادة..

بس للأسف حتى الأن و بعد اكتر من سنتين سواقة ... لما سرعتي بتقل و بنزل لغيار اقل العربية بتهبد مني خصوصاً لو مشغل التكييف.... بس مش على طول... ساعات و ساعات.. فعلاً على حسب قدمي

و للأسف معنديش عداد RPM

[د.محمود صلاح]

لأ مبيحصلش مشاكل للموتور لكن ممكن تحصل شتائم لو ده حصل منك فى تقاطع مزدحم :)

يا ما حصلتلي وان مستجد

[sab3aawy]

بالنسبة للغيارات التنازلية متعشقش الفتيس وانت بتتباطأ، يعنى سيب السرعة تنزل براحتها وانت إما على الغيار العالى او ممور، وقب ما تحط رجلك عى البنزين عشان تعيد اتسارع عشق الغيار المناسب طبقا للجدول الآتى:
السيارة توقفت تماما : الأول
من 5 الى 30 الثانى
من 30 الى 50 الثالث
من 50 الى 70 الرابع
اكثر من 70 الخامس

[Abdo_Eldesokey]

ربنا يجزيك خير يا بشمهندس سبعاوي

أنا بقى عندي سؤال ، بالنسبة للعربيات الي مفهاش rpm إيه المقياس ؟؟

أنا عندي في الـ 128 بحب أحرق على الغيارات ، والعربية مش بتقول لأ ، يعني التالت بيوصل معايا لـ 90 مع إن الموتور 1100 سي سي ، فهل كده أنا بظلم الموتور معايا ؟