كيف تخرج سيارتك إذا غرزت ؟؟

[د.محمود صلاح]

السلام عليكم ورجمة الله

بما إن حدث معايا هذا الموقف العصيب هنا في عمان أمس حيث غرزت سيارتي القديمة في أرض مفروشة زلط وتحته رمال وكلما تحركت للامام لف العجل على الفاضي وازداد السقوط للأسفل لدرجة ان الزلط وصل للرفرف ودخل مجرى السيور وقطع لي سير المكيف

بالضبط كما في الفيديو ده

YouTube - Car stuck in gravel 2

وتجمهر حولي الإخوة العمانيين الأفاضل للعون وكنا حوالي 10 وحاولنا بكل الطرق رفعها ولم نفلح

كما حاولنا رفعها بكوريك لوضع قطع طابوق أسفلها ولكن العجل غااص في الزلط

وتعطف علينا فاضل بنيسان باترول وكان معي حبل قطر - الحمد لله نفع في وقت الزنقة مع اني لم استعمله نهائي طوال 15 سنة لإمتلاكي لهذا الحبل - وحاول الشد من الأمام وده كان قرار خاطئ

لأنها كانت غارزة والحبل انقطع مرارا

ثم شديناها من الخلف مع الرفع والقطر والحمد لله خرجت ..


السؤال هنا ما هو التصرف الأمثل لو لوحدك وليلا ؟

مش لاقي فيديوهات أو مواضيع

[د.محمود صلاح]

الحمد لله وجدت لكم بعض التعليمات

1- اخرج جميع من في العربية وابتعد عن العجل لأنه سيلقي بقطع من الطين او الزلط لو لف على الفاضي

2- حرك الدركسيون يمينا ويسارا لعمل فراغ حول العجل ليسهل الحركة

3- تسارع ببطء شديد لان التسارع الشديد - زي ما كنت بعمل - سيؤدي للمزيد من الغوص وان لم تتحرك للامام تسارع للخلف


4- اعمل حفرة حول العجل الغارز وضع خلف العجل قطع حجارة او بطانية قديمة او دواسات الرجلين !! وحاول تتحرك ببطء حتى تخرج

5- بعد الخروج امشي بطيء لان قطع الطين او الزلط ستتناثر على البودي من الأسفل واكشف على العربية بعد كده بالذات نظام الفرامل


المصدر

How to Free a Car Stuck in the Mud | eHow.com

[MOUSTAFA_SAAD]

المفروض ماتخليش العجل يلف منك كتير كده على الفاضى
اديها الاول واضغط بنزين خفيف وشيل رجلك من على الدبرياج وحطها تانى على دفعات متقطعه بحيث العربيه تتنطر لقدام سنتيمترات فى كل مره
وبعدين اديها الغيار الخلفى واعنل نفس الحكايه حتلافى ان فيه مجرى صغير اتعمل للعجله تقدر تتحرك فيه
ممكن بعد كده تدى الاول وتبداء تتحرك عادى وحتطلع معاك ان شاء الله او ترفع العربيه وتحط تحت العجله لوح خشب صغير او قالبين طوب
مش عارف الوصف وصلك ولا لا

[MOUSTAFA_SAAD]

وطبعا يفضل لو العجل اللى ورا هو اللى غارز انك تخلى حد يقف على الاكصدام او يجلس على الشنطه ( لو ينفع طبعا ) وتحذر انه يقع
علشان يعمل حمل على العجل وايخلهوش يلف على الفاضى

[dr.hazem]

بحكم خبرتي في المجال ده من ايام السعوديه وحصل معايا حتى هنا بالماروتي مرتين ولله الحمد طلعتها

بص ياعزيزي

لاول ثانيه تحس فيها ان العربية غرزت توقف عن انك تدوس بنزين
لان ده لن يزيد الموضوع الا خرابا

هتنزل من العربية وتفرغ من كل فردة كاوتش حبة حلوين من الهوا (يعني حوالي انك تخلي الفرده على نصها
الحركه دي بتزود عرض الكاوتش وبالتالي معامل الاحتكاك بيزيد وده بيسهل الحركه

في احيانا كنا في السعوديه بنظطر اننا ننزل الفرده عالآخر لكن ده كان في حالة ان اساسا العربية غرزت جامد جدا وان شاء الله ده مش هيحصل مع حد طالما سمع الكلام ومداسش بنزبن وحاول يخرجها اول اما تغرز

الحاجه قبل الاخيره الاخيره حاول لو حد راكب معاك كله ينزل من العربية ويبقى فقط السواق...

الحاجه الاخيره:
لو عرفت تشوف قطعة خشب ولا علبة بيبسي ولا حتى جركن فاضي
اي حاجه صلبه تحطها تحت الكفرات
لو العربية دفع خلفي حط الحاجه الصلبه ورا
لو دفع امامي يبقى قدام

نصايح مفيده لتسهيل الخروج:

اوعى تحاول تخرج والدركسيون مش عدل
ده بيزود الحمل جامد جدا غير انها ممكن تغرز اكتر بسبب كده

لو العربية مانيوال هتحمل شويه عالدبرياج بحيث ان رجلك هتفضل عليه وتحاول تطلع بالراحه وانتا بتزود بنزين
وقد تشم ريحة شياط متقلقش اطلاقا واطلع وباذن الله هتطلع معاك
اما لو العربية اوتوماتيك فحاول انها تكون على اقل d

مجرد اما العربية تطلع لا تتوقف الا بعد مسافه آمنه من المكان الغارز وحاول انك متلفش دركسيونك كتير

ياريت كلنا نخلي معانا مقياس كاوتش ومنفاخ ولاعه ولو من الصيني ابو 30 جنيه لانه بينفع جدا جدا جدا جدا جدا في مواقف زي دي بعد اما تطلع
والنصيحه طبعا انك مش هتزود الكاوتش الا لما توصل للخط الازفلتي...

الكلام ده من تجارب كتيره ياجماعه ويارب تكون مفيده ولو افتكرت حاجه كمان هبقى اكتبهالكم....


تحياتي

[د.محمود صلاح]

شكرا جزيلا لكم .. معلومات قيمة

[tiger45]

انا حصل معايا قبل كده الموقف ده
بس مقرصتش عليها وقفت وثبتها بكوريك وحطيت تحنخت طوب بين العجلتين وطلعت الحمدد لله
بس كان يوم بهدله

[Ali_Abo_Amr]

اعتقد لو كان فيه قطعة خشبية مستطيلة تضعها تحت العجلة وتطلع عليها ممكن يساعد فى الحل ... والله اعلم :)

[dr_radioooooo]

انا المرة الوحيدة اللى غرزت فيها قعدت ادوس بنزين جامد لغاية لما العربية غرزت لنصف قطر العجل و ده اكبر غلط لانها غرزت زيادة و اتطرينا نرفعها

[eslamspirit]

في طريقة كنت قريت عنها زمان
انك تاخد الدواسات اللي في العربية و تحاول تدخلهم امام الكاوتش المغروز بالرمل و تطلع واحدة واحدة
الطريقة سهلة و بسيطة و بتنفع في معظم الحالات

[د.أحمد السعيد]

موضوع جميل و استفدت اكيد

[magd_helm]

شكرا موضوع مفيد جدا

[beetleMOSH]

الف شكر على المعلومات القيمه
بس هو ازاى جيب و تغرز !!!!!
مش المفروض الحاجت دى مش بتغرز ؟؟؟

[Eslam.Elrefaey]

أحسن حركة انك تحط لوح خشب قدام او ورا الكاوتش

[adhamhossam]

مشكووووووور
متابع للإستفادة