بالله عليكم حد يساعدنى فى التو 2008

[satoabdo]

انا عندى عربية سوزكى التو 2008 800 سى سى وكنت عايز اسافر بيها شرم الشيخ وناس كتير قالولى مش حينفع فانا كنت عايز اعرف حينفع ولا لا ولو ينفع اعمل اية علشان اسافر وانا متطمن وشكرا ليكم للاهتمام

[Ashraf_Ibrahim]

هينفع عادي جدا مفيش مشاكل
اهم شيء دورة التبريد عندك تكون مظبوطة
والعربية متكونش بتسخن
اعتقد المسافة لشرم الشيخ في حدود 550 كم يعني مش كبيرة اوي يعني
ريح بس مرة او مرتين في الطريق واستنى على العربية تهدى خالص وتبرد فعلا ومن ثم كمل طريقك وتابع حرارة العربية دا اهم حاجة
وبالتوفيق في رحلتك ان شاء الله

[zegzaag]

انا بروح بالكرسيدا سينا رغم انها قديمه بص يا كبير في احتياطيات
1-تاخد طقم سيور معاك لان السيور بتتقطع فاي وقت
2-الفرده السبير تشيك عليها عند بتاع الكوتش وتفحص الاربع عجلات وتزود السبير وتشيك على الكوريك والصليبه
3-وانته واقف بتعمل العجل خليه يبصلك عالدينامو وسلك الدينامو الي طالع من علبة الفيوزات لان ده اهم حاجه فكهربة العربيه
4-وزي ما قال اخويه الفاضل اشرف ابراهيم دورة التبريد ومتنساش الميه الخضرا لانها بتتحمل درجات حراره مرتفعه ودرجه غليانه مرتفعه
5-طبعا المشي المسافه الطويله دي محتاج انك تغير زييت قبل ما تمشي لان كل ما يكون الزيت جديد والسياره على سرعات عاليه وطرق مفتوحه مريح ليها اكتر لان طبعا ده مشوار عليها يعني مبتهداش غير كل فين وفين فاختار زيت تقيل محترم انصحك بشيل الاحمر سعرو رخيص وبيكفيك الف كيلو يعني رايح جاي من سينا عالقد بالظبط وسعرو رخيص جدا ولزوجتو عاليه ( صاحبي كان راكن عربيتو 3 شهور والزيت ده كان جواها ومخفش حاجه تجنن لزوجتو مفزعه ) بس عيبو بيقعد الف كيلو او الف ونص بس

ومتنساش تجيب معاك قصص تسمعها عالكاسيت او حاجه تسليك لان السفر حلاوتو لما تجيب معاك ميديا حلوه زي قصص الانبياء او اي حاجه فيها حكيات وكده

ويارب تروح وترجعلنا بالسلامه

[Amr Axel]

ده يا ريس ردي عليك في الموضوع في قسم السوزوكي

لا العربية تستحمل ان شاء الله
اهم حاجة تكون بس بتعملها صيانة و مش مخليها محتاجة حاجة

و قبل ما تسافر اعمل الآتي
- تتأكد ان وظايف العربية شغالة تمام مفيهاش مشكلة ( يعني الدوارة طقم الكهربا و الفرامل و دبرياج و الفتيس و العفشة ) و اتأكد ان السيور تمام لو لسه مغيرها زي سير الكاتينة و الدينامو يبقي خلاص عادي كده
يعني تشوف كل وظايف العربية

و بعد ده اعمل الآتي :
- غير زيت الموتور و شوف زيت الفتيس و الفرامل لو محتاجين يتزودوا

- شوف القربة و الريداتير و نضف فلتر الهوا

- اكشف ع العجل كله بالاستبن و ظبط ضغطه

و يفضل لو نيتروحين لأنه بيحافظ ع ضغط العجل في درجات الحرارة المختلفة بس لو مش عايز عادي مفيش مشاكل الهوا حلو برده في الحر ههههه
و شيك ع الكوريك و مفتاح الربط

- راجع كل الانوار في عربيتك تكون شغالة عشان لو الدنيا ليلت

-فول بنزين

- خد معاك جيركن فيه بنزين احتياطي

- جيركن مية


و شوف الموضوع ده لو معاك بعض الحاجات ديه هتفيدك زي منفاخ الهوا او المثلث العاكس او شنطة الاسعافات.....الخ....ألخ
http://www.nilemotors.net/nile/195073-a.html (أدوات يــجــب ان تــكــون فـي كــل ســيـارة !!)

و ديه برده تكون عارفها احتياطي لأي حاجة

http://www.nilemotors.net/nile/222390-a.html (تعالوا نعرف الاسعافات الأولية ( الدورة كاملة الخاصة بالهلال الاحمر المصري ))

و اخيرا اي حاجة للحماية الشخصية تكون في جيبك طول الوقت سواء طبنجة او الكترك شوك او حتي شومة اي حاجة تحمي بيها نفسك تكون معاك
و تخلي بالك من اي شخص تشك فيه و متفكرش تنزل من عربيتك ابدااا لأي حاجة تحصل او تشوفها متنزلش الا في حالة الضرورة القصوي اللي هي لا مفر منها بس كده

اتمني مكونش نسيت حاجة

و اتوكل ع الله و سافر

و تروح و ترجع بالسلامة ان شاء الله :)

[satoabdo]

جزاكم الله خيرا اخوتى فى الله اشرف ابراهيم وزجزاج واكسيل وربنا يجعلة فى ميزان حسناتكم والله العظيم ما عارف اشكركم ازاى على المعلومات المهمة جدا دية