مدرسة المرور

[Aziz2009]

السلام عليكم


كل عام وأنتم بخير

إستفساري بخصوص مدرسة المرور لتعليم السواقة
بصراحة أنا عملت Search ولقيت إجابة لبعض الأسئلة عنها
لكن الحقيقة لسه في أسئلة تانية مثل:

- مدة التعليم بالمدرسة "عدد الحصص أو عدد الأيام" ؟
- أوقات الحصص في اليوم "الساعة كام" ؟
- المصاريف ؟
- سمعت إن العربية اللى بيعلموا عليها بتكون مشتركة لأكثر من فرد ؟
- الإجراءات ؟ بعد أما أسلم الورق المطلوب، ببتدي على طول في المدرسة ولا بستنى دوري ؟


ولكم جزيل الشكر

[a7mode]

امال السيرش اللى انت عملتو دا طلعلك معلومات ايه لما انت لسه ناقصلك كل الاسأله دى ههههههههههههههههههههههه انا بهزر معاك اوعى تزعل ..

بص يا سيدى

ج 1 مده التعليم 10 حصص ..

ج 2 اى وقت تروح فيه تقف فى الطابور لحد ما يجى عليك الدور وتركب ويفضل تروح بدرى جدآآآآ على قد ما تقدر .. عشان متأخر حتتزل عشان تركب ..

ج 3 المصاريف من 3 4 سنين كانت 400 جنيه الا 5 جنيه تقريبآ .. حاليآ معرفش اتغيرت ولا زى ما هيا

ج 4 العربيه اللى بتتعلم عليها بيكون فيها دواسات للسائق + دواسات زيها بالظبط للى جمب السائق كمان عشان اللى بيعلمك يقدر يتفادى اى كارثه تحصل لا قدر الله .. يعنى انت حتبقى سايق وتحت رجلك بنزين فرامل دبرياش واللى بيعلمك اعد جمبك وبردو تحت رجليه بنزين وفرامل ودبرياش ..

ج 5 انت بتروح تدفع فى مكان ( تقدر تعرفو من مقر المدرسه ) لو انت اسكندرانى انا حقولك حتدفع فين وحتتعلم فين .. المهم انت بتروح المرور وتجيب دوسيه تطليع رخصه وبتملاه وتحط الصور الشخصيه حوالى 6 صور + شهاده باطنه وشهاده نظر ودول بيطلعو من اى مستشفى او مستوصف وانت اعد من غير ما يكشفو عليك اصلا .. وبعدين بتروح بالملف لمكان الدفع فى المدرسه بياخدو منك الملف دا وبيدولك 10 وصلات لعدد 10 حصص تعليم كل حصه بتحضرها بتسلم الوصل بتاعها للى بيعلمك فى العربيه .. لما بتخلص ال 10 حصص بتسحب الملف بتاعك تانى من المدرسه وفيه الوصلات طبعآ مختومه ومتظبطه انك راجل متعلم واخر تمام .. بتروح المرور بقى بيكون فيه يوم مخصص للناس اللى جايه من مدرسه السواقه التابعه للدوله طبعآ مش المدارس الخاصه .. تقريبآ دلوقتى بقى يوم السبت او الحد زمان كان يوم الخميس .. وطبعآ كل اللى بيروح تبع مدرسه السواقه نااااااااااجح من غير كلام ان شاء الله ..


اعتقد انى كدا جاوبتك على كل اللى انت عايزو واكتر كمان شويه هههههههههههه ربنا معاك يلا شد حيلك عايزين نزيد واحد عشان الشوارع بقت فاضيه اوى ههههههههههههه

[Aziz2009]

طيب ال 10 حصص دول بيتاخدوا كل يوم ورا بعض ؟
كمان أوقات الحصص دي في اليوم بتكون امتي ؟ الساعة كام للساعة كام ؟

كنت سمعت ان المدرسة بتتدي نظري .. ده تبع ال 10 حصص ؟



أنا من القاهرة .. و ألف شكر على ردك ..

[a7mode]

ال 10 حصص وقت ما تحب تاخدهم انت حر روحت 10 ايام ورا بعض ماشى روحت 10 ايام على شهر ماشى حسب منت عايز تطلع الرخصه بقى .. فى حصه نظرى فعلا نسيت اكتبهالك .. روح المدرسه واسأل عن المواعيد انا معرفش ..

[Aziz2009]

بجد شكراً على المعلومات دي

[powersha]

يا استاذ a7mode
كلام حضرتك ده مش موجود فى القاهره خالص
انا رحت مدرسه المرور الى فى شيراتون
بتبقى بردو 10 حصص
وبيديك وصل لكل حصه
وجدول بمواعيد الحصص وبيبقى مكتوب عليه رقم العربيه الى هتتعلم عليها
وانت وحظك فى عربيات ربع نقل ولادا وفيه عربيه وحده عصفوره بس ده بينزلوها مع سيدات فقط تقريبا
والعربيات عاديه مفهاش تعديلات
واول حصه بيتكلم معاك عن العربيه وكلام نظرى
بعد كده بتظبط مع المدرب بتاعك على المواعيد ممكن تغيرها انت وهو
هو بيعلمك ازى تطلع بلعربيه
وممكن يمشيك بيها حسب المدرب الى معاك (ممكن تلاغيه)
وبيدربك على امتحان الرخصه
فى اخر اسبوع فى الشهر بيبقى امتحنات الرخصه فى مرور السلام (حتى لو انت مش تبع مرور السلام بردو بتمتحن هناك )
وكل الى تبع المدرسه بينجح حتى لو مش عارف يسوق خالص
يعنى هى من الاخر علشان يعرفك مبادى تحرك العربيه مش اكتر وتطلع رخصه
بلنسبه للمصاريف هى كانت اقل من 400 مش فاكر كام

[a7mode]

هيا المدرسه اللى حضرتك رحتها دى خاصه ولا تبع الحكومه ؟؟؟ عامتآ انا بتكلم على نظام اسكندريه معرفش القاهره حالها ايه بقى

[powersha]

هيا المدرسه اللى حضرتك رحتها دى خاصه ولا تبع الحكومه ؟؟؟ عامتآ انا بتكلم على نظام اسكندريه معرفش القاهره حالها ايه بقى

المدرسه تبع المرور (حكومه)
بس النظام عنكم فى الاسكندريه افضل بمراحل من القاهره

[haneen83]

حد يعرف فيه مدرسه مرور للشيخ زايد و اكتوبر و الا لازم اروح تبع الجيزه؟؟