هو يعنى اية نسب الجير (الفتيس)

[ahmedbasto]

هو يعنى اية نسب الجير يا جماعة

[ahmdmagdy]

علي حسب معلوماتي هو تقسيم سرعه العربيه علي الفتيس يعني مثلا الاول من 0 الي 40 و التاني من 40الي 60 و التالت من 60 الي 90 و الرابع من 90 و طالع

[yoko]

نسبة الجير على حسب علمي هو النسبه بين الترس الي في الكرنك شافت لنسبة الترس الي متوصل بالعجل (وده بيختلف من عربيه لعربيه) أو العكس يعني الترس الي متوصل بالعجل للترس الي متوصل بالكرانك شافت مش فاكر بصراحة
وكل ما الترس الي على العجل يصغر يقل العزم ويزيد السرعة

[ahmedbasto]

شكرا يا جماعة

[amrelsaqqa]

انت بيبقى عندك ترس جاى من الموتور

الترس ده بيركب على ترس معين في الفتيس حسب النقلة

طبعا الترس اللى جاى من الموتور ده حجمه ثابت
مع كل نقلة بتعشق معاه ترس مختلف من الفتيس وتنقل الحركة للعجل



هنعتبر في الصورة الترس الصغير هو الثابت الى جاى من الموتور والترس الكبير هو ترس الغيار الاول

في الغيار الاول الترس الى في الفتيس بيكون اكبر بكتير من الترس اللى جاى من الموتور
بحيث مثلا لو الموتور لف 4 لفات ، ترس الفتيس والعجل يكون لف لفة واحدة بس

بحيث يقلل السرعة بس في نفس الوقت يزود العزم اللى العربية محتاجاه في الطلعة بحيث تتغلب على الممانعة الى بتلاقيها في الطلعة العادية او طلعة المطالع ..

( عزم الطلعة ممكن تشبيهه هنا بركوب العجلة ، وانت واقف خالص اول ما تيجى تبدل وتطلع بيبقى البدال تقيل جدا ويبدأ يخف مع السرعة )

وبكدة حسب الاحجام بتاعت التروس كانت نسبة الغيار الاول 1/4 او 0.25 مثلا

بعد كدة العربية اتحركت خلاص فمحتاجة عزم اقل وفي نفس الوقت محتاجة سرعة اعلى ، تقوم معشق التانى اللى ترسه اصغر شوية من الاول ، ومثلا نسبته 1/3 او 0.33 وبكدة العزم يقل بس السرعة تزيد بحيث العجل يلف لفة كل 3 لفات موتور مثلا مش 4

وهكذا التالت اصغر والرابع اصغر واصغر وغالبا الرابع بتكون نسبته 1/1 يعنى الترسين قد بعض وبيسموها direct drive والخامس او الغيارات الاعلى ممكن نسبتها تزيد عن 1 بحيث تدى سرعة اعلى من سرعة الموتور الاصلية بس طبعا تزويد السرعة اوى بيقلل العزم جامد و اكيد طبعا فيه حد معين للعزم ما ينفعش يقل عنه عشان تفضل العربية ماشية عشان كدة ما بيعملوش سادس وسابع وتامن الا في العربيات اللى مواتيرها ضخمة جدا وعزمها جبار ولها مؤهلات تمشيها على سرعات عالية بأمان

[abdelmessih67]

الاخ الفاضل أحمد

شكرا للأخ عمرو السقا على رده و سأضيف أضافة بسيطة على كلامه أن هذه النسبة بتكون حسب عدد الاسنان الموجودة بالترس
يعني الترس الاول عادة بييكون عدد اسنانه 5 أضعاف الترس المعشق معه و القادم من input shaft القادم من عامود جانبي
متصل بترس خارج من الحدافة أو ال flywheel و لهذا يعطي عدد لفات يماثل 20% أو خمس عدد لفات الترس الجانبي في حالة العربية ال 5 نقلات .



لا يشترط طبعا ان يكون قطر الترس خمسة أضعاف الترس الجانبي بل النسبة في عدد الاسنان و كما قال الاخ عمرو تزيد النسبة بين حركة عدد لفات عامود الاخراج و الحدافة لتصل الى 100% في الترس الرابع و 1.1 أو 1.2 في حالة الخامس و السادس .

و هذه صورة ثلاثية الابعاد لترس تقليدي لعربة جر خلفي حيث تكون التروس كلها بحلقات الاختيار selectors على عامود
واحد output shaft في حين يوجد عامود جانبي عليه التروس المتوسطة input shaft التي تنقل الحركة القادمة من الحدافة و الكرنك الى عامود الاخراج حسب الاختيار



و هذه صورة أخرى لكيفية التعشيق بحلقات الاختيار و التعشيق



أما في حالة الجر الامامي فحلقات الاختيار بتتوزع على العامودين الinput shaft و ال output shaft

كما بهذه الصورة

[AHMEDmostafa79]

شكرا يا جماعة علي المعلومات القيمة دية الي كانت فعلا معناة مجهول للكتير مننا. بس انا عاوز اعرف بيانات الفتيس دة اية وهل دية طريقة بتوضح نسب الجير ولا لا بالنسبة للوجان.

http://www.renault-dacia-logan.com/renault-logan-technical-data.php

[yoko]

شكرا يا جماعة علي المعلومات القيمة دية الي كانت فعلا معناة مجهول للكتير مننا. بس انا عاوز اعرف معني الجدول دة اية وهل دية طريقة بتوضح نسب الجير ولا لا


renault logan gearbox
type jh1 jh3
number of forward gears 5 5
speed (km/h) at 1000 rpm: 1st 7.24 7.24
2nd 13.18 13.18
3rd 19.37 19.37
4th 26.21 26.21
5th 33.94 33.94

هي دي بتعتمد على نسب الجير لكن صعب يتحسب منها النسب الحقيقية للجير لإن لازم يتعرف مقاس الكاوتش الي إتحسب عليه الحسبه دي

[AHMEDmostafa79]

شكرا يا احمد باشا وانت علي طول كدة متابع وبترد علي اول واحد الف شكر يا جميل . بس اقعد ذاكر بقة يا عم احمد خلاص الامتحانات قربت وليك علي مش هسئل تاني عشان متقولش هو الي بيعطلني وربنا معاك يا سيدي.

[yoko]

شكرا يا احمد باشا وانت علي طول كدة متابع وبترد علي اول واحد الف شكر يا جميل . بس اقعد ذاكر بقة يا عم احمد خلاص الامتحانات قربت وليك علي مش هسئل تاني عشان متقولش هو الي بيعطلني وربنا معاك يا سيدي.

ههههههههههههه ولا يهمك يا باشا والإمتحانات إبتدت فعلا بيعدولنا الميدترمات عشان أكتر من ٨٠٪ من الدفعة ساقطة ميدترم فبيعملوا أي حاجة عشان ينجحونا وبرده إمتحان النهارده محدش حلة (الدكاترة هتولع في دفعتنا)

[د.محمود صلاح]

شكراً للمعلومات .. نورتونا الله ينور قلوبكم

[wlelw2003]

موضوع مفيد جدا