التهدئة بالفرامل

[mindvision]

السلام عليكم ورحمة الله وبركاته...
انا سؤالي متعلق بنظام الفرامل...
انا بقالي سنتين بسوق دلوقتي وعندي سؤال محيرني..
هل في نظام التهدئة وانت ماشي بالعربية وعايز تهدي مش توقف العربية... هل بتقوم بضغط دبرياج الاول وبعدين فرامل ؟؟
ولا نظام التهدئة ده بيبقي الافضل فيه انه يبقي بالفرامل فقط لحد مالاقي العربية هاتقف اقوم ساعتها دايس دبرياج ؟
السؤال ده محيرني ومش عارف اجابته لحد دلوقتي لاني سوقت بالطريقتين ومش عارف اي منهم الاصح ؟
ارجو المساعدة..

[aymn2003]

عليكم 'السلام ورحمة الله وبركاته

التهدئة اثناء السير تكون مجرد دوسة خفيفة على الفرامل وعند اقتراب السيارة من التوقف ندوس دبرياج

[newuser2009]

انا كنت زمان مع السوزوكي سويفت بدوس دبرياج مع كل تهدئه
لكن الدبرياج فيها سلك فكان بيتقطع كتير
فاتعلمت اني اهدي بالفرامل و لو حبيت اقف ادوس دبرياج
ولقيتها اسهل في السواقه كأنك سايق اوتوماتيك
في ناس بتقول انها بتاكل الفرامل اسرع
بس كده اسهل

[mahmoud5777]

كلام مظبوط تستخدم الدبرياج فى حالة الوقوف التام او النقل او هبوط السرعة لأقل من الحد الأدنى لسرعة الغيار اللى انت عليه

[amrelsaqqa]

تهدى بالفرامل فقط عشان تستفيد من حمل الموتور في انه يساعدك في تقليل السرعة بطريقة اكفأ ، وبالعكس ده بيحافظ على الفرامل اكتر لأن الموتور بيساهم بصورة كبيرة في ابطاء سرعة السيارة وبالتالى استخدام اقل للفرامل وفي نفس الوقت تبقى العربية محكومة معاك اكتر

[acceleration]

كلام مظبوط تستخدم الدبرياج فى حالة الوقوف التام او النقل او هبوط السرعة لأقل من الحد الأدنى لسرعة الغيار اللى انت عليه

+1

[ahmdmagdy]

عليكم 'السلام ورحمة الله وبركاته

التهدئة اثناء السير تكون مجرد دوسة خفيفة على الفرامل وعند اقتراب السيارة من التوقف ندوس دبرياج

ده الصح

[keko]

والله سؤالك كان محيرنى
متشكرين يا رجالة

[Eng.Geo]

بتدوس فرامل .... لغاية ( هتغير نقلة أقل - هتقف وتمور ) دول حالتين اللي تستخدم فيهم الدبرياج
لو انت علي غيارات عالية زي الرابع والخامس تابع ال rpm ... أول ما تقل عن 1000 تدوس دبرياج و( تجيب نقلة أقل لو هتكمل - تمور لو هتقف )

[mindvision]

شكرا لتفاعل الجميع....

[ahmedsamir5edr]

انا كنت زمان مع السوزوكي سويفت بدوس دبرياج مع كل تهدئه
لكن الدبرياج فيها سلك فكان بيتقطع كتير
فاتعلمت اني اهدي بالفرامل و لو حبيت اقف ادوس دبرياج
ولقيتها اسهل في السواقه كأنك سايق اوتوماتيك
في ناس بتقول انها بتاكل الفرامل اسرع
بس كده اسهل

بالعكس ده بيحافظ علي الفرامل أكتر عدم الضغط علي الدبرياج

[newuser2009]

بالعكس ده بيحافظ علي الفرامل أكتر عدم الضغط علي الدبرياج

ازاي بيحافظ على الفرامل؟
انتا لما بتدوس دبرياج بتفصل الماتور عن العجلات فالمقاومه بتقل
اما لما بتدوس فرامل على طول فالفرامل بتقاوم االماتور كمان و ده بيبقى حمل عليها اكتر

[nicegypt]

ازاي بيحافظ على الفرامل؟
انتا لما بتدوس دبرياج بتفصل الماتور عن العجلات فالمقاومه بتقل
اما لما بتدوس فرامل على طول فالفرامل بتقاوم االماتور كمان و ده بيبقى حمل عليها اكتر

كلام حضرتك علمياَ صح !! فعلا بقت حاجة تحير

[amrelsaqqa]

ازاي بيحافظ على الفرامل؟
انتا لما بتدوس دبرياج بتفصل الماتور عن العجلات فالمقاومه بتقل
اما لما بتدوس فرامل على طول فالفرامل بتقاوم االماتور كمان و ده بيبقى حمل عليها اكتر

االفرامل و الموتور يقاوموا بعض ده لو انت دايس بنزين وفرامل في نفس الوقت

انما طالما انت شلت رجلك من ع البنزين وهتدوس فرامل
الموتور بيكون حمل على العربية و العجلات
يعنى بيساعد الفرامل مش بيقاومها

عاملة زي ايه ؟
زي مثلا لما تكون ماشى بسرعة و تشيل رجلك ع البنزين فجأة وتمور
تلاقى العربية حرة الحركة وتاخد وقت على ما تفرملها بالفرامل ( الحالة دى لما تكون ممور او دايس دبرياج )


انما لو شلت رجلك من ع البنزين وانت واخد النقلة بتلاقى العربية بتتقل وبتقف اسرع من حالة التموير وياسلام لو نزلت نقلة اقل هتلاقى صوت الموتور علي شوية بس العربية تلاقيها كلبشت في الارض
يعنى كدة انت بتسهل المهمة على الفرامل = بتحافظ عليها

ومعنى ان الموتور حمل على العربية ( يعنى العجلات اللى بتحرك الموتور مش الموتور اللى بيمشى العجلات وده بيوقف العجلات اسرع نتيجة لفقد الطاقة المستمر اللى رايح من العجلات للفتيس والموتور)

[Maged_Samy]

معنديش رد بعد كل الردود الحلوة اللى فوق دى