اتصرف بنفسك: مشكلة لمبة O/d في السفيا

[ecybrarian]

السبب الأول: قلة زيت الفتيس:
الأعراض:
- سحب السيارة ضعيف جدا
- صوت عالي من عند الفتيس
الاجراءات:
تأكد من عدم وجود بقع زيت تحت السيارة، طب لو في بقع زيت كبيرة (تسريب كبير) تحت السيارة؟؟ ده موقف مش هاتعرف تتصرف فيه من غير ميكانيكي إللي ها ينزل تحت السيارة ويربط كل المسامير بتاعة الفتيس مثل الكارتيره ويراجع على الخراطيم.

1- أكشف على الزيت من خلال المقياس (انظر الصور gear_level.GIF وgear_level_test.GIF )

2- شد فرامل اليد جيدا دور السيارة وهات الفتيس على P ثم انقل على كل النقلات تدريجيا من R,N,D,1,2 ثم ارجع بالعكس حتى P وقيس الزيت من خلال المقياس
3- إذا احتاج الأمر زود الزيت من خلال فتحة المقياس (مواصفة الزيت SK ATF SP III)
4- لوكانت لمبة O/D لسة بترعش فك القطاش الأرضي عن البطارية لمدة دقائق ثم ركبة
5- في اسرع وقت روح أكشف على العربية على الكمبيوتر في أي مركز صيانة ومتنساش نكشف على الزيت باستمرار.

السبب الثاني: حساس أو ماكينة(حسب تعبير الميكانيكية) السرعة بايظة
الأعراض:
- نظرا لأن ماكينة السرعة دي هي إللي بتشغل العدادات هاتلاقي إن العربية مش عارفة تنقل امتى بالظبط، فتجد إن العربية في بعض الأحيان ثبتت سرعتها (مثلا على 60) ولا يمكن ان تزيد السرعة وكلما ضغط على البنزين يزيد عداد RPM ولكن لا تزيد السرعة ابدا. (انظر الصورة sephia-auto vss.jpg )
الأجراءات:
الحل السريع المؤقت أن تقف بالسيارة وهات N وبعدين اتحرك تاني، هاتلاقي السيارة رجعت أحسن ولكن الأعراض ستعود في أقرب وقت. الحل الأكيد إن ماكينة السرعة لازم تتغير وتمنها حوالي 120 جنية.

1- شيل المفتاح من الكونتاكت وافصل قطاش الأرض من البطارية
2 - فك الخرطوم بين العمة (فلتر الهواء) والرشاشات وأنظر تحت الرشاشات ستجد ماكينة السرعة.
3- فك فيشة الكهربا الراكبة في الماكينة من فوق
4- فك مسمار (مقاس 9) ماكينة السرعة واسحب الماكينة وركب الجديدة واربط عليها.
5- الأفضل تنضف الفيشة بـWD40 قبل تركيبها ثم ركبها في ماكينة السرعة.
6- أعد تركيب الخرطوم بين العمة (فلتر الهواء) والرشاشات. ثم أعد تركيب القطاش الأرضي. ثم دور السيارة.
7- إذا اردت يمكنك اختبار ماكينة السرعة بتحريك الترس للداخل والخارج. تكون الماكينة سليمة إذا كان الترس ثابتا عند التحريك..كما يمكن اختبارها بأجهزة القياس الكهربي

السبب الثالث: حساسات سرعة السيارة والنقلات (معروف بأسم Input Speed) ثمنة في التوكيل 750 جنيه (انظر رقم 4 في الصورة auto-trans outline.jpg (11.2
الأعراض:
- لمبة O/D بترعش على الرغم من وجود الزيت وسلامة ماكينة السرعة بس الأداء العام في النقلات مش سليم بالإضافة إلى أحساسك بسرعة العربية مختلف عن عداد السرعة.
الأجراءات:
الحل السريع أنك توقف السيارة وتشيل المفتاح من الكونتاكت وتشيل القطاش الأرضي من البطارية لدقائق وبعدين ترجع القطاش وتدور العربية.

1- شيل المفتاح من الكونتاكت وافصل قطاش الأرضي من البطارية
2- فك العمة ستجد هذا الحساس تحتها مباشرة.
3- فك فيشة الكهربا الراكبة في الماكينة من فوق
4- فك مسمار (مقاس 9) الحساس واسحبه وركب الجديد واربط عليه.
5- الأفضل تنضف الفيشة بـWD40 قبل تركيبها ثم ركبها في ماكينة السرعة.
6- إذا وجدت أن السلكتين الواصلتين إلى الحساس بهما كشف للنحاس في اي جزء منها بطول السلك حتى مدخلهما في الحساس يجب تغطية هذا الكشف بالاصق الكهربائي.
7- أعد تركيب العمة (فلتر الهواء). ثم أعد تركيب القطاش الأرضي. ثم دور السيارة.


السبب الرابع: حساسات أخرى (يصعب تغيرها بدون أدوات وخبرة نظرا لصعوبة فكهم وتركيبهم)

1- الأعراض: الفتيس مش مظبوط في الحر أو الزحمة أو مع التكيبف. يجب في هذه الحالة ان يزيد مؤشر الحرارة مع لمبة O/D بترعش (لكن مش دائما) حساس سخونة زيت الفتيس موجود فوق الفتيس من الأمام ناحية الرادياتير. فك الفيشة ونظف الفيشة بـWD40. انزل تحت السيارة وتأكد من صلاحية وصلة (خرطوم) تبريد الفتيس الواصل من الرادياتير إلى الفتيس.


كفاية لحد كده باقي الحساسات يجب الكشف عليها بالكمبيوتر



_________
تم تثبيت الموضوع

مشرف القسم.

[wisambasha]

كلام جامد جداجدا ما يقولهوش غير واحد محترف في سيارته !!!

شكرا للدكتور هشام فتحي:d:)

[Nader]

ربنا يبارك لك، موضوع جميل يا د.هشام ويستحق التثبيت

بس اعتقد انة ينتمي للقسم التعليمي اكتر من الورشة:)

[ecybrarian]

شكرا وسام على التعليق يا باشا

الحقيقة يا أستاذ نادر انا فعلا كنت محتار مابين القسمين..الموضوع تبع الورشة لكن الأسلوب تبع القسم التعليمي..أرجو من الله تعالى أن يكون الموضوع مفيد لملاك السفيا الأتوماتيك لأن موضوع لمبة الأوفر درايف إللي بترعش دي في السفيا جنن ناس كتير ومش أي صنايعي بيفهم فيها حتى بتوع الفتياسات الأتواماتيك..

والله الموفق

[wesnay]

ربنا يبارك فيك
عندى نفس المشكله بس معاها ساعات العربية كانها بتفصل دوسة البنزين وترجع تانى
بتقطع فى المشى
وكشفت عليها بالكمبيوتر ومظهرش حاجة مع ان لمبة الكمبيوتر برضه بتولع كتير
شكرا

[ZALABANY]

يا أخي برده العلم نور
المنهج العلمي لما الواحد بيستخدمه في حياته ما بيقدرش يبطلوا وبيستخدموا في كل حاجه في حياته تسلم على الموضوع وجزاك الله خيرا

[ecybrarian]

يا استاذ Wesnay انت كشفت بالكمبيوتر في بالظبط! على فكرة السوفت وير بتاع السفيا مش موجود غير في التوكيل (القديم والجديد) فقط. فهل حضرتك كشفت في توكيل المعادي مثلا؟؟ الكشف هناك بيكلف 55 جنيه ومعي نمرة تليفون حسام الكهربائي هناك لو عايزها

لمبة Check Engine او لمبة الكمبيوتر دي بتنور لو في حاجة في دورة تشغيل الموتور (طلمبة البنزين، الرشاشات، دورة التبريد، الكامات، الكرنك...) ودي ليها مجموعة حساسات خاصة بكل جزء. مع العلم إن كفأة كبس الموتور ودقة وصحة تركيب سير الكاتينة مابتظهرش على كمبيوتر التوكيل لكن لو سير الكاتينة فيه تكة (راكب غلط) ممكن يخلي نور Check Engine ينور.

----

يا استاذ زلباني..أخلجتم تواضعنا :-)

[tmz9111]

موضوع مفيد جدا

[jojocar]

حد عندة سيفيا اوتوماتك فى حدود 42-45 الف للبيع حالة ممتازة ارجو الافادة

[wesnay]

شكرا

يا استاذ Wesnay انت كشفت بالكمبيوتر في بالظبط! على فكرة السوفت وير بتاع السفيا مش موجود غير في التوكيل (القديم والجديد) فقط. فهل حضرتك كشفت في توكيل المعادي مثلا؟؟ الكشف هناك بيكلف 55 جنيه ومعي نمرة تليفون حسام الكهربائي هناك لو عايزها

لمبة Check Engine او لمبة الكمبيوتر دي بتنور لو في حاجة في دورة تشغيل الموتور (طلمبة البنزين، الرشاشات، دورة التبريد، الكامات، الكرنك...) ودي ليها مجموعة حساسات خاصة بكل جزء. مع العلم إن كفأة كبس الموتور ودقة وصحة تركيب سير الكاتينة مابتظهرش على كمبيوتر التوكيل لكن لو سير الكاتينة فيه تكة (راكب غلط) ممكن يخلي نور Check Engine ينور.

----

يا استاذ زلباني..أخلجتم تواضعنا :-)

اولا انا متشكر جدا على الرد الحمد لله وصلت لمجموعة كويسة جدا بتشتغل فى الكيا فقط اسمهم ورشة الاصدقاء وكشف بالكمبيوتر عنده وطلع ان الوصلة بين حساس الموتور وحساس الفتيس فيها مشكلة وجاب كهربائى وصلحها والحمد لله ضبط العربية
شكرا جزيلا

[ecybrarian]

مبروك التصليحات.. فين ورشة الأصدقاء دي؟ وتليفوناتهم لو سمحت

[ads]

استاذ ecybrarian انا معايا نوبيرا 2 كورى اوتوماتيك التانى والتالت والرابع بنقلوا وال rpm على 2500 فأنا حاسس ان النقل ده بدرى شويه لانى بحس ان الغيار ضعيف ومابخدش كل سرعته ودى بتعملى مشكله لو هديدت على السريع وحبيت اشد شويه بلاقى العربيه استجابتها بطيئه لحد لما اوصل للسرعه المطلوبه وتفسيرى ان الغيارات مابتلحئش تاخد كفايتها نتجة النقل السريع وانا سمعت ان المفروض النقل يبقى على 3000 rpm فأيه راى حضرتك