اشترى مانيوال و الا اوتوماتيك ؟؟

[Innovation]

السلام عليكم

دايما تلاقى ناس كده تقولك لا لا سيبك من الاوتوماتيك ده لما بيبوظ مابتصلحش خليك فى المانيوال عشان تعرف تسوق اى حاجه بعد كده.

و ناس تانيه تقولك اوتوماتيك طبعا اسهل كتير فى السواقه

المشكله بأه انى هجيب عربيه قريب و مش عارفه اسمع كلام مين؟؟ احنا البيت عندنا غيرنا خلال العشرين سنه اللى فاتو 4 عربيات كلهم مانيوال و مش عارفه سر الاصرار على المانيوال!!!

ممكن حد بس يقولى ايه مميزات و عيوب الاوتوماتيك و كذلك المانيوال ؟؟؟ عيوب و مميزات حقيقيه مش مجرد اعتقدات زى اللى وصلتلى دى عشان اقدر اقرر.

[dolly13]

هو لو حضرتك ناوية تجيبى يابانى فما فوق يبقى الاتوماتيك كويس لانه هايرحمك شوية من قرف الشوارع وخصوصا لو مالكيش فى الشد والسحب الجامد
لكن ليه فيه ناس بتفضل المانيوال
اولا لان اعطاله مقدور عليها بالنسبة للاتو
ثانيا لان الناس دى بتحب سواقة المانيوال وانا منهم
ثالثا المانيوال ارخص شوية وده ممكن يكون سبب برده
لكن اكيد فيه اراء فنية من خبراء المنتدى هاتفيدك تماما فى المقارنة
ومبروك العربية مقدما

[al_manara]

هو صيانة الاوتوماتيك اصعب لان الصنايعية الي فاهمة فية قليلة اوي. محتاج حفاظ علية اكتر من المانيوال . لو المارش باظ او البطارية نامت ما ينفعش تزوقيها زي المانيوال . قطع غيارة اغلي . سعرة استيراد اغلي واسباب تانية كتير
دة غير ان من التراث بتاعنا ان الاوتوماتيك زي الزفت.
بس دلوقتي اسهل حاجة لو الفتيس باظ نغيرة بواحد استيراد
بلدنا دلوقتي ما ينفعش فيها غير الاوتاماتيك المانيوال صعب اوي .
مرة واحد صاحبي قالي انا عاوز ابطل (ارفص) واجيب اوتوماتيك من كتر الزحمة الي بنمشي فيها .
ومع احترامي للشد والهري . دة بيكون امتي ؟ في الدائري الساعة 3 باليل . وياريت حد يقولي علي مكان تاني في بلدنا اجري فية شوية

[AlGazar2]

ومع احترامي للشد والهري . دة بيكون امتي ؟ في الدائري الساعة 3 باليل . وياريت حد يقولي علي مكان تاني في بلدنا اجري فية شوية

شارع الجزاير الساعة 4 كدة بس خلى بالك من الملف الى عند وحدة الجيش

بس المانيوال متعة السواقة
الاوتوماتيك متعة البلاى ستيشن

حتى ده بقوا بيعملوا الشيفت فيه مانيوال

[mshmshm3]

كلام الاعضاء صح وحاجة كمان استهلاك الفتيس في المانيوال اكثر من الاستهلاك في الاوتوماتيك وده على حساب تيل الفرامل يعني لما اقف في اشارة وعربيتي اوتو هادوس على الفرامل المانيوال هامور العربية كدة الاوتو استهلكت الفرامل والمانيوال استهلكت طقم الدبرياج انا معايا مانيوال ومش هاجيب مانيوال تاني بسبب بسيط جدا ان كاوتشة الدواسة كل شوية تطلع وكل شوية بحس ان الدواسة لازقت في رجلي ونصيحة الاوتوماتيك يفضل ياباني فيما فوق

[Innovation]

شاكره جدا للاعضاء الكرام على المعلومات المفيده

و كنت عايزه اعرف لو حد متعلم سواقه جديد و ساق اوتوماتيك فهل سهل عليه يسوق عربيات مانيوال بعد كده و الا مش هيعرف؟

[tameraast]

الاوتوماتك سهل جدا جدا بالنسبه لبدايه سواقه ثانيا فى اخ بيقول انو بيستهلك تيل لما تقف فى اشاره انت ممكن تحطه n سهله يعنى مهش حوار التسارع بتعاع الاوتو مش وحش اقل ثانيه او اتنين من المانول العربيه لو عطلت بتتزق عادى لما تحطها على n ( غلط جدا تشد العربيه على d بتبوظ جير بوكس ) لاكن مفهوش حركه انك ترمى تانى لو البطاريه نامت بس بيرحم من الزحمه و السفر الطويل انا عندى العربيتين اوتو و اول ما اتعلمت اتعلمت على اوتو و بعد كده سقت مانوال سنتين بس تعب صراحه ده رأى و دلوأتى معدش زى الاول فى ناس كتيره بتفهم فى تصليحه و مراكزمتخصصه له اهم حاجه تغير فلتر و زيت فى المعاد و يكون نوع السياره ذات اعتماديه مش صينى مثلا و طبعا لو اتعلمتى على اوتو و جيتى تسوقى مانوال مش هتعرفى لان ده حاجه و ده حاجه انت ممكن تتطلع من مانوال لاوتو و العكس لا عايز فتره تعليم

[Donzi]

انا مش خبيرة اوي في الموضوع دة بس انا اتعلمت على مانيوال بقالي 4 سنين ب مانيوال بس حاليا بعد ما جربت الأتوماتيك مع اخويا في الزحمة الفظيعة اللي في مصر في كل وقت و في كل مكان يبقى اكيد اللأتوماتيك اريح كتييييييييير فقررت اني اجيب اتوماتيك ان شاء الله

و لو يهمك اوي موضوع العزم و السحب يبقى خليها مانيوال مع ان مصر مابقاش فيها اي مجال للكلام دة اصلا

[Innovation]

تمام .. يعنى لو اول عربيه الواحد هيتعلم عليها الافضل تكون مانيوال و بعد كده العربيه التانيه ممكن تكون اوتو .. عشان يقدر يسوق كل حاجه فعلا.

انا متشكره اوى بجدDonzi و ameraast و mshmshm3 و al_manara و dolly13 على معلوماتكم الجميله و خلاص انا قررت اجيب مانيوال لانها اول عربيه و ان شاء الله لما اغيرها هجيب اوتوماتيك. عشان اقدر اسوق عربيه والدى المانيوال بردو لو احتاج اسوقهالو.

[dolly13]

اختيار سليم وباذن الله هاتستمتعى اكتر بالمانيوال لانها حاجة مختلفة تماما بس المهم تصممى على التعلم وماتزهقيش بسرعة
فى الاول هاتحسى ان الموضوع صعب جدا بس واحدة واحدة هاتلاقى نفسك بتسوقى كويس قوى وربنا يوفقك

[Innovation]

اختيار سليم وباذن الله هاتستمتعى اكتر بالمانيوال لانها حاجة مختلفة تماما بس المهم تصممى على التعلم وماتزهقيش بسرعة
فى الاول هاتحسى ان الموضوع صعب جدا بس واحدة واحدة هاتلاقى نفسك بتسوقى كويس قوى وربنا يوفقك

فعلا عندك حق فى الاول كان صعب و خاصه انى اتعلمت على عربيه والدى و كانت واسعه عليا اوى .. عشان كده هجيب حاجه صغيره ليا عشان اقدر اسوقها اسهل شويه .

شكرا جزيلا

[al_manara]

عشان كده هجيب حاجه صغيره ليا عشان اقدر اسوقها اسهل شويه .

شكرا جزيلا

الف مبروك مقدما . شوارع المحروسة هاتزيد عربية

[motorace]

ربنا يكرمك بعربية جيدة أنا طبعا بفضل المانول لنفس السبب انك ممكن تسوقى أى عربية بعد كده وما فيش أسهل من الاوتو

[raedegypt]

المانيوال افضل فى الجرى والطرق المفتوحه .. لكن فى مصر مشى شويه وتقف شويتين رجلك تورمك مع المانيوال هنا. الاتوماتيك افضل .. بعدين اتوماتيك فى عربيات يابانيه تويوتا او كوريه زى الهيونداى معندكش اى مشكله على الاقل 10 سنين . ياعم ربنا يديك الصحه والعمر واستفاد منها 10 سنين واكثر وريح بالك وراحه رجلك من قرف المانيوال

[tameraast]

مبروك مقدما :)