كل ما تريد ان تعرفه عن منظف الرشاشات (فوائده,نوعه,سعره,طريقة استخدامه )

[عصام غنايم]

بسم الله

من الاشياء الهامه اوى فى الصيانه الدوريه لأى سياره اضافة منظف الرشاشات او منظف الكربيراتر للسيارات القديمه

ليه ؟

مع طول الاستخدام بيتكون رواسب كربونيه على كل اجزاء دورة الوقود مع بعض الشوائب المتوفره بكثره فى البنزين مما يساعد على ضيق وانسداد فى بعض الاجزاء
( بالظبط زى الكوليسترول ما بيعمل فى الشرايين بالنسبه للانسان )

وده بيوئثر بطريقه مباشره على أداء موتور السياره حيث يبداء عدم انتظام فى السلانسيه وضعف فى التسارع والسرعه القصوى وايضاٌ يؤثر بالسلب على استهلاك البنزين

لذلك وجب وضع منظف الرشاشات فى تانك البنزين كل فترة تشغيل

طيب نستعمله كل كام كيلو ؟

الشركه المصنعه بتقول كل 5000 كيلو

طيب ايه فوايده المباشره ؟

1 تنظيف خطوط البنزين بالسياره ابتداء من التانك وطرمبة البنزين وصولاٌ حتى الرشاشات او الكربراتير

2 انتظام سرعة دوران المحرك على السلانسيه

3 تحسن ملحوظ فى السحب او التجميع و اداء افضل بالنسبه للسرعه القصوى

4 تحسن بسيط فى استهلاك البنزين

طيب ايه انواعه ؟

يوجد منه انواع وشركات واشكال عبوات كتيره فى السوق

ولاكن اشهرهم وافضلهم من خلال تجربتى الشخصيه هو ال STP® Fuel Injector Cleaner

ودى صورة العبوه





كام سعره ؟

سعره من 15 الى 25 جنيه حسب المكان وانت وشطارتك فى الفصال وموجود فى اى بنزينه نضيفه

طيب ايه افضل طريقه لاستخدامه حتى نحقق الغرض منه ؟

افضل طريقة لأستخدامه كالتالى

اولاٌ لازم تغير فلتر البنزين بواحد جديد قبل ما تحط المنظف

ثانياٌ بنفضى العبوه بداخل تانك البنزين من فتحة التموين و بنحطه على 15 لتر بنزين مفيش غيرهم

ثالثاٌ تحط المنظف وتاخد بالعربيه مشوار طويل لحد ما توصل للاحتياطى

رابعاٌ اثناء المشوار تمشى على rpm عالى على كل الغيارات يعنى تقرص على كل الغيارات

خامساٌ ترجع من مشوارك تفول العربيه

سادساٌ بعد ما العربيه تبرد خالص فك البوجيهات اللى راكبه وتركب جديد او تنظف القدام وتظبط الخلوص بتاعهم على 0.7 مم للانوس و 1.0 مم للنوبيرا

تفسير ما سبق

اولاٌ الفلتر القديم مليان شوائب لو حطيت عليه المنظف هيخدهم يوديهم على الرشاشات ويبوظ الدنيا

ثانياٌ علشان يبقى مركز

ثالثاٌ علشان متحطش المنظف وتبيت العربيه بيه فياكل وصلات البنزين فى العربيه

رابعاٌ علشان المشى على rpm عالى بيضغط على مواسير البنزين و الرشاشات فبينضفهم افضل

خامساٌ حتى لا يسبب المتبقى من البنزين وعليه المنظف مركز تآكل فى وصلات البنزين بالعربيه

سادساٌ البوجيهات اللى راكبه اتحرق عليها كمية شوائب ورواسب كبيره هتأثر عل جودة توصيلها للشراره

بعد ما خلصنا كل ما سبق

يا ريت لو نغير فلتر الهواء بالمره ونعمل ايدل ليرن كمان

ودى طريقة الايدل ليرن

هنفصل كابل البطاريه السالب مدة 5 دقائق

ثم نعيد توصيله تانى

ثم
1 هنفتح الكونتاكت 5 ثوانى بدون دواره ونقفله 5 ثوانى
2 هنفتح الكونتاكت 5 ثوانى بدون دواره ونقفله 5 ثوانى
3 هنفتح الكونتاكت 5 ثوانى بدون دواره ونقفله 5 ثوانى
4 هندور العربيه على السلانسيه بدون تشغيل اى احمال ( نور , تكييف , كاسيت ) لمدة 3 دقايق
5 هنشغل التكييف على درجة 4 فريون + النور العالى + الشبوره ( يعنى كل الاحمال ) لمدة 2 دقيقه
6 هنطفى كل الاحمال الاول وبعدين نطفى العربيه




لو عملنا كل ما سبق كل 5000 كيلو ان شاء الله هنحافظ على ثبات مستوى اداء الموتور بدون مشاكل

اتمنى ان اكون افدتكم وطبعاٌ مستنى ردكم بعد التجربه ولو فيه اى استفسارات


وارجو ان لا تحرمونى من صالح دعائكم

اخوكم عصام غنايم

سلام مؤقت

[Raul_7]

كلام جميل, بس أنا جبت المنظف ده والعربية لسة يادوب عاملة 6000 كم فـأكيد مش هاغير فلتر بنزين وفلتر هوا وبوجيهات!!

[عصام غنايم]

كل ما سبق تحت بند النضافه والمحافظه على الآداء العالى

انما لو على الكاتلوج يبقى المفروض كل 10000 كيلو

بس خلى بالك فى ناس مبتمشيش ال 10000 دول فى سنه كامله

[hesham22822]

مشششككككوووررر

[kar!m]

بس مكتوب على علبة ال stp انك تحطه على فول تانك .. مش ممكن لما تحطه على 15 لتر بس يكون مركز بزيادة فيسبب مشاكل؟

[khpopo]

شكراااا

[karimfahmy99]

عصام باشا

استاذ و معلم فى الشرح بس عندى كام تعليق لو ممكن

انت بتقول نغير فلتر البنزين كل 5000 اعتقد دى اختيارية مش اجبارية و تتوقف من عربية الى عربية او بلاصح من شخص الى اخر . اللى دايما متعودين يحطوا بنزين لما التنك يشطب باستمرار يجب تغير الفلتر صح كل 5000 و لكن واحد مثلى مثلا دايما احط بنزين على النص او يوم ماتزيد اوى احط قبل الربع اعتقد معدل امن لخروج رواسب الى الفلتر عشان كدة بغير كل 10000 كم مع ملاحظة انى بمون من محطات نضيفة و طرمبات حديثة ذات فلاتر تنقية قبل مسدس التموين .

زى ما قال الاخ الفاضل . اللى مكتوب على عبوة ال stp انك بتحطها على فول تانك و كاتب تقريبا من 40 الى 60 لتر بنزين يعنى المفروض ان عملية التنضيف هتكون بنفس المستوى لو حاطط 40 او حاطط 60 لتر دا المفترض لية احطها على 15 لتر بس ؟؟ مش ممكن دا يكون لة اثار جانبية ؟؟ و الا كانت الشركة كتبت بدل من 40 الى 60 كتبت من 15 الى 25 مثلا و دا يمكن اللى خلاك تقول : :ثالثاٌ علشان متحطش المنظف وتبيت العربيه بيه فياكل وصلات البنزين فى العربيه لان كدة نسبة المنظف عالية جدا من 40 الحد الادنى الى 15 لتر فقط ... بدليل انة مقلش على العبوة انك لما تفرغ العبوة على تفويلة التنك لازم تخلص التنك يعنى العربية هتبات هتبات بالبنزين اللى علية المنظف و مش هيحصل حاجة و الا كانوا قالو .

موضوع انك تفك البوجيهات و تنضفها او تغيرها دا ينطبق على اللى قلتة فى اول كلامى . يعنى اللى مواضب على التفويل على مستوى عداد ع النص او اقل من الربع مش هيكون عندة نسب الوساخة لا فى الفلتر و لا فى البوابة ولا فى الرشاشات الا طبعا المعدل الطبيعى لاى عربية . ساعتها يلتزم بمواعيد تغير او صيانة البوجية العادية بغض النظر عن انة حط منظف او محطش

انا معاك متفق لما تحط المنظف يعنى انك تدى الغيار حقة شوية بس طبعا مش ع التانك كلة كام مرة كفاية .

السعر اللى بتقول علية 15 دا عمرى ما صادفتة هنا فى مصر . اى حد او محطة اسالها يقولوا 29 او 28 ملقتش اقل من كدة و اللى يعرف مكان بيبيع اقل من كدة يقلنا علية

عموما كلامى دا اختيارى و كل واحد حر فى عربيتة يارب يغير فلتر و يحط منظف كل 3000 كم الغاوى ينقط بطقيتة

[RimonWagdy]

كالعادة يا أستاذ / عصام , مجهود كبير و معلومات مفيدة :))

[mohfud]

thanksssssssssssssssssssss

[hosar]

مجهود مشكور جدا

[M.almaghraby]

الف شكر يا باشا

بس اولا انتا قصدك عالاحمر ولا الاسود؟

ثانيا يعني ايه تظبيط خلوص البوجيهات فالدايو؟ " اعذرني لاني اول مرة اسمع عنها "

[mely]

عصام باشا

استاذ و معلم فى الشرح بس عندى كام تعليق لو ممكن

انت بتقول نغير فلتر البنزين كل 5000 اعتقد دى اختيارية مش اجبارية و تتوقف من عربية الى عربية او بلاصح من شخص الى اخر . اللى دايما متعودين يحطوا بنزين لما التنك يشطب باستمرار يجب تغير الفلتر صح كل 5000 و لكن واحد مثلى مثلا دايما احط بنزين على النص او يوم ماتزيد اوى احط قبل الربع اعتقد معدل امن لخروج رواسب الى الفلتر عشان كدة بغير كل 10000 كم مع ملاحظة انى بمون من محطات نضيفة و طرمبات حديثة ذات فلاتر تنقية قبل مسدس التموين .

زى ما قال الاخ الفاضل . اللى مكتوب على عبوة ال stp انك بتحطها على فول تانك و كاتب تقريبا من 40 الى 60 لتر بنزين يعنى المفروض ان عملية التنضيف هتكون بنفس المستوى لو حاطط 40 او حاطط 60 لتر دا المفترض لية احطها على 15 لتر بس ؟؟ مش ممكن دا يكون لة اثار جانبية ؟؟ و الا كانت الشركة كتبت بدل من 40 الى 60 كتبت من 15 الى 25 مثلا و دا يمكن اللى خلاك تقول : :ثالثاٌ علشان متحطش المنظف وتبيت العربيه بيه فياكل وصلات البنزين فى العربيه لان كدة نسبة المنظف عالية جدا من 40 الحد الادنى الى 15 لتر فقط ... بدليل انة مقلش على العبوة انك لما تفرغ العبوة على تفويلة التنك لازم تخلص التنك يعنى العربية هتبات هتبات بالبنزين اللى علية المنظف و مش هيحصل حاجة و الا كانوا قالو .

موضوع انك تفك البوجيهات و تنضفها او تغيرها و

السعر اللى بتقول علية 15 دا عمرى ما صادفتة هنا فى مصر . اى حد او محطة اسالها يقولوا 29 او 28 ملقتش اقل من كدة و اللى يعرف مكان بيبيع اقل من كدة يقلنا علية

عموما كلامى دا اختيارى و كل واحد حر فى عربيتة يارب يغير فلتر و يحط منظف كل 3000 كم الغاوى ينقط بطقيتة

انا فعلا اتبعت التعليات الى مكتوبه على العبوه ومحستش بأى فرق بس يمكن عشان محافظ على نوع البنزينوالمحطات الى بحط منها ويمكن عشان انا بقرس على كل الغيارات برده ده بيساعد على تنظيف الدائره بس عمرى ماقابلت السعر ده ابد

بس يجب رفع القبعه للاستاذعصام لشرحه الواضح والوافى

[mr_sameh]

بارك الله فيك

[meero_boy2000]

تسلم الايادي ياباشا موضوع جااااااااااااامد جداااااا

[pioneerahmed]

موضوع رائع يا باشا بس سؤال صغنطط

انا عربيتى ماشية 80000 كم (رينو ميجان) و عمرى مستعملك اى منظف قبل كدة

استعملة بنفس الطريقة ؟