ازاى ارجع مارشيدير بالمرايات ؟؟؟

[EGYPTIANDR]

كتير بشوف السواقين المحترفين بيرجعوا مارشيدير من غير ما يبصوا ورا فقط بالنظر فى المرايات اليمين والشمال....حاولت اعملها كتير لكن تقدير المسافات مكنش مظبوط مفيش طريقة سهلة لكدة....وكمان ازاى نظبط مراية العربية اليمين.....وشكراااااااااااااااا

[Ashraf_Ibrahim]

هما مش محترفين على فكرة ولا حاجة
كل الفكرة ان دي ناس اتعلمت اصول السواقة صح مش اكتر ولا اقل انما احتراف السواقة دا مرحلة مختلفة تماما
انا عن نفسي برجع بمراياتي عادي جدا
كل الفكرة انك بتكون باصص على المرايات وراجع بالراحة
انت بتتكلم على الابعاد دي هتاخد معاك وقت على ما تظبطها بنفسك
بس لو انت بتسوق بمراياتك الجانبية صح يبقا هتقدر ترجع بيها بكل سهولة
اما ظبط المرايا اليمين مش هعرف اشرحهالك
كل اللي اقدر اقلهولك ان محدش بيعرف يظبطهالي غيري يعني انا اللي بظبطها لنفسي ومحدش بيعرف يظبطها صح من اللي بيعدوا جنبي
ازاي معرفش !

[sayed911]

بص انا اتعلمت السواقة برة مصر واللي علمني قالي انه المرايات المفروض تكون زبطتها الصح تكون مثلا المراية الشمال بتاعتك شايف بيها ديل العربية من ورى كويس جدا واخرة فين وانتا تبقى عارف فين حدود عربيتك من ورا وتبقى فتح المراية لبرى عشان تكون كاشف الشارع كلو عشان لو ها تاخد غرزة تبقى شايف كل اللي جنبك ما عدا الـ blind side والمراية اليمين نفس القصة يبقى الطرف الداخلي ليها شايف الديل وهكذا وممكن تعمل زي ما انا عملت في الأول خالص عشان مكنتش عارف احفظ ابعادها حنة خلة سنان صغيرة وعلق عليها شريطة حمرا صغيرة وانتا بتركن بضرهك ها تبقى عارف من المراية الشريطة بقت فين بالنسبة للحيطة :D :D :D

[abdalah_hashem]

مع التعود
يعنى تعالى فى حتة فاضية كدة حط حبة اقماع او كراتين فاضية وحاول ترجع بضهرك من بينهم على المرايات
واتدرب فترة وهتيجى مع الممارسة

[EGYPTIANDR]

شكرا ليكم جميعا يا شباب بس الاستاذ سيد لو تكرم يشرحلى فكرة خلة الاسنان دى بتوضيح اكتر لانى مش فاهمها؟؟؟؟؟ والف شكر

[sayed911]

بسيطة جدا وتحت امر حضرتك

ادي الصورة اللي بتوضح انا اقصد ايه ..


اعتبر انه العربية دي احنا باصينلها من فوق
وانه العلامات الحمرا دي ها تكون العيدا الخشبية اللي ها تتركب على السيارة (وقت التمرين فقط) عشان متعورش الناس وتركب فيها شريطة حمراء عشان تكون عارف فين نهاية العود ويستحسن بدال العيدان تخليك مع عصيان الأكل الصينية الخشبية وتركن على الأقل بالطريقة دي ها يبقى عندك سنسور صناعة يدوي لتفادي حك بدن السيارة من الخلف في الحائط وتبقى شايف الشريطة فاضلها قد ايه لحد ما تحفظ ابعاد السيارة بشكل افضل ..

[smartchoice]

بس سؤال بس يا رجالة
هو على أساس ايه المحترفيين بيرجعوا بالمرايات ؟؟؟؟؟؟؟؟؟؟؟؟؟؟
أصل ان عائلتى اتعلموا بره و خدوا الرخص من برة و تطليع الرخص برة صعب جدا و علموهم يلفوا وشهم و هما بيرجعوا

[a_hmed]

من وجهة نظرى الاسهل انك تبوص فى المرايات علشان ساعتها بتكون شايف بوز العربية من الامام و دهرها يمين و شمال

و بالنسبة لموضوع ظبط المرايات ده خلى جانب المراية الى من ناحية العربية جايبلك اخر حتة فى ظهر العربية و باقى المراية جايبلك الشارع (سواء كانت الشمال او اليمين) علشان تشوف كل الى وراك قبل متغي اتجاهك او تعدى عربية

[mimohamada2]

انا رايى ان الرجوع بالمرايه مش احتراف بالمعنى دى حركة حلوة ومختلفة بس ........... ورايى ان ترجع وانت باصص ورا بالطريقة العادية اأمن وافضل بكتير لانك بنبقى شايف اللى انت مش شايفه بالمرايه لان المراية عمرها ما هتجيب كله وبالذات اللى ورا العربية ........وصدقنى بلوبيف مى انا عملت حادثة قبل كدة بسبب الحركة دى كلفتنى الف جنية .......

وبالنسبة للمراية كل شيخ ليه طريقة ومفيش نموذج تمشى عليه ..شوف اللى يريحك وانت سايق وويخلى عنيك لما تيجى علىالمراية تبقى مستريحة مش عارف ازاى بس انا بعمل كدة

[MMamdouh]

practice makes perfect

MMamdouh

[abdalah_hashem]

practice makes perfect

MMamdouh

الخلاصة المفيدة

[shaddadfalcon1]

انا لما اتعملت اتعملت علي نص نقل يعني كده كده مينفعش ابص ورا ووالدي علمني كله علي المرايات والمرور الغبي اللي كنت بطلع الرخصه منه كان ممنوع بتص ورا لازم ترجع علي المرايات وبالتالي اتعودت علي كده

ومش بعرف اصلا اص ورا وانا راجع بضهري ولو عملت كده بخبط وش العربيه

[ahmdmagdy]

الموضوع كله تعود و ممارسه انا عن نفسي لما برجع ورا مينفعش معايا المرايات بلف راسي و اريح نفسي

[mohamedsaber2]

بص حضرتك, أهم حاجه إنك ما تستعجلش . لازم تاخد راجتك أوي و انت بترجع و تدوس بنزين سنه سنه مش بأستمرار لأنه مع رجوعك للخلف مكانك بيتغيير عشان كده هاتحتاج تبص في المرايات كل شويه فأنت ترجع حته و تبص في المرايا أنت محتاج أيه يعني مثلا محتاج تكسر يمين و لا تكسر شمال سنه و لا ترجع زي ما نت.

و نصيحه عمرك ما تخلي أي حد يقف ورا و يقعد يقولك أرجع أرجع يا باشا, أنت بص على مكانك و مسافتك و قدر المسافه و لو مش عارف تقدر انزل من العربيه و بص وراك وشوف المسافه حسبة كم سنتي أو كم متر و حاول ترجعهم بالعربيه صح.

و على فكره أوعى تتوتر لا وأنت بترجع لورا و لا أنت سايق و أي حد يقولك حاجه مترضش عليه و نفضله.

أهم شيء بقه المرايات تبقى مظبوطه لأنها لو مش متظبته ممكن لا قدر الله تخبط و أنت مش واخد بالك.

المرايات لازم تكون كاشفه الجزء اليمين و الشمال كله من العربيه.
يعني ثلاث تربع المرايه يكون كاشف الشارع و الربع الباقي يكشف الجنب الي فيه المرايا.

أتمنى أكون أفدتك.

[Ahmed Nasser]

ومش بعرف اصلا ابص ورا وانا راجع بضهري ولو عملت كده بخبط وش العربيه

خالى خبط العربية فى عمود كهربة بسب انة بيرجع وهو باصص ورا