شكمان 1500 ...لعربية 1300

[A7MED_PHARMA]

السلام عليكم


العربية اللاتسر أول لما جبتها ...روحت غيرت علبة الشكمان
ومالقتش ساعتها بتاعت العربية الأصلي .
بتاع الشكمانات كان بيقولي حط واحدة عمولة ...زي الأصلي بالظبط
قولت لاااا

قالي طيب حط بتاعت الفيرنا ...هتمشي مع عربيتك
قولتله أكيد الكلام ده ..أنا عربيتي 1300 ياباني ..والفيرنا 1500 كوري

قالي ياباشا واحد


ركبته
ومن ساعتها
حاسس إن صوت الشكمان مش طبيعي .
حد عنده فكرة عن علاقة علبة الشكمان ..بالــ سي سي بتاع العربية


وشكرا

[samirayad]

قالي ياباشا واحد

كنت قوله

ربنا يخليك لمصر ياباشا

ركبته
ومن ساعتها
حاسس إن صوت الشكمان مش طبيعي .
حد عنده فكرة عن علاقة علبة الشكمان ..بالــ سي سي بتاع العربية

علاقه هندسيه طرديه معمول حسابها ولها حسابتها الخاصه بديناميكا

الموائع

لدى مصممى المحركات

[A7MED_PHARMA]

مهندس سمير...
ربنا يخليك لينا يارب


المهم
واحد صاحبي ركب عربيتي ومشي بيعا قدامي

سمعت صوت ززززززززززززززززززززنة في الشكمان...وكأنه تربوووو
فاهمني
يعني كأن الصوت مكتوم


.
المهم
أنا دلوقتي مش لاقي الأصلي بتاع العربية إلا عند بتوع الإسيتراد

بس عاوز عرف العلاقة بين سي سي المحرك ...والشكمان بتاعه

أصل تعرف
أنا شوفت علبة الشكمان بتاعت البيجو 504 ...صغيرة جدا جدا جدا
مع إني البيجو 2000 سي سي

فأنا عاوز أعرف العلاقة بين حجم علبة الشكمان ...والسي سي بتاع المحرك

[samirayad]

فأنا عاوز أعرف العلاقة بين حجم علبة الشكمان ...والسي سي بتاع المحرك

فيه علاقه فعلا

وعملية تصميم العلبه وحارتها الداخليه لها معادلات هندسيه تصميميه معينه

لأن العلب الخلفيه دى أساسا

أسمها كاتم الصوت silencer

وفيه أرتباط برضه بين تصميم العلبه وسحب السياره

أو الأستفاده من القدره الناتجه من حريق المحرك

بمعنى

أنه لو تم تحيير الغازات فى طرق ملتويه وأطول داخل العلبه الخلفيه

سيهدأ الصوت فعلا

بس ممكن يحدث خلل فى آداء المحرك كعزم خارج منه وتأثر سحب السياره بالسلب

نظرا للتراكم المتتابع للغازات داخل العلبه

وحدوث رد فعل عكسى على المكنه كأداء وحراره

والعكس صحيح

ولكن يتم الوصول الى التصميم والآداء الأمثل للعلب الخلفيه

من خلال المعادلات الهندسيه المخصصه لذلك


والحقيقه أنا عندى كان أرحم أنك تركب العلبه دى

طالما مش لاقى العلبه الأساسيه لطراز سيارتك

بتاع الشكمانات كان بيقولي حط واحدة عمولة ...زي الأصلي بالظبط
قولت لاااا

[A7MED_PHARMA]

ما أنا مش متأكد إذا كانت العمولة هتبقا زي الأصلي ولا لأ
الصنايعية عاوزة تبيع وخلاص


.........
شكرا لفيض المعلومات ياباشمهندس سمير
منك نستفيد

[samirayad]

ما أنا مش متأكد إذا كانت العمولة هتبقا زي الأصلي ولا لأ
الصنايعية عاوزة تبيع وخلاص

بس أرحم من المختلفه فى التصميم

ياباشا ده بيفصص واحده أصليه ( تكون مخرومه وتالفه مثلا )

ويفصل المواسير والحواجز الداخليه

ويروح ملزقها باللحام ومركبها

هى طبعا مبتبقاش فى دقة التصنيع ولا التشطيب الأساسى

بس أرحم من تركيب علبة ذات تصميم غير تصميم عربيتك

وزى مابيقولوا فى المثل


الأعور .........أحسن من الأعمى

مش كده ولا أيه

[samirayad]

شوف تكوينها من الداخل بيبقى عامل أزاى

هى بتبقى بالضبط مكوناتها الداخليه

زى العلبه المكتوب عليها muffler فى الصوره المرفوعه


عباره عن شوية حواجز ومواسير مخرمه ( كما هو موضح بالصوره )

[A7MED_PHARMA]

شوف تكوينها من الداخل بيبقى عامل أزاى

هى بتبقى بالضبط مكوناتها الداخليه

زى العلبه المكتوب عليها muffler فى الصوره المرفوعه


عباره عن شوية حواجز ومواسير مخرمه ( كما هو موضح بالصوره )

ماهو أنا فتحت علبة العربية الدايو قبل كده ..وشوفت المنظر ده فيها

أنا بقول

إن العمولة ..ماعتقدش تكون زي الأصلي 100 %

وبعدين
أنا مابقاش عندي ثقة في الصنايعية خااالص

[samirayad]

الأعور .........أحسن من الأعمى

طالما مش عارفين نعالجله عينيه

ونرجعها زى ماكانت

[A7MED_PHARMA]

والله يابشمهندس أنا مابقاش عندي ثقة في أي حاجة في مصر

يعني تعرف

حاليا ...أي حاجة بحتاجها للعربية

لازم أروح عند بتوع الإستيراد ...ويفكها من العربية قدامي..علشان أتأكد إنها بتاعتها ...بتاعتها