شرح مبسط لكيفية تسقيط النقلات ومعناها ! !

[Ahmod]

السلام عليكم

كتير بندخل على مواضيع سواء كانت مواضيع عادية او مواضيع شد وجري ونلاقي صاحب الموضوع كاتب انه كان ماشي عادي وهوووووب راح مسقط نقلة وفتح

فيه ناس مش عارفة يعني ايه تسقيط نقلات او ليه لما بنسقط نقلة العربية بتسحب بطريقة احسن واقوى

وبصراحة انا كنت واحد من الناس اللى مش عارف تسقيط النقلات بيخلي العربية تسحب بقوة ليه لحد فترة قريبة جدا واكتشفتها من خلال بعض التجارب في العربية عندي وحبيت انقل لكم تجربتي واللى فهمته من الموضوع

وطبعا لو في اي حاجة او معلومة غلط اتمنى من الخبراء تصححها عشان محدش يوصله معلومة غلط

الموضوع بإختصار

لما بنكون ماشيين بطريقة عادية وهادية المفروض اننا بنريح الماتور في الغيارات وبتنقل عند rpm قليل وتلاقي نفسك مثلا ماشي على سرعة 70 وانت مدي الغيار الرابع او الخامس

وده بيريح الماتور وبيوفر في استهلاك البنزين وبيطول فترة عمر الماتور لانك مديله غيراته براحته وبدون مشاكل

ونفس الحالة بالنسبة للعربيات الاوتوماتيك لو ماشي براحة ومن غير قرص هتلاقي الماتور بينقل بدري عشان يوفر استهلاك البنزين ويطول عمر الماتور

طيب معروف ان كل عربية بتتكون من اربع او خمس غيرات سواء اتوماتيك او مانويل لو افترضنا اننا ماشين قرصين من الغيار الاول

يعني حارق على الغيار الاول والتاني والتالت الى اخره

هتلاقي مثلا على سبيل المثال عندي في الياريس لما بكون حارق الاول ممكن يوصلني ل 45

التاني = 85-90

التالت = 130-140

والرابع للاخر طبعا العربية مكونة من اربعة غيارات فقط

طيب ده كلام جميل جدا

هنفترض بقى اننا ماشين على سرعة 70 وبراحة والماتور واخد الغيار الرابع ومافيش اي مشاكل سعتها هيبقى ال Rpm عند 2.5 تقريبا لانك مريح الماتور ومديله غيار عالي على سرعة قليلة

وهووووووب مرة واحدة حبيت تجري << ايوة تجري بمعنى تجري

لو دست بنزين جامد هتلاقي ال Rpm بدأ يعلى من الفين لفة في الثانية الى تلت الاف بعدين اربعة وخمس وهكذا

ومعروف ان كل مازاد عدد لفات الماتور في الثانية ده هيزود السحب وهيزود القوة الى غير ان كل عربية المفروض اقصى عزم ليها واقصى قوة بتطلع مثلا عند عدد لفات 5500 مثلا

طبعا بتختلف من عربية للتانية وفيه عربيات بيطلع اقصى عزم عند عدد لفات اقل

طيب ده كلام جميل كنت ماشي 70 ودوست بنزين وال Rpm بدأ يعلى فعلما توصل الى عدد لفات كبير يمكنك من ان انت تخرج اقصى عزم للماتور ده هياخد وقت في التجميع شوية

افترض اني ماشي حارق من الاول وبعدين جبت التاني وحرقت علما اوصل لسرعة 70 وانا حارق على التاني هيكون ال Rpm سعتها مثلا وصل ل 4.5 ولا حاجة

طيب كلام جميل نرجع للمثال بتاعنا اننا ماشيين على 70 وعلى الغيار الرابع وهوب رحت مسقط للتاني

سرعة 70 دي في الغيار التاني بتكون عند Rpm عالي لانه اخر الغيار بالتالي انت كدة بدل ماهتبدأ تدوس على البنزين وتعلي عدد لفات الماتور من الفين لفة الى تلاتة الاف وبعدين اربعة الاف

لاء انت سقطت نقلة وبمجرد تسقيطك للنقلة خليت ال Rpm يعلى علطول لان السرعة اللى انت ماشي عليها دي في اخر الغيار وده نتيجته انك هتبدس تدوس بنزين على Rpm عالي يعني عدد لفات اكتر في الثانية وده نتيجته سحب اقوى بكتير

يعني بإختصار انت لما بتسقط نقلة بتعلي ال Rpm وبالتالي هيديلك سحب وعزم اقوى

طيب بس لازم في نقطة نبقى عارفينها وواخدين بالنا منها ايه هي ؟ ؟ ؟ ؟

كل غيار اقصى سرعة ليه كام ؟ يعني على سبيل المثال لو انا الغيار التاني عندي اخره 80 وكنت ماشي 90 براحة ورحت مسقط للتاني كدة انا هبقى بحرق الماتور لانك سعتها هتدخل في الريد زون والسرعة دي مش موجودة في الغيار التاني اساسا

يبقى لازم قبل مانبدأ نسقط نقلات نكون عارفين كل غيار سرعته من كام لكام وقبل مافكر اسقط ابص بصة على السرعة اللى انا ماشي عليها واشوف السرعة دي موجودة في انهي غيار واقوم مسقط عليه علطول

سعتها هتحس بفرق جامد في السحب

طيب كلام جميل ويارب يكون مفهوم ومافيهوش حاجة غلط

دلوقتي لو حبيت اسقط نقلة هسقطها ازاي ؟

الموضوع بسيط

لو الفتيس مانويل هيبقى مافيش اي مشكلة غير انك تسيب بنزين وتدوس دبرياج وتنقل اكنك بتنقلة نقلة عادية جدا

بس لازم برضوا تكون واخد بالك من سرعتك ومن الغيار اللى انت هتنزل عليه

ايووووووووة عشان ماتحرقش الماتور لازم تاخد بالك

----

طيب لو الفتيس اوتوماتيك

الفتيس الاوتوماتيك بيبقى مبرمج كومبيوتر انه بيطلع سحب وعزم للعربية على حسب قوة دوستك على دواسة البنزين

بمعنى لو انا بدوس براحة الكومبيوتر هيفهم انك عايز تمشي براحة وهينقل بدري عشان يريح الماتور ويوفر استهلاك البنزين

طيب لو انا حارق ودايس جامد سعتها الكومبيوتر هيفهم انك عايز تسوق سواقة رياضية وعايز تطلع اقصى عزم للماتور بالتالي هتلاقي الماتور بدأ ينقل عند Rpm عالي عشان يديلك سحب اقوى وطبعا ده بيعتمد في الاخير على قوة الدوسة بتاعتك

طيب كلام جميل جدا لو انا ماشي هادي وحبيت احرق مرة واحدة ؟ ؟ ؟

الفتيس الاوتوماتيك فيه حاجة اسمها Kick Down او كيكاية بالمصري

ودي معناها اني اجيب اخر دواسة البنزين واسم كيك داون ده جاي لان العربيات العالية بيكون فيه زرار تحت دواسة البنزين لما بتجيب الدواسة للاخر بتدوس على الزرار ده والزرار ده حاجة كدة زي الاوفر دريف معنديش معلومات عنه كتير غير انه مش موجود الا في العربيات العالية زي البي ام والاودي والكلام ده

لكن ده مش موجود في العربيات بتاعتنا على حد علمي ومن هنا طلع مصطلح كيكاية

نرجع لموضوعنا

لما اكون ماشي براحة وحبيت احرق هدوس الدواسة للاخر الكومبيوتر هيفهم انك عايز تجري هيقوم بشكل اتوماتيك لوحده مسقط على غيار مناسب وهيحرق عليه

يعني الموضوع في الاتوماتيك بيكون ابسط وبيحصل لوحده لكن لو انت اللى سقط بنفسك هيديلك عزم اقوى وسحب اكتر

طيب اسقط بنفسي ازاي ؟؟؟

برضوا الموضوع بسيط لو الفتيس استيبترونك هتجيب الفتيس على المانويل وتنزل العصاية لتحت مرة او مرتين على حسب عدد النقلات اللى انت عايز تنزلها

وبرضوا لازم ناخد بالنا من السرعة ومن الغيار اللى هننزل عليه

---

طيب لو الفتيس اتوماتيك عادي ؟ ؟ ؟ ؟ ايوة هنا فيه مشكلة

هي مش مشكلة ولا حاجة وبرضوا حاجة بسيطة

الفتيس الاوتوماتيك العادي بيتكون من P , R , N ,D , 3 , 2 , L

طيب معروف اننا لما بنسوق بنكون جايبين على D

طيب لو حبيت اسقط نقلة هيكون كل اللى عليك انك تسيب بنزين وتحرك عصاية الفتيس الى 2 او 3

2 = لو حبيت تنزل على الغيار التاني

3 = لو حبيت تنزل على الغيار التالت

بس لازم تاخد بالك من السرعة اللى انت ماشي عليها اييييوة عشان تسقط على غيار مناسب

وبعد كدة تخلي بالك ان الماتور مش هينقل لوحده لانك خليته على وضع المانويل بالتالي لازم بعدها لو فرضنا اننا سقطنا على التاني يبقى تاخد بالك قبل ماتدخل على الريد زون تكون شلت رجلك من البنزين وحولت الفتيس الى 3 او D

-------------

دي كانت تجربتي لتسقيط النقلات وحبيت انقلهالكم اتمنى يكون الشرح واضح وطبعا الاخطاء واردة فلو في حاجة غلط اتمنى تصحيحها

وللامانة انا مش عارف بصراحة اذا كان موضوع تسقيط النقلات ده بيأثر على الماتور و الفتيس او لا ! بالذات الاوتوماتيك العادي

فلو حد عنده خلفية ياريت يفيدنا عشان نطمن

[Mahmoud Nagieb]

تسلم ايدك موضوع مفيد للناس اللى عاوزة تعرف يعنى ايه تسقيط نقلات

هو بس انا عاوز اقول ان فى الاوتوماتيك كتر الكيك داونز بيأثر على الفتيس على المدى الطويل ... فطبعا مش صح ان الواحد طول ما هو ماشى يدى كيكات ..... فى المنيوال بقى هو احسن تسقيط لما تسقط لغيار يبتدى عنده الار بى ام من 3.2-4 علشان المنطقة ده الموتور بيطلع فيها اعلى عزم .... وطبعا التسقيط بيبقى بيعتمد على حفظك للعربية ونهاية غيارتها يعنى انت ممكن تسقط نقلتين مرة واحدة بس بتبقى عارف ان الغيار اللى بتسقطله ده هو اللى هيديك العزم اللى عاوزه ... الموضوع فى المانيوال بيعتمد على السنس

وشكرا يا ريسنا على الموضوع الجميل مرة تانية

[Ali_Abo_Amr]

موضوع جميل وتسلم على المجهود والتوضيح ...
عايز اضيف حاجة بسيطة برضه بالنسبة لتسقيط النقلة فى الاتوماتيك - بخلاف الدوس على البنزين للآخر علشان الدواسة تلمس زرار الكيك داون - وهى انك ممكن تشيل رجلك من على دواسة البنزين وتحطها تانى بسرعة هاتلاقي العربية سقطت النقلة برضه ... وده موجود عندى فى التيدا مش عارف موجود فى عربيات تانيه او لأ ....

[Zika9909]

شكرًا يا Ahmod
أول مرة أعرف يعني إيه Kick Down

[abdalah_hashem]

بس العربية بتروح مفرملة على طول
هل دوة مثلا انت بتسقط نقلة للثوانى وتنقل على الاعلى تانى ولا اية وياريت لو تعرف تجيبلنا فيديو يوضح الحركة دية

[Ahmod]

تسلم ايدك موضوع مفيد للناس اللى عاوزة تعرف يعنى ايه تسقيط نقلات

هو بس انا عاوز اقول ان فى الاوتوماتيك كتر الكيك داونز بيأثر على الفتيس على المدى الطويل ... فطبعا مش صح ان الواحد طول ما هو ماشى يدى كيكات ..... فى المنيوال بقى هو احسن تسقيط لما تسقط لغيار يبتدى عنده الار بى ام من 3.2-4 علشان المنطقة ده الموتور بيطلع فيها اعلى عزم .... وطبعا التسقيط بيبقى بيعتمد على حفظك للعربية ونهاية غيارتها يعنى انت ممكن تسقط نقلتين مرة واحدة بس بتبقى عارف ان الغيار اللى بتسقطله ده هو اللى هيديك العزم اللى عاوزه ... الموضوع فى المانيوال بيعتمد على السنس

وشكرا يا ريسنا على الموضوع الجميل مرة تانية

اكيد اي حاجة فيها حمل وضغط زيادة على الماتور هيأثر عليه على المدى البعيد

وطبعا لازم قبل مالواحد يفكر يسقط يكون حافظ غيارات عربيته

الف شكر على مشاركتك وردك

موضوع جميل وتسلم على المجهود والتوضيح ...
عايز اضيف حاجة بسيطة برضه بالنسبة لتسقيط النقلة فى الاتوماتيك - بخلاف الدوس على البنزين للآخر علشان الدواسة تلمس زرار الكيك داون - وهى انك ممكن تشيل رجلك من على دواسة البنزين وتحطها تانى بسرعة هاتلاقي العربية سقطت النقلة برضه ... وده موجود عندى فى التيدا مش عارف موجود فى عربيات تانيه او لأ ....

فعلا ده كلام منطقي لان اول مدوسة هتعلي ال Rpm وتاني دوسة هتيجي على Rpm عالي بالتالي هتديلك عزم اقوى

بس طبعا لو سقطت نقلة هيبقى ال Rpm اساسا عالي فمش هتبقى محتاج انك تسيب البنزين وتدوس تاني

اول لو دست دوسة تقيلة شوية بحيث ترفع ال Rpm بسرعة

شكرًا يا Ahmod
أول مرة أعرف يعني إيه Kick Down

العفو تحت امرك ومشكور على ردك

بس العربية بتروح مفرملة على طول
هل دوة مثلا انت بتسقط نقلة للثوانى وتنقل على الاعلى تانى ولا اية وياريت لو تعرف تجيبلنا فيديو يوضح الحركة دية

هي العربية مش بتفرمل بس بتحس ان العربية قفشت وهديت للحظة وبمجرد انك تدوس بنزين هتحس ان العربية عايزة تطير من على الارض

وان شاء الله هصور فيديو من عندي وانزله من عنيا

[Ahmod]

بس العربية بتروح مفرملة على طول
هل دوة مثلا انت بتسقط نقلة للثوانى وتنقل على الاعلى تانى ولا اية وياريت لو تعرف تجيبلنا فيديو يوضح الحركة دية

معلش مانتبهتش لسؤال حضرتك كويس

الفكرة كلها ان حضرتك بتسقط نقلة لغيار مناسب للسرعة اللى انت ماشي عليها بالتالي ال Rpm هيعلى على حسب السرعة اللى انت ماشي عليها سواء كانت في نص الغيار او في اخره

بالتالي انت هتحرق عليه وبعدها تنقل بشكل طبيعي للنقلة الاعلى

والعربية بتهدى بس لحظة تسقيط النقلة بعد كدة بمجرد تبدأ تدوس بنزين هتلاقي العربية عايزة تطير من على الارض وهتلاحظ عزم قوي جدا

[A.Saad]

لو دوست بنزين وانت بتشيل رجلك من الدبرياج
العربية كدة سرعتها هتزيد
لو ما دستش وشلت دبرياج بس ومدستش بنزين تانى
هتلاقى العريبية فرملت فجأة
كدة انت بتعمل فرملة عكسية ودى طريقة للفرملة لو فراملك مش ولا بد

[Ashraf_Ibrahim]

موضوع جميل يا احمد تسلم ايدك
ليا بس ملاحظة بسيطة على كيفية تسقيط النقلة
بالنسبة للعربية المانيوال:-
يستحسن انك متسقطش اكتر من نقلة
بمعنى لو انت ماشي على الخاسم سقط للرابع ولو انت على الرابع سقط للتالت
بلاش تنزل من الرابع للتاني او من الخامس للتاني حتى لو افترضنا ان سرعة التاني تستحمل دا لن بكدة انت بتجبر الموتور انه يستخدم الفرملة الاوتوماتيكية الخاصة بالغيار دا وبالتالي سرعة العربية هتنخفض
هو ممكن يكون لحظيا بس دا غلط على الموتور وعلى الفتيس ومش مستحب
تقدر تسقط من الخامس للتالت اه عشان التالت غيار مداه كبير ويستحمل معاك وفرملته الاوتوماتيكية مش بقوة الغيار التاني
لكن الغيار التاني لو انت على غيار اعلى بلاش تنزل ليه لو عايز تحرق وتجري عشان مش مستحب
دي نقطة
فيه طريقة تانية انا مجربها
هي استجابتها مش بسرعة تسقيط النقلة ولكن استجابتها كويسة برده
هي انك بتقوم رافع رجلك من على البنزين خالص
وتقوم كابس بنزين للآخر بتلاقي الموتور بدأت سرعته تعلى معاك بصورة أسرع من العادية ودي بتنفع واسرع من انك تسقط نقلة في التنفيذ بس في الاداء اداءها اقل شوية

وبالنسبة للعربيات الاوتوماتيك نفس الفكرة برده
بتستعمل زرار الاوفر درايف او بتشيل رجلك من على دواسة البنزين خالص وتقوم كابس بنزين مفاجيء هتلاقي الموتور سقط نقلة لوحده وصوته علي وهتسمع احلى انغام للموتور

دي كانت مداخلة بسيطة وشكرا على الموضوع الجميل دا

[Ashraf_Ibrahim]

لو دوست بنزين وانت بتشيل رجلك من الدبرياج
العربية كدة سرعتها هتزيد
لو ما دستش وشلت دبرياج بس ومدستش بنزين تانى
هتلاقى العريبية فرملت فجأة
كدة انت بتعمل فرملة عكسية ودى طريقة للفرملة لو فراملك مش ولا بد

تمام جدا يا سعد
لو عايز يحرق ويجري لابد يدوس بنزين وهو بيرفع رجله من على الدبرياج عشان ميدخلش في سكة الفرملة الاوتوماتيكية

[mada_76]

اولا بشكرك على مجهودك
ثانيا كنت عاوز اصحح معلومة وهي ان ال rpm هو عدد لفات الموتور في الدقيقة مش بالثانية
يعني لو ال rpm على 2.5 ده معناه ان الموتور بيلف 2500 لفة في الدقيقة
وشكرا على الموضوع تاني مرة

[juba8]

موموضوع رائع