قلم سحرى لازالة خدوش السيارة

[nouranwar]

يا ريت متنسناش لو جاب نتيجة كلنا مستنينه بفارغ الصبر :)

[Egyzizo]

أنا القلم وصلنى من يومين ، وكان ممكن أستخدمه على طول لأن الموضوع سهل جداً ، بس أنا قلت علشان الزملاء فى نايل موتورز هاخليها بعد ما أصور الخدوش قبل وبعد الاستخدام علشان كله يبقى على الطبيعة، والناس تحكم بنفسها بغض النظر عن حكمى أنا.
بس واضح انى هاتعب فى موضوع تصوير الخدوش ده لأنها رفيعة وعلى صاج مع انعكاس نور الفلاش وانعكاس صورة السما على الصاج هتبقى الدنيا بظرميط بس هاحاول أوصل لأحسن نتيجة.

[nouranwar]

يلا بالتوفيق و مستنيين النتيجة بفارغ الصبر
عايزين نضبط عربياتنا بقي :)

[toteda]

يا جماعة لو سمحتم ممكن حد يفدنا بالقلم السحرى ده لازالة الخدوش
وده فيديو الموضوع
http://www.youtube.com/watch?v=0ct6lwh6jky

ونفسى حد من الاعضاء يجيبه ويجبلى انا كمان
وده موقع الشركة
http://www.meinauto.tv

انا لسه واصلني القلم ده امبارح من امريكا ومعايا منه اربعه وهاجربه النهارده واقولكوا بكرة علي النتيجه اذا كان تمام ولا سكه

[N.a.j.d]

يا ريت ياباشا ومستنين التجربه
امسك مسمار كد وجرب

[Egyzizo]

إليكم نتيجة التجربة ..
بعد أن قرأت عن القلم السحرى هنا ، كان ليا صديق نازل من أمريكا اليومين اللى فاتوا ، فقلت له عليه ، وجابه ، بس هو اعتبره هدية ورفض ياخد تمنه علشان كده ما عرفتش هو اشتراه بكام بالظبط .. و ده شكل العبوة :

والقلم زى ما انتم شايفين عامل زى القلم الفلوماستر بس سنه زي ما تقولوا كده خشب أو فيبر بنى ومعاه سن احتياطى علشان لو اللى فيه نشف ويمكن استبدال السن بسحبه ببساطة .. ويتم تنشيط القلم بالضغط بالسن على منديل ورق كذا مرة ، وهو فيه سوستة بحيث تلاقيه بياخد ويدى معاك (زي بلية القلم الكوركتور كده) ، وبعد كام مرة هتلاقى السن تشبع بالمادة السحرية وهى مادة شفافة.

والاستخدام يكون بتنظيف مكان الخدوش جيدا ، والاستخدام يكون فى مكان ظليل تماماً لأنه على حسب ما هو مكتوب سريع الجفاف فى الشمس ..

وأنا كان عندى عدة خدوش فى العربية ، واللى كان مضايقنى جداً هى خدوش على كبوت العربية عملها حد ابن حلال بمسمار أو حاجة حادة وييجوا كده عشرة خدوش جنب بعض بطول حوالى 15 سم ودى صورتهم قبل العلاج .

وبعد المرور على الخدوش بالقلم تغطيها المادة الشفافة ، وتفاجأ بأن الخدوش قد اختفت ، وينتابك قدر كبير من السعادة وانت شغال .. (لا حظ ان كل ده وانت شغال) ..
بتسيب العربية ساعتين تلاتة كده ، أو تعرضها للشمس ، وبعد كده بتلاقى ان مكان العلاج نشف وممكن يلقط ذرات تراب من الجو ، بنمسحه بفوطة ناعمة ، وبتكون النتيجة كده :

ودى صورة تانية :

وكما تلاحظون فالخدوش قد تحسنت ، يعنى أوصف لكم ايه اللى حصل .. الخدوش كانت واضحة بيضاء ، يعنى باين تحتها المعجون، وكنت تمشى عليها بضافرك تحس انها واخدة عمق، بعد الاصلاح بالقلم، لما تمر على الخدش بضافرك تحس انه اتملا ، كما انه بياخد لون العربية ، بس زى ما انتم شايفين مازال مكانها واضحاً ، يعنى كأنك جبت قلم دوكو بلون قريب من لون العربية (حتى مش لونها بالظبط) ومشيت عليه بالخدوش.

والحقيقة كنت متوقع ألاقى نتيجة أحسن من كده ..


الخلاصة : درجة رضايا عن هذا المنتج هى 40% فقط
ولا أنصح حد انه يشتريه إلا اذا عدل توقعاته بخصوص النتائج اللى مش هتكون مبهرة.

لو عاد بى الزمن كنت هاجيبه برضه ، لأنه جاى لى هدية ومادفعتش فيه فلوس

باقى ملاحظة ، بالنسبة للخدوش الخفيفة خالص يعنى زى اللى بتحصل مثلاً من مسح العربية بفوطة زفرة بها ذرات تراب ، فالنتيجة معها أحسن بكثير من الخدوش الواضحة ، بس دى حاجات ميكروسكوبية فمستحيل أعرف أصورها ولا قبل ولا بعد.


ودمتـــم بــود ..

[yahiahelaly]

اععععععععععععع مليش دعوة ممكن تأجر القلم شوية ساعه بس

[N.a.j.d]

بس برده يعني بشيل خدوش البسيطه وبالنتيجه ممتازه

[nouranwar]

هههههههههههههه حلوة حكاية التأجير ديه :)
يعني شغال و بيداري الخرابيش البسيطة و هو المطلوب يا ريت لو فيه اي حد يلاقيه يقولنا عليه علشان نجربه
و مشكوووور علي نقل التجربة الممتعة ديه

[N.a.j.d]

طب جربت على خدوش الصغيره عندك راحت ولا ايه ياباشا

[Egyzizo]

أيوه الخدوش الصغيرة جداً بمعنى اللى مثلاً لو مسحت العربية بفوطة زفرة فيها ذرات تراب وعملت خدوش ، الخدوش دى بتتغطى كويس وتكاد تكون مش باينة ، بس انت عارف ان الخدوش اللى بتضايق مش دى إنما الخدوش الناتجة عن حكة واللا من مسمار أو كازوزة طائشة ، دى نتيجتها مش 100%.

[N.a.j.d]

بس هناك قلم احسن من دا وبيشيل كل الخدوش العميقه
وموجود ف امريكا وزميل لينا عامل موضوع هنا للاعضاء اللى عايزه منه ومضمون 100%

[nouranwar]

طيب ياريت تقولنا عليه او تبعتلنا الرابط بتاعه علشان الافادة تعم علينا كلنا

[N.a.j.d]

http://www.nilemotors.net/Nile/154840-kia.html

[nouranwar]

مشكووووور جدا استاذ \ نجد علي الافادة باللينك الرائع ده
و اهم ما يميزه هو شكر الاعضاء في هذا المنتج
و ايضا اذا احتجت اي شئ من الخارج هيوفرهولك ان شاء الله انت بس تكتبله محتاج ايه من بره و تبعتله الليبك بتاع المنتج اللي عاوزه و هو هيحسبلك بيتكلف كام و الشحن و الجمارك