بودي السيارات الحديثة والقديمة؟

[osama_alam]

انا اسمع ان بودي السيارات القديمة كان حديد وده موجود في موديلات زي اللادا والشاهين اما العربيات القديمة فمش عارف ايه بالضبط؟ بس اكيد حاجة اخف وارق من اللي موجود زمان

يا ريت حد يقولي ايه الفرق وليه غيروا بودي السيارات وانهي من وجهة نظركم ينفع مصر احسن

[Dr_Mido]

لا مش حديد صاج برضه بس اتخن وانض كان بخيرة وحاليا صاج ااقل
واللى ينفع مصر تخصلك دبابه دى اللى هتنفع هنا:d:d

[ahmedsrs]

اولا العربيات زمان كانت جر خلفى والجر الخلفى بيحتاج قضبان حديد من العجل الخلفى للأمامى عشان العربية متتنيش مع الشد والتسارع ذى فكوة العربية الكارو الى بتتزق من ورا .
العربيات اليوم جر امامى مش محتاجة التقوية الجامدة دى ذى فكرة واحد بيشد عربية بحبل مش لازم عرق خشب او حديد
الشركات اليوم بتتجه للتوفير فى الخامات مع التكلوجيا الحديثة للوقاية والتدعيم والشكل الأنسيابى عشان كدة مفيش داعى لتصفيح العربية.

[FLYINGPEUGEOT]

بص ياباشا...ان هجيبلك من الآخر

1- لتخفيف الوزن
2-المواد المستخدمه حاليا ليها قابليه عاليه للتشكيل....عكس زمان...واظن ان فى فرق واضح فى التصميمات...انسيابيه اعلى طبعا..
3- واللى بدورو فرق جامد فى عامل ال aerodynamics
........................................

4-ودى اهم نقطه والى نااااس كتييييره اوى فهماها غلط :

طبعا كلنا بنسمع ناس بتقول : ياعم فين عربيات زمان كانت عامله زى الصخر..تخش بيها فى الجبل...مش زى عربيات دلوقتى الى عامله زى الورق !!!!!!!!!

اكيد كلنا ...حاجه من الاثنين..يا اما قولنا كده او سمعنا حد بيقول كده...

............
طب ما سألناش نفسنا هما ليه خللو العربيات ورق كده ؟؟؟!!
اكيد مش موضوع فلوس..بالعكس المواد دى اغلى بكتير
وكمان دلوقتى فى معايير صارمه للامان...
طب ازاى هتكون اكثر امانا من العربيات الى زى الحجر دى ؟؟!!!!!
لان ببساطه كده....كل ماكان هيكل السياره اقل صلابه..كل ما زادت قدرته على امتصاص الصدمه...وبالتالى رد فعل الصدمه على الراكب هيقل جدا
...
وبالعكس...تخيل جضرتك راكب كتلة حديد ...وخبطت بيها فى كتلة حديد...الكتلة طبعا مش هيحصلها حاجه..بس ما تتخيلش رد فعل الصدمه هيكون قوى أد ايه على الراكب و هيكون كام ضعف اكتر من البودى الخفيف..
.......

باختصار لو عربيه حجر اوى من بتوع زمان اوى...خبطت فى عربيه من بتوع دلوقتى
والاثنين ماشيين بنفس السرعه ...وخبطو وجها لوجه
النتيجه ايه ؟؟؟؟
العربيه الحجر ...تلفيات بسيطه فى جسم السياره..مقابل اضرار جسيمه على الراكبين
العربيه الخفيفه.. تلفيات جسيمه فى السياره...مقابل اضرار اقل بكتييييير للراكبين
.........
يارب تكون وصلت ;)

[ASD peugeot]

الله ينور يا معلمه

[د-احمد عبد اللطيف]

السيارات الحديثه تصميمها فيه مناطق تسمي مناطق كرمشه مهمتها امتصاص الصدمه و الحفاظ على الكابينه او مقصورة القياده شبه سليمه حمايه للركاب
يعني لو شفت اختبار تصادم للادا او حتي للسيارات الصيني الحديثه ستجد ان الصدمه لابد ان تؤثر على مكان جلوس السائق يعني الاصابه لابد منها
لكن على النقيض في السيارات ذات التصميم الجيد ستجد انه بعد التصادم السائق والركاب بدون تأثر يذكر

[Nader]

بالظبط زي ما قال فلاينج كدة.

العربيات القديمة دبابات .... بس عوامل

الامان فيها شبة معدومة بالرغم من الصاج

المحمل اللي فيها.

في المقابل السيارات الجديدة استبدلت فكرة

الصاج المحمل دي فطرق اخرى لتحقيق اكبر

قدر من الامان لراكب السيارة وللمشاة ايضاَ!



فالابواب مثلاً تم اضافة لها قضبان حديدية

لحماية الركاب من الصدمات الجانبية،

ايضاً الاكصدامات تم وضع قضبان حديدية خلفها

لنفس الغرض.



المهم هو سلامة قائد العربية ومش العربية نفسها

العربية ممكن تتعوض او عنها ما اتعوضت لكن

البشر اللي بيروح مبيرجعش.

[ASD peugeot]

كان فيه حاجه عاوز اقولها انه الطريقه المعمول بيها في التصنيع هي الافضل بالمقارنه بما كانت عليه زي عربيتي بيجو 504 بس مش لدرجه انك لو بتسند علي العربيه او اقل حكه الصاج يدخل جوه عندك مثلا bmwاو مرسيدس الصاج بتاعهم في منتهي القوه فالنقطه هنا انه ضعف الصاج اكثر من الازم خطأ فادح

[thegoodhacker]

عندك مثلا bmwاو مرسيدس الصاج بتاعهم في منتهي القوه فالنقطه هنا انه ضعف الصاج اكثر من الازم خطأ فادح

فعلا العربيات الالماني خصوصا تلاقي صاجها قوي جدا و في نفس الوقت تصميمها مراعي لعوامل امان الركاب علشان كده تلاقي العربية تمنها غالي جدا....... اما العربيات الكوري فتراعي عوامل الامان بس العربية بتتدمر في حالة الحوادث الجامدة لان صاجها عامل زي صاج صفايح السمن!!

[osama_alam]

ايه احسن العربيات بالنسبة للصاج من نحية الامان والمتانة؟؟؟

شكر ليكم بجد افتدوني

ايه احسن العربيات بالنسبة للصاج من نحية الامان والمتانة؟؟؟

[Xpert]

البوديهات القديمه كانت بتصنع من حديد غني .. ايام البركه و العز زمان .. دلوقتي الحديد بقي ليه تمن .. فكل مدي العربيات بتخف ..
بالنسبه للايروديناميكش .. quote for ferdinand porsche : aerodynamics is for those who cant manufacture a decent engine !

[فادى]

للأسف أراء الزملاء فيها الكثير من الخلط.
أنا هشرحلك المشكلة التى واجهت المصنعين.
زمان كانت السيارة بسيطة و مفيهاش تجهيزات زى الى موجودة دلوقتى, تجهيزات الراحة و الامان و غير ذلك, لذا هتتفاجىء لو عرفت أنو وزن أى سيارة قديمة أقل و أخف من وزن أى سيارة جديدة.
تخيل انو وزن ال131 حوالى 950 كغ فقط, بينما وزن الفيات بونتو حوالى 1050 كغ!! يعنى ال131 العائلية اخف من وزن البونتو السيارة الصغيرة المدمجة.
طبعا وقع المصنعين فى كارثة, لأنهم مضطرين يضيفوا للسيارة مختلف التجهيزات و لكن فى الوقت نفسه لازم وزنها يكون متناسب مع المحرك.
و كان ايه الحل؟
طبعا تخفيف الصاج لتعويض الوزن, لأن مفيش حل غير كده, طبعا الى جانب حلول أخرى غريبة و غير عملية زى صناعة المحرك من الألمونيوم.
و رأينا حلول كارثية مثل صناعة أجزاء من جسم السيارة من الألمونيوم أو البلاستيك.
و ملوش دعوة بالأمان, لأن المتانة مهمة جدا من أجل الأمان, ففى النهاية جزء كبير من الاصابات المميتة نتيجة لتغير حجم السيارة و "فعص" الركاب, لذا يحاول المصنعين تعويض ذلك عبر وضع قضبان حديدية حول المقصورة أو جعل انهيار السيارة بعيدا عن المقصورة قدر الامكان. يعنى تنهار السيارة كلها لكن أخر جزء فى هذا الانهيار هو المقصورة.
أما بالنسبة للصدمة, فيمكن تخفيفها بواسطة الوسائد الهوائية, و هى ليست اختراعا حديثا بالمناسبة, بل كانت قد ابتكرتها جنرال موتورز على ما أذكر فى الستينات, و لكن فى شكل وسادة مطاطية.
و حقيقة الأمر أن الصانعين الأمريكيين مثلا لم يرضخوا لضغط محبى البيئة و عالجوا الأمر عبر اعتماد محركات أكبر و أقوى و مزودة بشواحن تربو, أما الأوروبيون فنظرا لقواعد البيئة الصارمة لديهم اضطروا لاعتماد حلولهم الكارثية, أو استبدال محركات البنزين بمحركات الديزل الأكثر قوة, و لم يهتم اليابانيون و الكوريون كثيرا بهذه المعضلة, فهم مازالوا يحاولون صنع سيارة تسير فقط و تحاكى السيارات الأمريكية من حيث الراحة.

[eng_mkhalaf]

يا جماعة أنتم نسيتم الكليو الرفرف فبر كمان مش صاج - حبة حبة يعملوها كاوتش أو سفنج :)

[Powert]

الفيديو ده هيوضح كل حاجة ليه القديم حديد وليه الجديد ورق لانه بيفرق جامد في الحماية

لان العربية لما تكون حديد مع السرعة العالية بتكون اضعف وحوادثها اقوى

عكس لما تكون خفيفة و فايبر لان الفايبر هيرد الخبطة وتاثير الخبطة هيوزع على اماكن متفرقة

من الجسم العربية وليس لتوفير


http://www.youtube.com/watch?v=3l4YBf2tjag

[فادى]

الفيديو ده هيوضح كل حاجة ليه القديم حديد وليه الجديد ورق لانه بيفرق جامد في الحماية

لان العربية لما تكون حديد مع السرعة العالية بتكون اضعف وحوادثها اقوى

عكس لما تكون خفيفة و فايبر لان الفايبر هيرد الخبطة وتاثير الخبطة هيوزع على اماكن متفرقة

من الجسم العربية وليس لتوفير


http://www.youtube.com/watch?v=3l4YBf2tjag

مع احترامى للجميع, هذا الكلام تروج له شركات السيارات لتبرير تلك الحلول الكارثية. ففى النهاية البلاستيك هو البلاستيك, و هو غير أمن, و هناك طرق عدة لتوزيع الصدمة و ليس من بينها تقليل متانة الصاج, لأن حدوث انبعاج هو أخطر مئات المرات من وقع الصدمة التى يمكن امتصاصها بطرق أخرى.