انا خايف و مش مطمئن

[nemnem]

ان شاء الله انا مسافر مرسى مطروح ومعايا زوجتى و ابنتى الصغيرة ا نا للاسف خايف العربية تعمل معايا اى حاجة في السكة ياريت تفيدونى بالحاجات الضرورية اللى لازم ابص عليها قبل السفر مع العلم انا لسة مغير زيت + فلتر زيت + فلتر بنزين و تم تربيط العفشة

ياريت لو فى حد سافر فى الطريق ده ممكن يفيدنى علشا طبعا انتو عارفين مسؤلية انه تكون مسافر و معاك اسرتك

السيارة نوبيرا 2001 -80000 كيلو متر

[M.almaghraby]

فول العربية عالاخر من بنزينة كويسة ....

بص علي مية الردياتير و شوف دورة التبريد عندك عاملة ايه

الكاوتش شوف شغط الاطارات عندك

بس كدا و توكل علي الله

[nab!l]

فول العربية عالاخر من بنزينة كويسة ....

بص علي مية الردياتير و شوف دورة التبريد عندك عاملة ايه

الكاوتش شوف شغط الاطارات عندك

بس كدا و توكل علي الله

بالاضافه الى الاستبن وانوار السياره

[shooter123]

الموضوع جديد انت حتصيف في رمضان؟؟؟؟؟؟؟؟؟؟؟؟؟
ما علينا
انا لسه واكل العلقة دي بس طبعا في شهر 7
اهم حاجة الكاوتش وتطمن علي تبريد العربية وتكييفك عشان بنتك حتتعب منك لو التكييف بايظ لان السكة طويله
يا ريت تطلع بالليل تاخد الطريق في الطراوة كدا احسنلك واحسن للعربية كمان
بعد ما حتخلص مناظر القري السياحية يعني عند الكيلو 150 كدا تقريبا تبدأ تاخد بالك من مطبات الهوا انا كنت ماشي 160 ولولا ستر ربنا مكنتش كتبت السطور دي
قبل مطروح ب 50 كيلو في ردار خلي بالك
وتروح وتيجي بالسلامة
بس انت مسافر ازاي في رمضان؟؟؟؟؟

[AlGazar2]

سير الكاتينة اهم حاجة بتتغير عند 80 الف

و طبعا كل الى فوق ده

[nemnem]

سير الكاتينة اهم حاجة بتتغير عند 80 الف

و طبعا كل الى فوق ده

انا لسة مغير سير الكتينة عند 65000 كيلو ياترى كدة كويس ولا اغيرة احسن

[walidadel81]

انصحك بلاش تاخد طريق العلمين ((( وادي النطرون ))) كمل علطول بطريق اسكندريه لحد مدخل برج العرب والعجمي وادخل طريق العجمي ومن هنا خد الطريق الساحلي هو هيكون اطول شويه بس امان اكتر مدام معاك الاسره انا عن نفسي بعمل كده لما يكون معاي ولادي وكمان هتكون فرصه كويسه انك تريح شويه بالعجمي وبعدها كمل طريقك عادي وخلي بالك من الرادار اللي هيقبل قبل مدخل مرسي مطروح بعد بنزينه التعاون اللي هتكون علي يمينك

[walidadel81]

انا لسة مغير سير الكتينة عند 65000 كيلو ياترى كدة كويس ولا اغيرة احسن

لا طبعا كويس توكل علي الله وماتخفش مافيش اي حاجه هتحصل باذن الله وعفكره هو مشوار لذذ بس بالله عليك بلاش الطريق يغريك وتجري فيه مدام مش لوحدك

[wael_dosoky]

كده تمام واتأكد بس ان معاك عدة تغيير الأستبن
وممكن تاخد معاك طرمبة بنزين احتياطي علشان دي إلي ممكن تعمل معاك حركة موش تمام
وفي الأول و الأخر توكل علي الله

[kemoelord]

يا ريت تطلع بالليل تاخد الطريق في الطراوة كدا احسنلك واحسن للعربية كمان
بعد ما حتخلص مناظر القري السياحية يعني عند الكيلو 150 كدا تقريبا تبدأ تاخد بالك من مطبات الهوا انا كنت ماشي 160 ولولا ستر ربنا مكنتش كتبت السطور دي
قبل مطروح ب 50 كيلو في ردار خلي بالك
وتروح وتيجي بالسلامة
بس انت مسافر ازاي في رمضان؟؟؟؟؟

اولا كل عام وانت بخير , ثانيا انا اختلف مع حضرتك في نقطة السفر بالليل خصوصا ان طرق بلدنا العزيزة مليانه مطبات هواء ونقر وحفر وكل ما تشتهيه الانفس والاكثر مصيبة من كده ان انعدام الاضاءة في الطريق خصوصا طريق مرسى مطروح ,,,, ومن ناحيه السفر في رمضان فكل واحد حر في اختياره ,,,,, تقبل مروري

انصحك بلاش تاخد طريق العلمين ((( وادي النطرون ))) كمل علطول بطريق اسكندريه لحد مدخل برج العرب والعجمي وادخل طريق العجمي ومن هنا خد الطريق الساحلي هو هيكون اطول شويه بس امان اكتر مدام معاك الاسره انا عن نفسي بعمل كده لما يكون معاي ولادي وكمان هتكون فرصه كويسه انك تريح شويه بالعجمي وبعدها كمل طريقك عادي وخلي بالك من الرادار اللي هيقبل قبل مدخل مرسي مطروح بعد بنزينه التعاون اللي هتكون علي يمينك

اهلا وسهلا بحضرتك اولا ,, انا لما حبيت اسال عن كيفيه المرواح لمرسى مطروح كل الناس وصفتلي طريق العلمين -وادي النطرون ده , فممكن حضرتك تقولي اسباب عدم اختيارك ليه ؟؟؟!!

[Moustafa_Kamel]

انا برده مش بحب طريق وادى النطرون لانه ممل جدا و دايما ببقى عايز انام فيه

[nemnem]

بجد انا متشكر جدا على اهتمامكم بالرد على سؤالى. انا مسافر بكرة الصبح انشاء الله بس انا كان عندى استفسار ....

انا مركب عندى ستارة متحركة فى الزجاج الخلفى و ستارتين ثابتين فى الزجاج الجانبى فى الخلف علشان انا حاطيط كرسى البنت ورا و خايف عليها من الشمس..

ياترى ممكن اى حد يسحب منى الرخص فى السكة او فى مرسي مطروح ولا افكهم احسن ؟؟؟؟

[M.almaghraby]

شيل الخلفية

و انتا داخل علي اي كمين شيل الجانبية و ركبها تاني لما تمشي